ATƏT-in Parlament Assambleyası Ermənistanın işğalçı dövlət olması barədə sənəd qəbul etməlidir

Bakı:

10 °C

87 %

3 m/s

Əlaqə

AZ RU EN

Ana səhifə / Siyasət / ATƏT-in Parlament Assambleyası Ermənistanın işğalçı dövlət olması barədə sənəd qəbul etməlidir

ATƏT-in Parlament Assambleyası Ermənistanın işğalçı dövlət olması barədə sənəd qəbul etməlidir

11.01.2011 [09:10]

Eldar İbrahimov: Qurumun Dağlıq Qarabağ münaqişəsi üzrə yeni məruzəçisi vəzifəsinə obyektiv şəxsin təyin olunmasını istəyirik
ATƏT-in Parlament Assambleyasının Dağlıq Qarabağ münaqişəsi üzrə xüsusi nümayəndəsi Qoran Lenmarkerin səlahiyyət müddəti başa çatıb. ATƏT PA-nın qış sessiyasına qədər bu vəzifəyə yeni təyinat öz həllini tapa bilər. Bu barədə Azərbaycanın ATƏT PA-da nümayəndə heyəti rəhbərinin müavini, Milli Məclisin Aqrar siyasət komitəsinin sədri Eldar İbrahimov məlumat verib.
E.İbrahimov bildirib ki, Azərbaycan tərəfi bu vəzifəyə təyin olunacaq şəxsin ədalətli, obyektiv olmasını istəyir: “Kim olursa-olsun, bu şəxs həqiqəti ortaya qoymalıdır və ATƏT PA nəhayət, Ermənistanın işğalçı bir dövlət, Dağlıq Qarabağın bir separatçı rejim kimi tanınması barədə qərar qəbul etməlidir. Doğrudur, vaxtilə Şotlandiyada Edinburq qətnaməsində, sonra Ukraynada Kiyev qətnaməsində və digər qətnamələrdə bu məsələ öz əksini tapıb, Ermənistanın Azərbaycan torpaqlarını işğal etməsi vurğulanıb, ancaq bununla əlaqədar ayrıca qətnamə qəbul edilməyib. Məsələn, Avropa Şurası Parlament Assambleyası, İslam Konfransı Təşkilatı Parlament İttifaqı və yaxud Avropa Parlamenti, o cümlədən, BMT Təhlükəsizlik Şurası bu yöndə ayrıca qətnamələr qəbul etsə də, münaqişənin tənzimlənməsilə birbaşa məşğul olan bir qurumun Parlament Assambleyası konkret sənəd qəbul etməyib. Bu, çox təəssüfləndiricidir”.
E.İbrahimov qeyd edib ki, ATƏT PA-nın elə bir sessiyası, konfransı yoxdur ki, millət vəkillərimiz bu məsələ ilə bağlı çıxış etməsin, bu yöndə fikirlərini səsləndirməsinlər. “Ancaq əfsuslar olsun ki, ortada konkret bir nəticə yoxdur. Açığını deyim ki, əslində Lenmarkerin bu məsələ ilə bağlı hazırladığı məruzə hazır vəziyyətdə idi, hər il də regiona gələndə deyirdi ki, “qızıl imkan”lar var, bundan istifadə etmək lazımdır və s. Onu deyəndə də bizim onunla həm mülayim, həm kəskin söhbətlərimiz, diskussiyalarımız baş verirdi. Biz hər dəfə də deyirdik ki, niyə bu məsələni gündəliyə çıxarmır və ya çıxarmaq üçün lazımi səylər göstərmir? O isə deyirdi ki, bu məsələ ilə ATƏT-in Minsk qrupu və həmsədrlər institutu məşğul olur. Onu da demək istəyirəm ki, gələcəkdə Lenmarkeri əvəzləyəcək şəxs elə ədalətli və hörmətli şəxs olmalıdır ki, ATƏT üzvü olan 56 dövlətin parlamentarilərini bu məsələdə inandıra, onların dəstəyini qazanıb, sözügedən məruzənin Assambleyanın gündəliyinə salınmasına və müzakirə edilərək qəbul olunmasına nail ola bilsin. Bunun özü də çox çətin prosedurdur. Təbii ki, orada bizi də müdafiə edənlər çoxdur, Ermənistanı da. Amma məsələni müzakirəyə təqdim edən insandan, məruzəçidən də çox şey asılıdır”.
E.İbrahimovun bildirdiyinə görə, yeni məruzəçinin kim olacağı hələlik bilinmir. Onun sözlərinə görə, əgər yeni şəxs Lenmarkerdən fərqli olaraq daha obyektiv, bu məsələnin üzərində dayanıb, ədaləti bərpa edən insan olsa, əlbəttə, ondan müsbət fəaliyyət gözləmək olar. Yox əgər, bu insan da Lenmarkerin yolu ilə getsə, o zaman ondan da müsbət nəsə gözləməyinə dəyməz. “Düzünə qalsa, Lenmarker də, ATƏT PA-dakılar da, yeni təyin olunan şəxs də əslində ATƏT-in Minsk qrupunun həmsədr olan ölkələrinin fikirlərini əsas götürürlər. Yəni, bu məsələ ATƏT-də, onun Parlament Assambleyasında söz sahibi olan dövlətlərdən daha çox asılıdır. Demək istəyirəm ki, istər Qarabağ məsələsilə bağlı məsələnin müzakirəsi, istərsə də bu problemin dinc danışıqlar yolu ilə həlli çox çətin bir məsələdir. Bu, bəlkə də, kənardakılara asan gələ bilər, ancaq bu məsələnin həlli göründüyündən də qat-qat çətindir”-deyə, E.İbrahimov vurğulayıb.
Komitə sədri qeyd edib ki, hər bir azərbaycanlı torpaqlarımızı işğaldan azad etmək üçün əlinə silah götürməyə hazırdır: “Biz torpaqlarımızı nəyin bahasına olursa-olsun, azad etməliyik. Təbii ki, 2011-ci ildə də çalışacağıq ki, bu məsələ sülh yolu ilə həll olunsun. Əgər sülh yolu ilə həll olunmasa, biz daha nə qədər gözləməliyik? Artıq hamımızın səbri tükənib. Ona görə, bu durumda müharibə variantı istisna deyil, hətta, qaçılmazdır. Biz gec-tez torpaqlarımızı geri qaytarmalıyıq, buna beynəlxalq hüquq normaları da tam imkan verir”.
Nardar BAYRAMLI

Paylaş:

Baxılıb: 957 dəfə