Radikal müxalifətin xaos arzusu

Bakı:

30 °C

49 %

2 m/s

Əlaqə

AZ RU EN

Ana səhifə / Siyasət / Radikal müxalifətin xaos arzusu

Radikal müxalifətin xaos arzusu

24.08.2021 [09:51]

Yaxud ac toyuq yuxusunda darı görər

Ölkəmizdə müasir çağırışlara cavab verən və milli maraqlara əsaslanan siyasətin həyata keçirilməsi nəticəsində sabitlik və milli birlik yüksək səviyyədə təmin olunub. Vurğulamaq lazımdır ki, məhz ictimai-siyasi sabitlik və milli həmrəylik amili müstəqil Azərbaycanın regionun aparıcı aktoruna çevrilməsində, mühüm tarixi nailiyyətlər əldə etməsində, 44 günlük Vətən müharibəsində möhtəşəm tarixi qələbə qazanmasında əhəmiyyətli rol oynayıb.

Bu reallıqlar isə anti-Azərbaycan və ermənipərəst dairələri, o cümlədən ölkə daxilində “beşinci kolon” funksiyasını yerinə yetirən radikal müxalifət düşərgəsini ciddi şəkildə narahat etməkdədir. Yeri gəlmişkən, dağıdıcı ünsürlər sosial şəbəkələrdəki paylaşımları ilə dünyanın ayrı-ayrı ölkələrində baş verən xaosun, siyasi qarşıdurmaların Azərbaycana transfer olunmasını arzuladıqlarını göstərirlər. Görünən budur ki, fəaliyyətlərinin əsasını dağıdıcılıq təşkil edən radikal düşərgə təmsilçiləri yenidən vaxtilə ölkədə yaratdıqları özbaşınalıq, xaos, anarxiya və qarşıdurma arzusundadırlar.

Məsələ ilə bağlı fikirlərini bölüşən Milli Məclisin deputatı İlham Məmmədov bildirib ki, milli həmrəylik amili 44 günlük Vətən müharibəsində qələbənin əldə olunmasında mühüm rol oynadı: “Ümumiyyətlə, həm ictimai-siyasi sabitlik, həm də xalq-iqtidar birliyi Azərbaycanın mühüm uğurlar qazanmasını şərtləndirir. Dağıdıcı müxalifət isə özünü milli həmrəylikdən və siyasi birlikdən kənarda tutaraq bu gün də xəyanətkar mövqeyindən əl çəkmək istəmir, hansısa xarici ölkələrdə baş verən xaosun Azərbaycanda yaşanmasını istəyir. İstər anti-Azərbaycan dairələr, istərsə də onların əlaltısı olan dağıdıcı düşərgə təmsilçiləri unutmamalıdırlar ki, xalqımız öz dövlətinin, Prezidentinin ətrafında sıx birləşib. Məhz bu amil Azərbaycanın inkişafının və uğurlarının əsas təminatçısıdır. Eləcə də siyasi qüvvələrin mütləq əksəriyyəti bu gün siyasi dialoqu inkişaf etdirmək və milli birliyi qorumaq üçün ümummilli məsələlərdə vahid platformada birləşib. Bütün bunlar isə Azərbaycanın qarşısında yeni perspektivlər açır”.

Milli Məclisin deputatı Ramil Həsən isə bildirib ki, dağıdıcı müxalifət xəyanətkar mövqe sərgiləyir. Antimilli ünsürlərin milli birliyə düşmən kəsilmələrinin əsas səbəblərindən biri onların anti-Azərbaycan dairələrin direktivlərini yerinə yetirmələri, ermənipərəst mərkəzlərə xidmət etmələridir. Yəni birlik nümayiş etdirmək, Vətən, xalq naminə eyni mövqedən çıxış etmək bu düşərgə təmsilçilərinə tamamilə yaddır: “Bu səbəbdəndir ki, dünyanın hansısa ölkəsində qarşıdurma, çəkişmə gördükləri anda onlarda da xaos arzusu baş qaldırır. Əslində, 1990-cı illərin əvvəlinə nəzər saldıqda onların bütün “məziyyət”ləri üzə çıxır. Antimilli ünsürlər vaxtilə Azərbaycanı xaos, anarxiya və qarşıdurma məkanına çevirmişdilər, bu gün isə ölkəmizdəki ictimai-siyasi sabitlikdən narahatdırlar. Qalib Azərbaycan bu gün sabitlik adası, inkişaf məkanıdır. Xalqımız Prezident İlham Əliyevin yürütdüyü siyasəti dəstəkləyir, ölkəmizdə aparılan islahatların nəticələrini yüksək qiymətləndirir. Ona görə də dağıdıcı ünsürlərin bütün cəhdləri fiaskoya məhkumdur”.

Pərviz SADAYOĞLU

Paylaş:

Baxılıb: 590 dəfə