ATƏT-in Minsk qrupu qarşıdakı dövrdə öz fəaliyyətini hansı istiqamətdə qura bilər?

Bakı:

24 °C

78 %

8 m/s

Əlaqə

AZ RU EN

Ana səhifə / Siyasət / ATƏT-in Minsk qrupu qarşıdakı dövrdə öz fəaliyyətini hansı istiqamətdə qura bilər?

ATƏT-in Minsk qrupu qarşıdakı dövrdə öz fəaliyyətini hansı istiqamətdə qura bilər?

06.05.2021 [08:23]

44 günlük müharibənin Azərbaycanın mütləq qələbəsi ilə nəticələnməsi, torpaqlarımızın işğaldan azad edilməsi təkcə ölkəmizin ərazi bütövlüyünün bərpası deyil. Bu, eyni zamanda, tarixi ədalətin təmin olunmasıdır. Azərbaycan Dağlıq Qarabağ münaqişəsini həll etməklə həm də BMT Təhlükəsizlik Şurasının müvafiq qətnamələrinin icrasına nail oldu.
Beləliklə, uzun müddət münaqişənin nizamlanması ilə bağlı vasitəçilik missiyasını yerinə yetirmək funksiyası daşıyan ATƏT-in Minsk qrupunun bu istiqamətdə fəaliyyəti nəticəsiz oldu. Ekspertlərin də vurğuladıqları kimi, Azərbaycan məhz öz milli gücü, hərbi-siyasi resursları vasitəsilə münaqişəni həll etdiyinə görə ATƏT-in Minsk qrupunun bu istiqamətdə fəaliyyətinə artıq heç bir əsas və ehtiyac yoxdur.
Yeri gəlmişkən, bu günlərdə Fransanın Yerevandakı səfiri bildirib ki, Fransa və Rusiya prezidentləri telefon danışığı zamanı ATƏT-in Minsk qrupu çərçivəsində yenidən səy göstərməyə dair razılığa gəliblər. Amma qeyd etdiyimiz kimi, münaqişə artıq həll edilib, ATƏT-in Minsk qrupu isə 30 illik fəaliyyəti dövründə heç bir müsbət irəliləyişə nail olmayan qurum kimi yaddaşlara həkk olunub. Bu məqamda onu da vurğulamaq yerinə düşər ki, erməni lobbisinin təsiri altında olan Fransa hakimiyyətinin və parlamentinin ermənipərəst mövqe sərgiləməsi inkaredilməz həqiqətdir. Azərbaycan cəmiyyəti bu ermənipərəst mövqeyin qəbuledilməz olduğunu və heç bir praktiki nəticəyə gətirib çıxarmayacağını qətiyyətlə bəyan edir.
Təbii ki, indi ictimai rəydə müzakirə predmetinə çevrilən məqamlardan biri ATƏT-in Minsk qrupunun bundan sonra hansı funksiyanı yerinə yetirəcəyi məsələsidir. Əlbəttə, bundan sonra həmsədrlərin öz fəaliyyətlərini bölgədə davamlı sülh və təhlükəsizliyin təmin edilməsi, 10 noyabr Bəyanatında nəzərdə tutulmuş tələblərin yerinə yetirilməsi, kommunikasiyaların açılması və digər bir sıra istiqamətlərdə qurmaları daha məqsədəmüvafiq olar.
Bütövlükdə, keçmiş münaqişənin beynəlxalq hüquq normaları əsasında həlli istiqamətində vasitəçilik missiyası iflasa uğrayan ATƏT-in Minsk qrupu postkonflikt dövründə varlığını göstərmək istəyirsə, yeni reallıqları nəzərə almalı, hazırkı gerçəkliklər əsasında perspektivə baxaraq yuxarıda qeyd etdiyimiz məsələlər ətrafında faydalı təklif və təşəbbüslərlə çıxış etməlidir.
Nurlan QƏLƏNDƏRLİ

Paylaş:

Baxılıb: 698 dəfə