Əli Kərimlinin yalanlar seriyası...

Bakı:

24 °C

51 %

10 m/s

Əlaqə

AZ RU EN

Ana səhifə / Siyasət / Əli Kərimlinin yalanlar seriyası...

Əli Kərimlinin yalanlar seriyası...

20.02.2021 [08:28]

44 günlük Vətən müharibəsində qazanılmış qələbəmizə kölgə salmaq cəhdləri “daşa dəyən”, əsassız iddiaları fiaskoya uğrayan radikal müxalifət təmsilçiləri yalan kampaniyalarının istiqamətlərini dəyişməkdədirlər. Belə ki, artıq ənənəvi çirkin iftiralarla hər hansı bir uğura imza ata bilməyəcəyini dərk edən AXCP sədri Əli Kərimli yeni manipulyasiya ünvanı seçib. Daha doğrusu, o, sosial şəbəkələrdə absurd iddialar səsləndirməklə Azərbaycan gəncliyini manipulyasiyaya məruz qoymağa çalışır. Gənclərə xitabən yeni yalanlar uyduran AXCP sədri əsassız iddialarla xəyanətlərini ört-basdır edə biləcəyini və siyasi dividend qazanacağını düşünür.
Ə.Kərimlinin bu istiqamətdə qarayaxma kampaniyasının başlıca, məqsədi, heç şübhəsiz, Azərbaycanda həyata keçirilən uğurlu və mütərəqqi dövlət gənclər siyasətinin üzərinə kölgə salmaqdır. Amma onun reallıqları təhrif etmək cəhdləri iflasa məhkumdur. Çünki kimsəyə sirr deyil ki, ölkəmizdə milli maraqlara və müasir çağırışlara cavab verən gənclər siyasəti Azərbaycan gəncliyinin hərtərəfli inkişafını təmin edən mühüm amildir. O da gerçəklikdir ki, Azərbaycan gəncliyi öz dövlətinə, Prezidentinə inanır, etimad göstərir. Bu, ötən il bir daha əyani şəkildə və ən yüksək səviyyədə özünü göstərdi. Prezident İlham Əliyevin bir çağırışı ilə öz dövlətinin yanında yer alan, işğal altındakı torpaqlarımızın azadlığı uğrunda mübarizəyə qoşulan Azərbaycan gəncliyi Vətən müharibəsində mütləq qalibiyyətin aparıcı qüvvələrindən oldu. Bu mənada, Əli Kərimlinin danışdığı, ictimai rəyə sırımağa çalışdığı yalanların heç bir əsası yoxdur.
Bunlarla yanaşı, antimilli mərkəzlərin sifarişi ilə ölkəmizə qarşı aparılan çirkin kampaniyaların tərkib hissəsi kimi çıxış edən Əli Kərimli iddia edir ki, guya Azərbaycan gənclərinin xaricdə təhsil alması üçün dövlət tərəfindən heç bir addım atılmır. AXCP sədrinin yalan danışdığını isə faktlarla sübut etmək çox asandır. Azərbaycanda gənclərin xaricdə təhsil alması, eləcə də ölkəmizdə təhsilin keyfiyyətinin yüksəldilməsi və beynəlxalq rəqabətliliyin artırılması üçün müvafiq Dövlət proqramları həyata keçirilib və indi də uğurla davam etdirilir. Belə ki, “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı”nın uğurlu icrası nəticəsində minlərlə azərbaycanlı gənc xarici universitetlərdə məhz dövlət hesabına təhsil aldı. “2019-2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı” isə ölkəmizdə fəaliyyət göstərən ali təhsil müəssisələrində təhsilin keyfiyyətinin artırılmasına, o cümlədən beynəlxalq təcrübələrin tətbiqinin daha da genişləndirilməsinə xidmət göstərir. Bu gün ölkəmizdə savadlı, bacarıqlı, xarici ali təhsil müəssisələrində təhsil almış gənclərin potensialından geniş şəkildə istifadə olunur. Ölkəmizdə aparılan kadr islahatları da bunu təsdiqləyir. İdarəetmə strukturlarında, qanunvericilik orqanlarında və digər istiqamətlərdə yeni texnologiyaları mənimsəmiş gənclərə etimad göstərilir. Bu, ölkəmizin yeni inkişaf mərhələsində olduqca mühüm amillərdən sayılır.
Bütövlükdə, faktlar və reallıqlar Əli Kərimlinin gənclərə xitabən danışdığı yalanların sabun köpüyündən başqa bir şey olmadığını göstərir. Buna görə də onun yalanlar seriyası, sadəcə olaraq, ikrah hissi ilə qarşılanır.
Pərviz SADAYOĞLU

Paylaş:

Baxılıb: 583 dəfə