Vahid Sağlamlıq dialoqu...

Bakı:

23 °C

56 %

4 m/s

Əlaqə

AZ RU EN

Ana səhifə / Sosial / Vahid Sağlamlıq dialoqu...

Vahid Sağlamlıq dialoqu...

26.07.2024 [10:22]

ÜST Azərbaycanda mühüm tədbir keçirdi

Ötən gün Ümumdünya Səhiyyə Təşkilatının (ÜST) Azərbaycandakı Ölkə Ofisi “Vahid Sağlamlıq: sektorlararası dialoqla COP29-a hazırlıq” adlı simpozium təşkil edib. Tədbir Vahid Sağlamlıq yanaşmasını və insan-heyvan-ətraf mühit interfeysində təhdidləri azaltmaq üçün davamlı strategiyaların işlənib hazırlanmasında onun mühüm rolunu anlamaq üçün yerli və beynəlxalq tərəfdaşları bir araya gətirib.

Simpozium potensial təhlükələri azaldan, iqlim dəyişikliyinin sağlamlığa təsirlərini aradan qaldıran və bütün sektorlarda davamlılığı təşviq edən davamlı strategiyaların işlənib hazırlanması üçün hərtərəfli çərçivə sənədini təklif edib. Tədbirdə COP29 üçün nəzərdə tutulan müzakirələr və məqsədlərə uyğun olaraq, iqlim dəyişikliyi ilə mübarizə üçün inteqrasiya olunmuş sağlamlıq və ətraf mühit siyasətlərinə ehtiyac olması vurğulanıb.

Qeyd edək ki, tədbirdə COP29 sədrliyi, müvafiq nazirliklər, universitetlər, vətəndaş cəmiyyəti, özəl sektor, gənclər və BMT agentliklərinin qərar qəbul edən şəxsləri və texniki ekspertləri iştirak ediblər.

“Vahid Sağlamlıq dialoqunun faydalarına inanıram”

BMT-nin Azərbaycandakı rezident əlaqələndiricisi Vladanka Andreeva bildirib ki, COVID-19 pandemiyası insanların, heyvanların və ekosistemlərin sağlamlığının bir-biri ilə sıx bağlı olduğunu xatırladır: “Bu il Braziliyada dağıdıcı daşqınlar, Meksikada rekord istilik dalğaları baş verib, Asiya, Avropa və Afrikada milyonlarla insan həddindən artıq istilərdən təsirlənib. İnsan fəaliyyəti və stresli ekosistemlər xəstəliklərin yaranması və yayılması üçün yeni imkanlar yaradıb. Bu stres amillərinə heyvan ticarəti, kənd təsərrüfatı, heyvandarlıq, urbanizasiya, hasilat sənayesi, iqlim dəyişikliyi, yaşayış mühitinin parçalanması və müəyyən ərazilərə müdaxilə daxildir. İnsan, heyvan və ətraf mühitin sağlamlığı arasında sıx əlaqələr müvafiq sektorlar arasında sıx əməkdaşlıq, ünsiyyət və koordinasiya tələb edir. Mən koordinasiyaya, əməkdaşlığa və Vahid Sağlamlıq dialoqunun faydalarına inanıram”.

Azərbaycanın Vahid Sağlamlıq yanaşması alqışlanmalıdır...

V.Andreeva bildirib ki, Vahid Sağlamlıq insanların, heyvanların və ekosistemlərin ayrı-ayrılıqda saxlanılması əvəzinə, bu sahələri birləşdirərək onların sağlamlığını optimallaşdırmaq üçün bir yanaşmadır: “Bu sektorlar üzrə səyləri birləşdirməklə biz sağlamlıq risklərinin qarşısını daha effektiv şəkildə ala və idarə edə bilərik. Mən Azərbaycanın Vahid Sağlamlıq yanaşmasına marağını çox alqışlayıram. Ümid edirəm ki, bugünkü simpozium Vahid Sağlamlıq mövzusunda sektorlararası dialoqa başlayacaq. Əməkdaşlıq və tərəfdaşlıq Vahid Sağlamlığın mərkəzindədir. Bu, hökumətlərin, beynəlxalq təşkilatların, elmi dairələrin və vətəndaş cəmiyyətinin birgə səylərini tələb edir. Bu maraqlı tərəflərin bu gün burada olduğunu qeyd etməkdən məmnunam.

COP29 bu müzakirənin davamı üçün əla fürsətdir

Vladanka Andreeva əlavə edib ki, Dubayda COP28-də ilk Sağlamlıq Günü keçirildi. Belə ki, COP28 Sağlamlıq Günündə müzakirə edilən əsas mövzulardan biri də iqlim dəyişikliyinin insan sağlamlığına təsirlərini, o cümlədən Vahid Sağlamlıq vasitəsilə aradan qaldırmaq üçün uyğunlaşma tədbirlərinin müəyyən edilməsi və miqyasının artırılması olub: “Bu ilin noyabrında Bakıda keçiriləcək COP29 bu müzakirəni davam etdirmək üçün əla fürsət təqdim edir. COP29 Prezidentliyi sağlamlıq, insan kapitalı, iş, təhsil, uşaqlar və gənclərə həsr olunmuş tematik gün elan edib”.

Azərbaycanda ciddi profilaktik tədbirlər görülür

Daha sonra ÜST-nın Azərbaycandakı nümayəndəsi və ölkə ofisinin rəhbəri Hande Harmancı COVID-19-un Fransada yenidən yayılması xəbərlərinin verildiyini qeyd edib. Onun sözlərinə görə, bu vəziyyət Azərbaycanda da potensial risklər yarada bilər, çünki beynəlxalq səfərlər və əlaqələr xəstəliyin sürətlə yayılmasına səbəb ola bilər: “Buna görə də Azərbaycanda epidemioloji nəzarət və profilaktik tədbirlər ciddi formada görülür və görülməkdədir. Peyvəndləmə proqramları və xəstəliyin monitorinqi davam edir. Bu tədbirlər virusun Azərbaycanda yenidən yayılmasının qarşısını almaq və cəmiyyətin sağlamlığını qorumaq məqsədi daşıyır”.

Məlumat mübadiləsi də önəmlidir...

H.Harmancının sözlərinə görə, ÜST və digər beynəlxalq təşkilatların vahid sağlamlıq yanaşması insanların, heyvanların və ətraf mühitin sağlamlığını bir-birinə bağlı olaraq görür: “Bu yanaşma xəstəliklərin qarşısının alınmasında və diqqətdə saxlanılmasında mühüm rol oynayır. Azərbaycanda epidemioloji vəziyyətin qiymətləndirilməsi və potensial təhlükələrin qarşısının alınması üçün bu sahədə çalışan bütün qurumlar arasında sıx əməkdaşlıq vacibdir. Xəstəliklərin yayılmasının qarşısını almaq üçün beynəlxalq təşkilatlarla və digər ölkələrlə məlumat mübadiləsi də önəmlidir”.

Yeganə BAYRAMOVA

Paylaş:

Baxılıb: 735 dəfə