Korrupsiyaya qarşı mübarizə davamlı xarakter daşıyır

Bakı:

24 °C

66 %

3 m/s

Əlaqə

AZ RU EN

Ana səhifə / Siyasət / Korrupsiyaya qarşı mübarizə davamlı xarakter daşıyır

Korrupsiyaya qarşı mübarizə davamlı xarakter daşıyır

12.02.2011 [09:23]

Millət vəkilləri Azərbaycanda aparılan korrupsiyaya qarşı mübarizə tədbirlərini təqdir edirlər
Milli Məclisin dünən keçirilən iclasında millət vəkilləri ölkədə aparılan korrupsiyaya qarşı mübarizə tədbirləri haqqında fikirlərini bildiriblər.
BAXCP sədri Qüdrət Həsənquliyev deyib ki, korrupsiya ilə mübarizə sahəsində atılan addımlar və Azərbaycan Prezidentinin bu məsələdə mövqeyi əhali tərəfindən müsbət qarşılanır. Bu cür addımların təqdir olunmasının vacibliyinə toxunan millət vəkili bildirib ki, Milli Məclisdə bu sahədə fəaliyyət göstərən dövlət strukturlarının nümayəndələrinin iştirakı ilə müzakirənin aparılmasına ehtiyac var.
BQP sədri Fazil Mustafa da deputat həmkarlarının təklifini dəstəkləyib.
Millət vəkili Fuad Muradov isə deyib ki, ölkəmizdə korrupsiyaya qarşı mübarizə həmişə həyata keçirilir: “Burada hansısa xarici və ya daxili təzyiqlərdən söhbət gedə bilməz”.
Milli Məclisin Hüquq siyasəti və dövlət quruculuğu komitəsinin sədri Əli Hüseynli bildirib ki, Azərbaycanın inkişafı istiqamətində həyata keçirilən islahatlar davamlı xarakter daşıyır. Onun sözlərinə görə, əsas məqsədimiz dövlət başçısının vurğuladığı kimi, Azərbaycanı inkişaf etmiş ölkələr sırasına çıxarmaqdır. Ə.Hüseynli deyib ki, Azərbaycan hakimiyyətinin həyata keçirdiyi islahatlar xalqın rifahının yüksəlməsinə xidmət edir. Korrupsiyaya qarşı mübarizənin yeni mərhələsi də ölkəmizin inkişaf etmiş dövlətlər sırasına çıxarılması ilə bağlıdır. “ölkəmizin hər bir sahədə potensialı var. Ona görə də, inkişaf etmiş ölkələrin sırasına daxil olmaq imkanlarımız mövcuddur” - deyə, o, vurğulayıb.
Komitə sədri qeyd edib ki, bu prosesdə korrupsiyanın bizim inkişafımıza vurduğu zərbələri minimuma endirmək məqsədi çox ciddidir. Korrupsiyaya qarşı ciddi qanunvericilik bazasının da olduğunu deyən Ə.Hüseynlinin fikrincə, bu mübarizədə ictimai fəallıq da geniş şəkildə olmalıdır. Bəzi millət vəkillərinin Korrupsiyaya Qarşı Mübarizə üzrə Komissiyanın tərkibi ilə bağlı təkliflərinə gəlincə, komitə sədri qeyd edib ki, komissiya hakimiyyətin bütün qollarını özündə ehtiva edir və bu çox vacib amildir.
Məsələ ilə bağlı jurnalistlərə açıqlama verən vitse-spiker Bahar Muradova isə bildirib ki, korrupsiyaya qarşı mübarizə Azərbaycanın gələcək perspektivinə hesablanmış dövlət proqramlarına uyğun həyata keçirilir və burada qeyri-adi heç nə axtarmaq lazım deyil. O bildirib ki, Azərbaycanda korrupsiyaya qarşı aparılan mübarizənin ərəb ölkələrində baş verən hadisələrlə heç bir əlaqəsi yoxdur: “Bunun nə Tunislə, nə də Misirlə heç bir əlaqəsi yoxdur. Azərbaycanda hər zaman elə adamlar tapılır ki, dünyanın hansısa ölkəsində baş verən hadisələri ölkəmizə gətirmək istəyir, yaxud da həmin hadisələrin burada rezonans doğuracağı barədə proqnozlar verirlər. Onlar, eyni zamanda, Azərbaycanın atdığı hansısa addımları həmin hadisələrlə əlaqələndirmək istəyirlər. Belə proqnozların heç biri özünü doğrultmayıb. Bu, müxalifətin mövqeyidir və real deyil”.
B.Muradovanın sözlərinə görə, dövlət başçısı korrupsiya mövzusunda son çıxışından əvvəl də dəfələrlə mövqeyini ifadə edib, tapşırıqlarını verib və müvafiq qurumlarda bu istiqamətdə işlər aparılıb: “Amma dövlət başçısı məsələni daha kəskin, daha konkret qoyduqdan sonra məlumatlar daha açıq, şəffaf şəkildə cəmiyyətə çatdırılmağa başlanıb. İctimaiyyətin bu məsələyə dəstək verməsi hər zaman arzuolunandır”.
Məsələyə Milli Məclisin sədri Oqtay Əsədov da münasibət bildirib. O, vurğulayıb ki, Azərbaycanda uğurlu islahatlar davam etdiriləcək: “Prezident İlham Əliyev islahatların dərinləşməsi istiqamətində daim öz tövsiyələrini verir. Gələcəkdə də bu siyasət davam etdiriləcək və biz bu istiqamətdə hərəkət edəcəyik”.

Paylaş:

Baxılıb: 1045 dəfə