Şuşa Bəyannaməsi istənilən vaxt icra oluna bilər!

Bakı:

20 °C

88 %

0 m/s

Əlaqə

AZ RU EN

Ana səhifə / Siyasət / Şuşa Bəyannaməsi istənilən vaxt icra oluna bilər!

Şuşa Bəyannaməsi istənilən vaxt icra oluna bilər!

13.04.2022 [09:25]

Ərazi bütövlüyünə və suverenliyə qarşı təhdidlərin qarşısını almaq üçün

ÜMİD

Cənubi Qafqazda sülh və sabitlik-təhlükəsizlik mühitinin təmin olunması diqqət mərkəzindədir. Bu səpkidə Azərbaycanla Ermənistan arasında münasibətlərin tənzimlənməsi ilə əlaqədar məsələlər müxtəlif səviyyələrdə müzakirə olunur. Vurğulanır ki, ilk növbədə, 10 noyabr 2020-ci il tarixli üçtərəfli Bəyanatın bütün tələbləri qeyd-şərtsiz yerinə yetirilməlidir. Xüsusilə də, 4-cü bənddə əksini tapmış “erməni silahlı qüvvələrinin çıxarılması” məsələsində. Azərbaycan bu istiqamətdə qəti - birmənalı mövqe sərgiləyir. Amma təəssüflər olsun ki, qarşı tərəf müəyyən sabotaj və təxribatlara yol verir. Özəlliklə də, Rusiya sülhməramlılarının müvəqqəti nəzarət və məsuliyyət zonasında tez-tez qeyri-qanuni hərəkətlər baş verir, beynəlxalq hüquq normalarına və üçtərəfli Bəyanatın tələblərinə zidd hallar müşahidə olunur. Bu, təbii ki, Azərbaycan ictimaiyyəti tərəfindən ciddi narazılıqla qarşılanır.

Əlbəttə, Azərbaycan dövləti öz prinsipial mövqeyini ortaya qoyur, qəti xəbərdarlıq edir. Siyasi ekspertlər isə qeyd edirlər ki, belə hərəkətlərə davamlı olaraq yol veriləcəyi halda, Azərbaycan antiterror əməliyyatı keçirə, öz ərazisində təhlükəsizliyi təmin edə bilər. Eyni zamanda, ölkəmizin ərazi bütövlüyünə və suverenliyinə təhdid yaranacağı təqdirdə, Şuşa Bəyannaməsindən irəli gələn məsələlər çərçivəsində hərbi-siyasi tədbirlər həyata keçirilə bilər.

Şuşa Bəyannaməsinin imzalanması və təsdiq olunması ilə Azərbaycan və Türkiyə yeni hərbi-siyasi təhlükəsizlik çətiri formalaşdırıb. Bu, təhdidlərə qarşı birgə mübarizə mexanizminin yaradılmasıdır. Sənəddə müharibədən sonrakı mərhələdə Qafqaz regionunda sabitliyin, təhlükəsizliyin möhkəmləndirilməsi, uzunmüddətli sülhün təmin edilməsi istiqamətində birgə səylərin artırılmasının zəruriliyi də vurğulanıb. Eyni zamanda, bundan sonrakı mərhələdə müştərək milli mənafelər baxımından siyasi, hərbi, təhlükəsizlik sahələrində əlaqələndirilmiş və birgə fəaliyyətlərin təşviq edilməsi xüsusi aktuallıq daşıyır. Bəyannamədə müdafiə məsələlərinin əks olunması isə elə hərbi-siyasi təhlükəsizliyin təmin olunmasına - istənilən təhdidin qarşısının alınmasına hesablanıb. Sənəddə qeyd edilir: “Tərəflərdən hər hansı birinin fikrincə, onun müstəqilliyinə, suverenliyinə, ərazi bütövlüyünə, beynəlxalq səviyyədə tanınmış sərhədlərinin toxunulmazlığına və ya təhlükəsizliyinə qarşı üçüncü dövlət və ya dövlətlər tərəfindən təhdid və ya təcavüz edildiyi təqdirdə, Tərəflər birgə məsləhətləşmələr aparacaq və bu təhdid və ya təcavüzün aradan qaldırılması məqsədilə BMT Nizamnaməsinin məqsəd və prinsiplərinə müvafiq təşəbbüs həyata keçirəcək, bir-birinə BMT Nizamnaməsinə uyğun zəruri yardım göstərəcəklər. Bu yardımın həcmi və forması təxirə salınmadan keçirilən müzakirələr yolu ilə müəyyən edilərək birgə tədbirlər görülməsi üçün müdafiə ehtiyaclarının ödənilməsinə qərar veriləcək və Silahlı Qüvvələrin güc və idarəetmə strukturlarının əlaqələndirilmiş fəaliyyəti təşkil olunacaqdır”.

Beləliklə, Azərbaycan və Türkiyə milli maraqların tələb, siyasi situasiyanın isə diktə edəcəyi təqdirdə, Şuşa Bəyannaməsindən irəli gələn vəzifələri qətiyyətlə yerinə yetirəcəklər. Bu, təhdidlərin qarşısını birlikdə almaq iradəsinin nümayişidir. Ona görə də regionda sülhə, sabitliyə təhdid yaradan hal və hərəkətlərə yol verilməməli, beynəlxalq hüquq normalarına və üçtərəfli Bəyanatın tələblərinə - öhdəliklərinə uyğun davranılmalıdır!

Paylaş:

Baxılıb: 1454 dəfə