Nərimanov rayonunda yüksək bal toplamış tələbələrlə görüş keçirilib

Bakı:

26 °C

60 %

6 m/s

Əlaqə

AZ RU EN

Ana səhifə / Sosial / Nərimanov rayonunda yüksək bal toplamış tələbələrlə görüş keçirilib

Nərimanov rayonunda yüksək bal toplamış tələbələrlə görüş keçirilib

18.09.2014 [09:56]

Sentyabrın 17-də Nərimanov rayon İcra Hakimiyyətinin akt zalında rayon təhsil müəssisələrinin 2013-2014-cü tədris ilində qazandığı uğurlar müzakirə edilib və yüksək balla ali təhsil müəssisələrinə qəbul olunmuş tələbələrlə görüş keçirilib.
AzərTAc xəbər verir ki, tədbirdə Milli Məclisin deputatları, təhsil müəssisələrinin müəllimləri və tələbə adını qazanmış gənclər, valideynlər, həmçinin rayonun idarə, müəssisə və təşkilatlarının rəhbərləri, ictimaiyyətin nümayəndələri və gənclər iştirak ediblər.
Əvvəlcə Ulu öndər Heydər Əliyevin İcra Hakimiyyəti binasının foyesindəki büstü önünə gül dəstələri qoyulub və xatirəsi ehtiramla yad edilib.
Nərimanov rayon İcra Hakimiyyətinin başçısı Abdin Fərzəliyev tədbir iştirakçılarını yeni dərs ilinin başlanması münasibətilə təbrik edib. Qeyd edilib ki, müasir dünyada hər bir ölkənin gələcəyi təhsilin səviyyəsi ilə ölçülür. Ulu öndər Heydər Əliyevin milli təhsil quruculuğu sahəsində başladığı islahatlar bu gün Azərbaycan Prezidenti İlham Əliyev tərəfindən uğurla davam etdirilir. Azərbaycanda təhsil dövlətimizin başçısının daim himayəsi altındadır. Bildirilib ki, 2013-2014-cü tədris ili ərəfəsində Nərimanov rayonundakı 47 nömrəli tam orta məktəb əsaslı təmir olunub, 207 nömrəli tam orta məktəb üçün isə 280 yerlik 14 sinif otağı, kitabxanası, akt və idman zalları olan dördmərtəbəli əlavə korpus tikilib.
İcra başçısı deyib ki, qazanılan uğurlar hər şeydən əvvəl özünü ali məktəblərə qəbulun dinamikasında, yüksək bal toplayan tələbələrin sayının artmasında göstərir. 2013-2014-cü tədris ilində məktəbi bitirənlərin sayı 3971 nəfər olub. Beş şagird məktəbi qızıl medalla bitirib. 2014-cü ildə ali məktəblərə qəbul imtahanlarında 600-dən yuxarı bal toplayan şagirdlərin sayı 65 nəfər olub. Onlardan 17 nəfəri 650-dən yuxarı bal toplayıb, 2 tələbə isə Prezident təqaüdünə layiq görülüb.
Milli Məclisin deputatları Adil Əliyev və Rasim Musabəyov qeyd ediblər ki, son vaxtlar Azərbaycan təhsilinin beynəlxalq standartlara uyğunlaşdırılması üçün xeyli iş görülüb. Dövlətimizin başçısı İlham Əliyevin və Heydər Əliyev Fondunun prezidenti Mehriban Əliyevanın təhsilin inkişafına göstərdikləri müntəzəm diqqət və qayğı sayəsində yeni məktəb binalarının inşası, təhsil müəssisələrinin maddi-tədris bazalarının möhkəmləndirilməsi, informasiya və kommunikasiya texnologiyaları ilə təmin edilməsi, ümumi təhsil sistemində müxtəlif istiqamətlər üzrə islahatların aparılması təhsilimizin uğurlu gələcəyinə inamı artırır.
Digər çıxışçılar tələbə adını qazanmış gəncləri təbrik edərək onlara təhsillərində uğurlar arzulayıb, ölkəmizdə təhsilin inkişafına, onun maddi-texniki bazasının möhkəmləndirilməsinə və təhsil işçilərinin sosial vəziyyətinin yaxşılaşdırılmasına göstərilən diqqət və qayğıya görə Prezident İlham Əliyevə minnətdarlıqlarını bildiriblər.
Görüşdə Nərimanov rayon İcra Hakimiyyəti adından təhsildə fərqlənmiş, qəbul imtahanlarında yüksək nəticələr əldə edərək ali məktəblərə qəbul olunmuş məzunlara fəxri fərman və qiymətli hədiyyələr təqdim olunub.

Paylaş:

Baxılıb: 1045 dəfə