Soros Fondu AŞPA-da maliyyələşdirdiyi deputatlar vasitəsilə ölkəmizi hədəfə almağa cəhd edir

Bakı:

23 °C

78 %

4 m/s

Əlaqə

AZ RU EN

Ana səhifə / Siyasət / Soros Fondu AŞPA-da maliyyələşdirdiyi deputatlar vasitəsilə ölkəmizi hədəfə almağa cəhd edir

Soros Fondu AŞPA-da maliyyələşdirdiyi deputatlar vasitəsilə ölkəmizi hədəfə almağa cəhd edir

23.04.2021 [08:15]

Məlum olduğu kimi, Soros Fondu dünyada mənfi imici ilə tanınır. Hazırda dünyanın bir çox ölkəsi haqlı olaraq Soros Fondunu hakimiyyətlərə qarşı qeyri-qanuni aksiyaları, üsyanları, “rəngli inqilab”ları dəstəkləyən təşkilat, həmçinin qarşıdurmaların əsas maliyyə dəstəkçisi kimi tanıyır. “Soros”un hədəfə aldığı ölkələrdən biri də Azərbaycandır. Doğrudur, onun ölkəmizdə iğtişaş törədəcək qədər gücü və uzun əli olmasa da, fürsət düşən hər məqamda Azərbaycana qarşı öz çirkin kampaniyasını, təxribatçı fəaliyyətini aparmaqda davam edir.
Məsələ ilə bağlı Milli Məclisin Beynəlxalq münasibətlər və parlamentlərarası əlaqələr komitəsinin sədr müavini Azərbaycanın Avropa Şurası Parlament Assambleyasında (AŞPA) nümayəndə heyətinin üzvü Sevinc Fətəliyeva bildirib ki, Soros Fondunun bu cür fəaliyyətinin trayektoriyası ayrı-ayrı qeyri-hökumət təşkilatlarından tutmuş - Avropa Şurası Parlament Assambleyasına qədər uzanır: “Çünki AŞPA-da Soros Fondunun maliyyələşdirdiyi deputatlar var və bu deputatlar vasitəsilə hər fürsətdə ölkəmizi hədəfə almağa cəhdlər edilir. Təbii ki, bütün bunlar da təsadüfi deyil. Soros Fondunun Ermənistan hakimiyyəti ilə sıx əlaqələri var, erməni lobbisi və onun əlaltılarının anti-Azərbaycan və anti-Türkiyə fəaliyyəti fondun rəhbəri C.Sorosun maraqları ilə uzlaşır”.
Millət vəkilinin sözlərinə görə, Soros Fondu yalnız Ermənistan kimi təxribatla məşğul olan ölkələrlə əməkdaşlıq edir: “Soros Fondu Ermənistanda təkcə “medianın inkişafı” adı altında 5 milyon dollardan çox pul xərcləyib. Bu media orqanları da Paşinyanın hakimiyyətə gəlməsində, həmçinin Azərbaycan qarşısında aldığı ağır məğlubiyyətə baxmayaraq, hakimiyyətdə qalmasında müstəsna rol oynayır. Ona görə də bu gün Paşinyan hakimiyyəti bütün mənalarda Soros Fonduna bağlıdır. Təsadüfi deyil ki, onun hakimiyyətə gəlişindən sonra Corc Soros bu ölkəyə daha çox vəsait ayırmağa başladı. Təkcə 2019-cu ildə Soros Fondunun Ermənistana ayırdığı vəsait 3,6 milyon dollar təşkil edib”.
Milli Məclisin deputatı Cavid Osmanov isə bildirib ki, Corc Soros bir çox postsovet ölkəsində məxməri inqilab törətmək üçün səylər göstərib, lakin onun ən uğurlu olduğu ölkə məhz Ermənistandır: “Artıq birmənalı şəkildə deyə bilərik ki, N.Paşinyanın avtoritar idarəçiliyi, vətəndaş cəmiyyətinə, vətəndaşlara qarşı həyata keçirilən basqılar, aksiyaların dağıdılması, onun təşkilatçılarının həbs olunması və s. “Soros demokratiyası”nın iç üzüdür. İkinci Qarabağ müharibəsində ağır məğlubiyyət bu “demokratiya”nı daha da dərinləşdirdi. Ermənistanın dörd bir tərəfini bürüyən etiraz aksiyalarında göz yaşlarına belə baxmadan insanlar həbslər, fiziki təzyiqlər və təhdidlər törədilir. Səsini çıxaran, başını qaldıran hər kəs polis tərəfindən susdurulur, həbsə atılır və yaxud döyülür”.
Millət vəkilinin sözlərinə görə, Ermənistanda hökm sürən dərin “Soros demokratiyası” barədə faktları istənilən qədər uzatmaq olar: “Təbii olaraq, Paşinyan layihəsinin fiaskoya uğramasını istəməyən Soros Fondu hazırda bütün cinayətlərə və iftiralara açıqdır. Ona görə də Azərbaycan hazırda sözügedən fondun hədəfində olan əsas ölkədir. Amma onun ölkəmizə qarşı bütün çirkin kampaniyaları fiaskoya məhkumdur”.
Nardar BAYRAMLI

Paylaş:

Baxılıb: 742 dəfə