Gözlənilməzliyə hazır olun!

Bakı:

24 °C

44 %

5 m/s

Əlaqə

AZ RU EN

Ana səhifə / Sosial / Gözlənilməzliyə hazır olun!

Gözlənilməzliyə hazır olun!

07.06.2024 [10:51]

Ümumdünya Qida Təhlükəsizliyi Günüdür

Qidanın təhlükəsizliyi, keyfiyyətli tərkibi günümüzdə əsas problemlərdən biridir. Məlumdur ki, insana lazım olan 20 amin turşusundan orqanizm yalnız 12-ni sintez edə bilir. Qalanlarını isə zülallarla zəngin qida vasitəsi ilə almalıyıq. Heyvan və bitki mənşəli qidaların tərkibində zülallardan başqa çoxlu bioloji əhəmiyyətli maddələr də var ki, insanlar hələ uzun müddət bundan istifadə edəcəklər. Araşdırmalara görə, məhsul nə qədər təzədirsə, onun keyfiyyəti bir o qədər yüksək olur. Məsələn, süd sağılan an keyfiyyətli hesab edilir. Bir qədər sonra isə onun qaynadılması vacibdir.

Demək olar ki, hər gün qida çeşidliliyi artır. Ancaq bu çeşidlilik bəzi hallarda heç də faydalı qidaların artımına aid deyil. Əksinə, fərqli, bir çox hallarda isə keyfiyyətsiz qidalar istehsal edilir. Bu baxımdan qidaların təhlükəsizliyi üçün vacib olan amillər gözardı edilməməlidir. Çünki qida təhlükələri sərhəd tanımır. Qloballaşma qida tədarükü zəncirlərinin artan qarşılıqlı əlaqəsinə səbəb olub. Beləliklə, qeyri-sağlam qidaların yaratdığı risklər artır və tez bir zamanda yerli problemdən beynəlxalq səviyyəli fövqəladə vəziyyətə qədər yüksələ bilər.

Gözlənilməzliyə hazır olun...

Artıq 6 ildir ki, Ümumdünya Qida Təhlükəsizliyi Günü qeyd olunur. Ümumdünya Səhiyyə Təşkilatının (ÜST) son hesabatına əsasən, hər il 600 milyon insan qida ilə ötürülə bilən 200 növ xəstəlikdən əziyyət çəkir. Bu xəstəliyə yoluxanlar arasında isə xüsusilə gənclər üstünlük təşkil edir. Təşkilatın məlumatına görə, qida ilə yoluxan xəstəliklər dünyada hər 10 nəfərdən 1-nə təsir edir. Ümumdünya Qida Təhlükəsizliyi Gününün builki devizi “Qida təhlükəsizliyi: gözlənilməzliyə hazır olun” adlanır.

Çarpaz çirklənməyə yol verilməməlidir...

Azad İstehlakçılar Birliyinin sədri Eyyub Hüseynov “Yeni Azərbaycan”a açıqlamasında bildirib ki, qida təhlükəsizliyi təkcə təhlükəsiz qida istehsalını deyil, həm də təhlükəsiz qida istehlakını əhatə edir: “Təhlükəsiz qidalar qida dəyərini itirməmiş, fiziki, kimyəvi, bioloji cəhətdən təmiz və xarab olmamış qidalar hesab edilir. Bioloji təhlükələr arasında qida təhlükəsizliyi üçün ciddi problemlər yaradan və qida zəhərlənmələrinə səbəb olan mikroorqanizmlər isə bakteriyalardır. Buna görə də, hər yerdə, xüsusilə də mətbəxdə çarpaz

çirklənməyə yol verilməməlidir. Qida ilə təmasda olan hər şeyə, o cümlədən kəsmə lövhələrə ciddi diqqət yetirilməlidir”.

Yeganə BAYRAMOVA

Paylaş:

Baxılıb: 580 dəfə