Birləşdirici və qurucu başlanğıc müxalifətə yaddır

Bakı:

26 °C

53 %

6 m/s

Əlaqə

AZ RU EN

Ana səhifə / Siyasət / Birləşdirici və qurucu başlanğıc müxalifətə yaddır

Birləşdirici və qurucu başlanğıc müxalifətə yaddır

22.07.2010 [12:34]

Əli Əhmədov: Parlament seçkilərində hakim partiya üçün çətinliklər yarada biləcək rəqib yoxdur
Yeni Azərbaycan Partiyasının (YAP) Sədr müavini - İcra katibi, millət vəkili Əli Əhmədov “Azərbaycan” qəzetinə müsahibə verib. İcra katibi müsahibəsində Ermənistan-Azərbaycan, Dağlıq Qarabağ münaqişəsinin tənzimlənməsi istiqamətində aparılan danışıqlar, YAP-ın parlament seçkilərinə hazırlığı barədə sualları cavablandırıb.
Millət vəkili Əli Əhmədov müsahibəsində, həmçinin, bildirib ki, parlament seçkilərində hakim partiya üçün çətinliklər yarada biləcək rəqib yoxdur: “Mən bunu YAP-ın gücünün ifadəsi kimi qeyd etmək, YAP-a Azərbaycan seçicilərinin inamının təzahürü kimi vurğulamaq istəyirəm. Təbii ki, bu, eyni zamanda, Azərbaycan müxalifətinin zəifliyinin ifadəsidir. Bu mənada, qarşıdan gələn parlament seçkilərində müxalifətin hər hansı əhəmiyyətli hərəkət etməsini o qədər də inandırıcı hesab etmirəm. Amma mən bu sözlərimin müxalifət partiyalarının qarşıdan gələn parlament seçkilərində iştirakdan imtina etməsi üçün işarə kimi qiymətləndirilməsini də arzu etməzdim. Qeyd etdiyim kimi, istənilən siyasi partiyanın mövcudluğunun əsas şərti və arqumenti onun siyasi proseslərdə və siyasi proseslərin ən aydın təzahür forması olan seçkilərdə iştirakıdır”.
Əli Əhmədovun sözlərinə görə, seçkilərdə iştirak etməyən partiyanın ölkənin həyatında və bütövlükdə həyatda mövcudluğunun mənası qalmır: “Ona görə də müxalifət partiyalarını seçkilərdə fəal iştiraka dəvət edirik. Azərbaycan müxalifəti daxili intriqalar məngənəsində əzilir. Azərbaycan cəmiyyətində müxalifətin hörmətinin və nüfuzunun itməsinin çoxlu sayda səbəbi içərisində bunu xüsusi göstərmək olar. Əslində, deyərdim ki, müxalifətin daxili çəkişmələri və intriqaları onun ictimai-siyasi proseslərdə ciddi şəkildə iştirak etməkdə maraqlı olmamasından xəbər verir. Belə təəssürat yaranır ki, müxalifət partiyaları ölkənin ictimai-siyasi həyatında iştirak edib, hər hansı pozitiv mövqe ortaya qoymaqdan daha çox daxili intriqalarla məşğul olmağa meyillidirlər”.
Əli Əhmədov bildirib ki, müxalifətin onsuz da az olan gücü və resursu özlərinin daxili problemlərini həll etməyə yönəlir: “Birləşdirici və qurucu başlanğıc onlara yaddır. Bu çəkişmələr, didişmələr müxalifətin az olan gücünü daha da azaldır”.
Qeyd edək ki, Azərbaycanda parlament seçkilərinin noyabrın əvvəlində keçirilməsi nəzərdə tutulur.

Paylaş:

Baxılıb: 1100 dəfə