Radikal müxalifətin növbəti xəyanəti

Bakı:

27 °C

69 %

7 m/s

Əlaqə

AZ RU EN

Ana səhifə / Siyasət / Radikal müxalifətin növbəti xəyanəti

Radikal müxalifətin növbəti xəyanəti

18.06.2021 [08:50]

AXCP və “Müsavat” Şuşa Bəyannaməsi ilə bağlı siyasi partiyaların birgə bəyanatına qoşulmamaqla bir daha antimilli mövqedə olduqlarını nümayiş etdirdilər
Məlum olduğu kimi, Türkiyə Prezidenti Rəcəb Tayyib Ərdoğan Azərbaycana səfəri çərçivəsində iyunun 15-də Şuşa şəhərində oldu. Azərbaycanın mədəniyyət paytaxtı olan Şuşada iki qardaş ölkə arasında münasibətlərin gələcəyini müəyyən edən müttəfiqlik haqqında Bəyannamə imzalandı. Heç şübhəsiz, Prezident İlham Əliyev və Prezident Rəcəb Tayyib Ərdoğan tərəfindən imzalanmış Şuşa Bəyannaməsi Azərbaycanla Türkiyə arasında əlaqələri ən yüksək səviyyəyə qaldırır. Ekspertlərin vurğuladıqları kimi, Bəyannamədə əksini tapan bütün müddəalar iki qardaş ölkə arasında keyfiyyətcə daha yüksək işbirliyinin təminatıdır. Çünki sənəddə strateji əhəmiyyət kəsb edən bütün əməkdaşlıq istiqamətləri əhatə olunub. Xüsusilə də, Bəyannamədə hərbi sahədə əməkdaşlıq və Zəngəzur dəhlizi ilə bağlı konkret müddəalar əksini tapıb. Beləliklə, iki qardaş ölkə bu Bəyannaməni imzalamaqla təhlükəsizlik məsələlərində də bir-birinə qətiyyətli dəstək nümayiş etdirirlər. Məhz bu səbəbdəndir ki, Azərbaycan cəmiyyəti Şuşa Bəyannaməsinin imzalanmasını tarixi hadisə kimi dəyərləndirir. Bu baxımdan, ölkəmizdə fəaliyyət göstərən 48 siyasi partiyanın birgə bəyanatı xüsusi vurğulanmalıdır. Qeyd edək ki, siyasi partiyalar birgə bəyanatda müstəqillik, suverenlik, ərazi bütövlüyü, beynəlxalq səviyyədə tanınmış sərhədlərin toxunulmazlığı, dövlətlərin daxili işlərinə qarışmamaq prinsiplərini rəhbər tutan, milli maraq və mənafelərini müdafiə və təmin etməyə yönəlmiş müstəqil xarici siyasət həyata keçirən hər iki ölkə tərəfindən müttəfiqlik münasibətlərinin qurulmasının siyasi və hüquqi mexanizmlərini müəyyənləşdirən Şuşa Bəyannaməsinin mühüm tarixi və strateji əhəmiyyət kəsb etdiyini vurğulayıblar.
Bu məqamda bir məsələni təəssüf hissi ilə vurğulamaq yerinə düşər. Belə ki, Şuşa Bəyannaməsinin milli və dövlət maraqlarına tam cavab verməsinə rəğmən, AXCP və “Müsavat” Partiyası yenə də siyasi partiyaların birgə bəyanatına qoşulmayıblar. Bu fakt onların bir daha antimilli mövqedə olduqlarının, Azərbaycanla Türkiyəyə qarşı fəaliyyət göstərən xarici ermənipərəst mərkəzlərdən aldıqları sifarişləri yerinə yetirdiklərinin göstəricisidir. Xatırladaq ki, ötən il sentyabrın 27-də Vətən müharibəsi başlayan zaman da hər iki partiya ölkədə fəaliyyət göstərən siyasi partiyaların Ali Baş Komandana və ordumuza dəstək xarakteri daşıyan birgə bəyanatına qoşulmamışdı. Həmin vaxt AXCP və “Müsavat” cəmiyyətimizdə ciddi qınaq obyektinə çevrilmişdilər. Onların Şuşa Bəyannaməsi ilə bağlı siyasi partiyaların birgə bəyanatına qoşulmaması isə bir daha bu iki partiyanın antimilli, xəyanətkar mövqedə olduğunu nümayiş etdirir. Yəni bu partiyalar üçün Vətən, milli maraqlar anlayışı mövcud deyil.
Yəqin ki, onlar Azərbaycanla Türkiyə arasında Şuşa Bəyannaməsi kimi tarixi sənədin imzalanmasından dərin məyusluq keçirirlər. Çünki bu sənəd dövlətimizin regionda mövqelərini daha da gücləndirir, Azərbaycanın qarşısında yeni strateji perspektivlər açır. Bir sözlə, görünən odur ki, AXCP ilə “Müsavat” xaricdəki ermənipərəst dairələrin diktəsi ilə hərəkət edirlər. Məhz bu səbəbdəndir ki, Azərbaycan xalqı və cəmiyyəti onların milli maraqlara zidd mövqeyini ikrah hissi ilə qarşılayır.
Nardar BAYRAMLI

Paylaş:

Baxılıb: 730 dəfə