Görkəmli kimyaçı alim, akademik İzzət Orucovanın 100 illiyinə həsr olunmuş müsabiqəyə yekun vurulub

Bakı:

14 °C

94 %

9 m/s

AZ RU EN

Ana səhifə / Siyasət / Görkəmli kimyaçı alim, akademik İzzət Orucovanın 100 illiyinə həsr olunmuş müsabiqəyə yekun vurulub

Görkəmli kimyaçı alim, akademik İzzət Orucovanın 100 illiyinə həsr olunmuş müsabiqəyə yekun vurulub

30.04.2011 [09:50]

Ailə, Qadın və Uşaq Problemləri üzrə Dövlət Komitəsi (AQUPDK) tərəfindən görkəmli kimyaçı alim, akademik İzzət Orucovanın anadan olmasının 100 illiyinə həsr olunmuş “Gənc tədqiqatçıların kimya sahəsində ən yaxşı elmi araşdırmaları” mövzusunda keçirilən müsabiqəyə yekun vurulub. Aprelin 28-də keçirilən mükafatlandırma mərasimində Milli Məclisin deputatları, dövlət qurumlarının nümayəndələri, alimlər iştirak ediblər.
AQUPDK-nın sədri Hicran Hüseynova ölkədə elm və elmi fəaliyyət üçün geniş imkanların yaradıldığını bildirib, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın elmin, mədəniyyətin, təhsilin inkişafına, alimlərimizin ictimai həyatda aktiv rolunun təmin edilməsinə diqqətini nəzərə çarpdırıb.
İzzət Orucovanın həyat və yaradıcılığından danışan komitə sədri bildirib ki, o, böyük alim və pedaqoq olmaqla yanaşı, həm də yüksək mənəvi keyfiyyətlərə malik bir insan idi. İ.Orucova respublikanın Əməkdar elm və texnika xadimi, Azərbaycan Dövlət mükafatı laureatı idi. O, mədəniyyət tariximizə ekranda azərbaycanlı qadının obrazını yaratmış ilk kino aktrisası kimi daxil olub.
Müsabiqənin təşəbbüskarı, M.Lomonosov adına Moskva Dövlət Universitetinin Bakı filialının rektoru, professor Nərgiz Paşayeva tədbirin əhəmiyyətindən danışıb. Bildirib ki, belə tədbirlərin əsas məqsədi gənc nəsl arasında fundamental elmlərə marağın artırılmasıdır. N.Paşayeva deyib ki, müsabiqənin məhz İzzət Orucovanın 100 illik yubileyinə həsr edilməsi təsadüfi deyil. Kimya elminin inkişafına töhfələrini verən məşhur kimyaçı İzzət Orucovanın yüksək ixtisaslı kadrlar hazırlanmasında müstəsna xidmətləri olub. Alim aşqarlar kimyası və texnologiyasının əsasını qoyan və inkişaf etdirənlərdən biri olub.
Bakı Dövlət Universitetinin (BDU) rektoru, akademik, millət vəkili Abel Məhərrəmov İzzət Orucovanın elmi fəaliyyətindən söhbət açıb. Bildirib ki, alimin elmi-tədqiqat işlərinin əsas obyekti müasir neft kimyasının ən mühüm problemləri olub. İzzət Orucovanın hələ 1962-ci ildə müdafiə etdiyi doktorluq işi Azərbaycan qadınının neft kimyası elmində fəth etdiyi ən yüksək zirvə idi. A.Məhərrəmov “Beynəlxalq Kimya ili” çərçivəsində BDU-da “Azərbaycanın kimyaçı qadınları: problemlər, perspektivlər” mövzusunda geniş bir tədbirin keçirildiyini də diqqətə çatdırıb.
Akademik Vaqif Fərzəliyev bu müsabiqənin məhz istedadlı gənc alimlər arasında yaradıcılıq yarışına təkan verəcəyini söyləyib. İ.Orucova elmi yaradıcılıq sahəsində məhsuldar fəaliyyət göstərməklə yanaşı, gənc alimlərə daim qayğı ilə yanaşıb, onların elmi araşdırmalarına dəstək verib. Yüksək ixtisaslı kadrların hazırlanmasında onun müstəsna xidmətləri olub.
Kimya elmləri doktoru Sevinc Hacıyeva diqqətə çatdırıb ki, İzzət Orucovanın fəaliyyəti əvvəlcə incəsənətlə bağlı olub. Böyük dramaturqumuz Cəfər Cabbarlının pyesləri əsasında çəkilmiş filmlərdə o, yaddaqalan obrazlar - Sevil və Almaz surətlərini məharətlə yaradıb.
Ombudsman Elmira Süleymanova İzzət Orucovanın elmi uğurlarından danışıb.
Sonda müsabiqənin qaliblərinə mükafatlar təqdim olunub. Birinci yerə BDU-nun dissertantı Fidan Bəhmənova, ikinci yerə Azərbaycan Dövlət Neft Akademiyasının əməkdaşı İradə Xələfova, üçüncü yerə isə BDU-nun dosenti Mehparə Adıgözəlova layiq görülüblər.

Paylaş:

Baxılıb: 1033 dəfə