İkitərəfli əlaqələrin ruhuna zidd addım

Bakı:

23 °C

48 %

1 m/s

Əlaqə

AZ RU EN

Ana səhifə / Siyasət / İkitərəfli əlaqələrin ruhuna zidd addım

İkitərəfli əlaqələrin ruhuna zidd addım

10.03.2022 [10:58]

Rəsmi Kreml Azərbaycanın ərazi bütövlüyünü və suverenliyini tanıyır

Pərviz SADAYOĞLU

Rusiya Federasiyası Müdafiə Nazirliyi tərəfindən Ukraynaya göndərilən humanitar yardım kontekstində verilmiş açıqlamada “Dağlıq Qarabağ” ifadəsinin işlədilməsi qəbuledilməzdir. Bu barədə Azərbaycanın Müdafiə Nazirliyi məlumat yayıb. Məlumatda bildirilib ki, Azərbaycan Respublikasının ərazisində “Dağlıq Qarabağ” adlı inzibati-ərazi vahidi yoxdur. Rusiya Federasiyası tərəfindən dəfələrlə ali və yüksək səviyyələrdə verilmiş açıqlamalarda Azərbaycanın ərazi bütövlüyü, suverenliyi və sərhədlərinin toxunulmazlığına dəstək təsdiq edilmişdir. “Eyni zamanda iki ölkə arasında imzalanmış müvafiq sənədlərdə də bu mövqe bir daha təsbit olunmuşdur. Rusiya Federasiyasının rəsmi mövqeyinə zidd olaraq, bundan əvvəl də Rusiya Federasiyası Müdafiə Nazirliyinin rəsmi açıqlamalarında Azərbaycanın suveren ərazilərinə bu adla müraciət edilməsi halları müşahidə olunmuşdur”, - deyə məlumatda vurğulanır. O da qeyd edilib ki, bu kimi açıqlamalar Azərbaycan-Rusiya əlaqələrinə xələl gətirə və Rusiya sülhməramlı qüvvələrinin müvəqqəti olaraq yerləşdirildiyi Azərbaycan əraziləri boyunca vəziyyətin gərginləşməsinə səbəb ola bilər: “Azərbaycan Respublikasının Müdafiə Nazirliyi Rusiya Federasiyasının Müdafiə Nazirliyini ölkəmizin suveren ərazilərinə Azərbaycan Respublikasında mövcud olmayan inzibati-ərazi vahidləri adı altında müraciət edilməsi təcrübəsinin dayandırılmasına çağırır”.

Məsələ ilə bağlı fikirlərini bölüşən Milli Məclisin Azərbaycan-Rusiya parlamentlərarası əlaqələr üzrə işçi qrupunun üzvü Azər Badamov bildirib ki, 2020-ci ildə baş vermiş Vətən müharibəsində əldə olunan qələbə 30 ilə yaxın davam etmiş Ermənistan - Azərbaycan Dağlıq Qarabağ münaqişəsini yekunlaşdırdı. Azərbaycanın öz ərazi bütövlüyünü təmin etməsi ilə də Dağlıq Qarabağ münaqişəsi tarixə qovuşdu. A.Badamov qeyd edib ki, Azərbaycanda rəsmi şəkildə “Dağlıq Qarabağ” adlı ərazi vahidi mövcud deyil. Rusiya Müdafiə Nazirliyinin bu ifadəni işlətməsi qəbuledilməzdir: “İstər Vətən müharibəsindən sonra Rusiya və Azərbaycan prezidentləri, Ermənistanın baş naziri tərəfindən imzalanan üçtərəfli bəyanatlarda, istərsə də Rusiya ilə Azərbaycan arasında bu il fevralın 22-də imzalanmış Moskva bəyannaməsində rəsmi Kreml Azərbaycanın ərazi bütövlüyünü tanıyır. Sözügedən sonuncu müttəfiqlik barədə bəyannamənin birinci bəndində bu məsələ öz təsdiqini tapır. Bu sənədlər Cənubi Qafqazda davamlı sülhə nail olunması, təhlükəsizliyin təmini yönündə olduqca mühüm addımlardır. Bu gün Azərbaycan ilə Rusiya arasında çoxşaxəli əlaqələr mövcuddur. Diplomatik, iqtisadi, mədəni, ümumilikdə bütün sahələr üzrə əməkdaşlıq əlaqələri gücləndirilməkdədir. Prezident İlham Əliyevin Rusiyaya son səfəri zamanı bu əlaqələrin daha da inkişaf etdirilməsi məsələsi müzakirə edildi. Belə olan halda Rusiya müdafiə nazirliyinin öz açıqlamasında Azərbaycanda mövcud olmayan bir ərazi vahidindən bəhs açmasını yersiz və ikitərəfli əlaqələrin ruhuna zidd olduğunu düşünürəm”.

Millət vəkili onu da vurğulayıb ki, 2020-ci il noyabrın 10-da imzalanan üçtərəfli bəyanat regionda yeni siyasi-iqtisadi reallıqlar yaradıb. Bu reallıqların ən mühüm amillərindən biri isə Azərbaycanın öz ərazi bütövlüyünü təmin etməsidir. Bunu Ermənistan da daxil olmaqla bütün dünya qəbul edir.

Paylaş:

Baxılıb: 650 dəfə