Nüvə müharibəsi olarsa...

Bakı:

21 °C

56 %

1 m/s

Əlaqə

AZ RU EN

Ana səhifə / Siyasət / Nüvə müharibəsi olarsa...

Nüvə müharibəsi olarsa...

02.03.2022 [10:33]

Bu kütləvi qırğın silahından istifadə böyük fəlakətlərə yol aça bilər

Rusiya ilə Ukrayna arasında baş verən hərbi toqquşmalar bəşəriyyət üçün ən böyük təhdidlərdən birini - nüvə silahından istifadə təhlükəsini aktuallaşdırdı. Bir müddət öncə, Rusiya prezidenti V.Putinin ölkəsinin “nüvə dövləti” olmasını xatırlatması ilə başlanan “nüvə ritorikası” ABŞ üçün gözlənilməz deyilmiş. Sanki bu təhdidi gözləyirmiş kimi ABŞ dövlət başçısı C.Bayden də “buna hazırıq” cavabını səsləndirdi. Nəticə isə, acınacaqlı və fəlakətli ola bilər.

Pərviz Sadayoğlu

Sonuncu dəfə ötən əsrin birinci yarısında gündoğar Yaponiyada istifadə olunan və kütləvi qırğın silahı statusu almış nüvə silahının müasir dövrümüzdə istifadəsi nə qədər realdır? Ümumiyyətlə, nüvə silahından istifadənin mexanizmi necədir? Hər bir ölkə ən xırda insidentdə belə “nüvə təhdidi” səsləndirə və ya ondan istifadəyə əl ata bilərmi?

Bununla bağlı fikirlərini qəzetimizə bölüşən hərbi ekspert Üzeyir Cəfərov bildirib ki, Rusiya və ABŞ dünyanın iki aparıcı nüvə dövləti sayılır. Hazırda Rusiyanın 7500, ABŞ-ın isə 3 mindən çox nüvə başlıqlı raketi mövcuddur. Bu qədər nüvə başlıqlı raket isə dünyanın sonu deməkdir. Ü.Cəfərov bildirib ki, Avropa ölkələrinin də bəziləri nüvə silahına sahibdirlər. Amma onların sayı elə də çox deyil. Bir sözlə, Qərb dünyasının ümumilikdə “nüvə ehtiyatı” Rusiyadan azdır: “Bu raketlərin hər hansı bir əraziyə atılması isə böyükmiqyaslı dağıntılara, xeyli insan tələfatına səbəb ola bilər. İndiki halda Rusiyanın heç bir zərurət olmadan nüvə silahından istifadə ilə bağlı bəyanatı bütün dünyanı narahat edir. Nəzərə alınmalıdır ki, hərbi əməliyyatlar Ukrayna ərazisində aparılır, Rusiya əraziləri üçün hər hansı bir təhdid və ya təhlükə mövcud deyil. Fikrimcə, hətta Rusiya prezidenti belə bir qərar verəcəksə, hərbçilər onu yerinə yetirməyəcəklər”.

Hərbi ekspertin sözlərinə görə, nüvə silahının işə salınması bir neçə mərhələdən ibarətdir. Bunun üçün prezident və ya ali baş komandan müdafiə nazirinə göstəriş verməli, müdafiə naziri isə həmin göstərişi Komanda İdarəetmə Məntəqəsinə (KİM) çatdırmalıdır. “KİM isə həmin əmri və hədəfləri dəqiqləşdirir. Daha sonra raketlər hazır vəziyyətə gətirilir. Nüvə silahı əmr verilən anda atıla bilməz, bunun üçün zaman lazımdır. Ən azından dəqiqləşdirmək və hədəfi müəyyənləşdirmək üçün zaman gərəkir” - deyən Ü.Cəfərov onu da əlavə edib ki, nüvə raketləri müxtəlif mənzilli məsafələrə bölünür. Məsələn, əgər Rusiya ABŞ-ı “atomla” vurmaq istəsə bunun üçün Sakit və ya Şimal Buzlu Okeanın müvafiq akvatoriyalarında saxladığı sualtı qayıqlardakı nüvə silahından istifadə etməlidir. ABŞ-ın da Moskvaya müvafiq məsafədə nüvə raketlərinin olması istisna edilmir. Ü.Cəfərovun sözlərinə görə, böyük dövlətlərin dənizlərdə, okeanlarda saxladığı sualtı qayıqlar məhz bu məqsədlərə xidmət edir: “Rusiyanın bu addımı ata biləcəyini istisna edirəm. Nüvə başlıqlı raketlərin işlədilməsi Ukraynadan əlavə Krıma, Belarusa, elə Rusiyanın özünə böyük ziyan gətirəcək”.

Paylaş:

Baxılıb: 1211 dəfə