Kaspi Liseyində Ümummilli liderin xatirəsi anılıb

Bakı:

27 °C

63 %

10 m/s

Əlaqə

AZ RU EN

Ana səhifə / Sosial / Kaspi Liseyində Ümummilli liderin xatirəsi anılıb

Kaspi Liseyində Ümummilli liderin xatirəsi anılıb

13.12.2014 [11:59]

Kaspi Liseyində Ümummilli lider Heydər Əliyevin xatirəsinə həsr olunan tədbir keçirilib.
AzərTAc xəbər verir ki, əvvəlcə Azərbaycanın Dövlət himni səsləndirilib. Dünya şöhrətli siyasətçinin əziz xatirəsi bir dəqiqəlik sükutla yad edilib.
Sonra tədbir iştirakçıları Ulu öndərin həyat və fəaliyyətinin müxtəlif anlarını əks etdirən videoçarxı izləyiblər.
Tədbirdə Kaspi Təhsil Şirkətinin təsisçisi Sona Vəliyeva çıxış edərək anım günündə Ümummilli lider Heydər Əliyevin xalqımız və dövlətçiliyimiz qarşısında əvəzolunmaz fəaliyyətinin xatırlandığını diqqətə çatdırıb, Ulu öndəri Azərbaycanın xilaskarı kimi təqdim edib. S.Vəliyeva tarixə qısa ekskursiya edərək zaman-zaman hər bir millətin, xalqın ağır sınaqlar qarşısında qaldığını, ölüm-dirim məsələsinin gündəmə gəldiyini vurğulayıb. Bildirilib ki, məhz belə vaxtlarda xalqı, milləti düşdüyü ağır vəziyyətdən liderlər xilas edir. O deyib: “Həmin anlarda hər bir millət bir xilaskara ehtiyac duyur. Bu gün dünyanın bəzi ölkələrində baş verən hadisələr də bu faktı bir daha təsdiq edir. Ukrayna, Şərqi Avropa, Yaxın Şərq ölkələrində cərəyan edən hadisələr, müstəqilliyini itirmək təhlükəsi ilə üz-üzə qalan dövlətlər, xalqlar indi də gözlərimiz önündədir. Belə vəziyyətlərdə liderlər ortaya çıxaraq ölkəsinin, xalqının taleyini həll edir, xilaskarlıq missiyasını yerinə yetirirlər. Ümummilli lider Heydər Əliyev də 1993-cü ildə xilaskarlıq missiyasını yerinə yetirdi. 1993-cü ilin may-iyun aylarında hökumət böhranının son dərəcə kəskinləşməsi ilə ölkədə vətəndaş müharibəsinin baş verməsi və müstəqilliyin itirilməsi təhlükəsi yarandıqda Azərbaycan xalqı müdrik siyasətçi Heydər Əliyevin hakimiyyətə gətirilməsi tələbi ilə ayağa qalxdı. Respublikanın o zamankı rəhbərləri Heydər Əliyevi rəsmən Bakıya dəvət etməyə məcbur oldular. Heydər Əliyev 1993-cü il iyunun 15-də Azərbaycan Ali Sovetinin Sədri seçildi və həmin gün tarixə “Milli Qurtuluş Günü” kimi daxil oldu. Milli Məclisin qərarı ilə Azərbaycan Prezidentinin səlahiyyətlərini həyata keçirməyə başlayan Ulu öndər sonradan ümumxalq səsverməsi ilə Azərbaycan Prezidenti seçildi”.
S.Vəliyeva Ulu öndər Heydər Əliyevin həyat və fəaliyyətinin müxtəlif anlarını, həyata keçirdiyi çoxsaylı işləri, üzləşdiyi çətinlikləri də qeyd edib. O, Ümummilli liderin Öz xalqı qarşısında gördüyü işlərə görə daim ürəklərdə yaşayacağını söyləyib: “Azərbaycanda Heydər Əliyev ideyaları bu gün də yaşayır. Onun siyasi kursunun layiqli davamçısı Prezident İlham Əliyev tərəfindən uğurla həyata keçirilən daxili və xarici siyasət nəticəsində ölkəmiz gündən-günə güclənir, müstəqilliyimiz daha da möhkəmlənir. Məşhur bir mahnıda ifadə edildiyi kimi, nə qədər bu millət, nə qədər Azərbaycan var, Ulu öndər Heydər Əliyev daim bizimlə olacaqdır”.
Daha sonra lisey şagirdlərinin hazırladıqları “Min ilə bərabər bir ömür” adlı ədəbi-bədii kompozisiya təqdim edilib. Şagirdlərdən ibarət xorun ifasında Ümummilli liderə həsr olunmuş “Heydər ata”, “Sən elə bir zirvəsən” mahnıları səslənib. Məktəblilər “Ulu bir sərkərdə, Ulu bir öndər”, “Budur xalq sevgisi, el məhəbbəti” şeirlərini söyləyiblər. Bununla yanaşı, lisey şagirdləri Ümummilli liderin həyat xronologiyasını, dünyanın məşhur siyasətçi və dövlət rəhbərlərinin Heydər Əliyev barədə söylədiklərini, Ulu öndərin ibrətamiz fikirlərini səsləndiriblər.
Lisey şagirdləri arasında elan edilmiş “Mən fəxr edirəm ki, azərbaycanlıyam” inşa yazı müsabiqəsinin qalibləri mükafatlandırılıb. Liseyin direktoru Tural Əliyev qaliblərə mükafat və sertifikatlar təqdim edib. Qaliblərdən Aysu Kazımlı və Elmira Həmidzadə Ümummilli liderə həsr etdikləri inşalarını oxuyublar.
Tədbirdə lisey şagirdlərinin Ulu öndər Heydər Əliyevin Fəxri xiyabandakı məzarını ziyarət etməsini əks etdirən videoçarx nümayiş olunub.

Paylaş:

Baxılıb: 934 dəfə