Aprel döyüşləri torpaqlarımızın işğaldan azad olunması prosesinin başlanğıcıdır

Bakı:

23 °C

68 %

6 m/s

Əlaqə

AZ RU EN

Ana səhifə / Siyasət / Aprel döyüşləri torpaqlarımızın işğaldan azad olunması prosesinin başlanğıcıdır

Aprel döyüşləri torpaqlarımızın işğaldan azad olunması prosesinin başlanğıcıdır

06.04.2021 [08:59]

Beş il öncə dünya ictimaiyyəti Cənubi Qafqazda işğala məruz qalmış qüdrətli dövlətlə işğalçı ölkənin silahlı birləşmələrinin qarşı-qarşıya gəldiyi dördgünlük müharibəyə - Aprel döyüşlərinə şahidlik etdi. Bu döyüşlər bir çox nüansları yenidən aşkar etməklə bəzi reallıqlara bir daha aydınlıq gətirdi.
Əvvəla, qeyd etmək lazımdır ki, Aprel döyüşləri Azərbaycanın işğal faktı ilə barışmaq niyyətində olmadığını nümayiş etdirdi. Ermənistanın cinayətkar hərbi-siyasi rəhbərliyi həmin dövrdə cəbhə xəttində növbəti təxribat törədərək vəziyyəti gərginləşdirməklə Azərbaycanın diplomatik uğurlarını və beynəlxalq aləmin münaqişənin ədalətli həlli ilə bağlı qəti mövqeyini neytrallaşdırmağa çalışdı. Lakin Azərbaycan Ordusunun bu təxribatların qarşısını alması, nəticədə Ermənistan silahlı qüvvələrinin çoxsaylı canlı qüvvə, texnika itirməsi, 2000 hektara yaxın ərazinin, o cümlədən Lələtəpə və Talış yüksəkliklərinin geri qaytarılması Ermənistanın niyyətlərinin iflasla nəticələnməsini şərtləndirdi. Aprel döyüşləri həm də status-kvonun qəbuledilməzliyini qətiyyətlə ifadə edən Azərbaycanın Ermənistanın təxribatlarına dözmək niyyətində olmadığını və düşmənə layiqli cavab vermək əzm və iqtidarında olduğunu göstərdi.
Digər tərəfdən, Azərbaycan Ordusunun şanlı Aprel qələbəsindən sonra beynəlxalq ictimaiyyət bir daha anladı ki, Ermənistanın Azərbaycan torpaqlarının 20 faizini işğal etməsi nəticəsində yaranmış münaqişə ölkəmizin ərazi bütövlüyünə qarşı törədilmiş qəsdin və təcavüzkar siyasətin əyani nümunəsi olmaqla yanaşı, həm də regional təhlükəsizlik sistemi üçün ciddi təhdiddir. Ona görə də bu problemin həlli beynəlxalq təhlükəsizliyin diktə etdiyi zərurətdir.
Bunlarla yanaşı, Aprel döyüşləri erməni təbliğat maşınının “Ermənistan ordusunun gücü” haqqında formalaşdırdığı mifi dağıtdı. Elə bu ölkənin hərbi-siyasi dairələrinin bir sıra nümayəndələri öz ölkələrinin işğalçılıq siyasətindən imtina etməsini yeganə çıxış yolu kimi göstərdilər. Yəni 2016-cı ilin Aprel döyüşlərinin nəticələri Ermənistanda ideoloji əsasları dağıtmaqla yanaşı, bu ölkənin işğalçılıq siyasətindən əl çəkməsinin zəruriliyini bir daha nümayiş etdirdi. Aprel döyüşləri, eyni zamanda, sarsıdıcı zərbə kimi Ermənistanda hərbi xunta rejiminin çökməsində mühüm rol oynadı.
Ən mühüm məqamlardan biri budur ki, Aprel döyüşləri torpaqlarımızın işğaldan azad olunması prosesinin başlanğıcı, Azərbaycanın şanlı hərb salnaməsinə düşən tarixi zəfərdir. Azərbaycan Silahlı Qüvvələri 44 günlük Vətən müharibəsində tarixi qələbə qazanaraq ölkəmizin ərazi bütövlüyünün bərpasına nail olmaqla yeni zəfər salnaməsi yaratdı.
Əfsuslar olsun ki, bəzi qərəzli dairələr, o cümlədən ölkəmizdəki “beşinci kolon” nümayəndələri tarixi ədaləti bərpa etmiş qüdrətli Azərbaycan Ordusu haqqında dezinformasiyalar yaymaqla ictimai rəyi yanıltmağa çalışırlar. Təbii ki, məqsəd Müzəffər Ali Baş Komandanımızın rəhbərliyi ilə möhtəşəm zəfər yürüşü edərək torpaqlarımızı işğaldan azad edən Azərbaycan Silahlı Qüvvələrinin tarixi qələbəsinin əhəmiyyətini azaltmaqdır. Amma ermənipərəst dairələrlə sinxron hərəkət edərək sosial şəbəkələrdə qara piar kampaniyası aparan bu dairələrin məkrli niyyətləri və cəhdləri hər zamankı kimi, fiaskoya məhkumdur!
Nurlan QƏLƏNDƏRLİ

Paylaş:

Baxılıb: 680 dəfə