Gəncəlilər Şəhidlər xiyabanını ziyarət ediblər

Bakı:

10 °C

87 %

5 m/s

Əlaqə

AZ RU EN

Ana səhifə / Sosial / Gəncəlilər Şəhidlər xiyabanını ziyarət ediblər

Gəncəlilər Şəhidlər xiyabanını ziyarət ediblər

22.01.2015 [09:49]

Gəncə şəhərinin Şəhidlər xiyabanında 20 Yanvar faciəsi ilə bağlı ümumşəhər mitinqi keçirilib. Mitinqdə Gəncə şəhər İcra Hakimiyyətinin başçısı Elmar Vəliyev, şəhər rəsmiləri, hərbçilər, ziyalılar, şəhid ailələri, müharibə və əmək veteranları, ictimaiyyətin nümayəndələri iştirak ediblər.
Gəncə şəhər İcra Hakimiyyətinin başçısı Elmar Vəliyev şəhidlərin ruhuna böyük ehtiram və hörmət ifadəsi olaraq, “Şəhidlər” Memorial Kompleksinin önünə əklil qoyub. O, çıxışında bildirib ki, 20 Yanvar faciəsindən 25 il ötür. Xalqımız 25 il ərzində çox rəşadətli və şərəfli yol keçib. İllər, qərinələr ötəcək, amma 20 Yanvar tariximizin şanlı səhifəsi olaraq, yaddaşımızda qalacaq.
İcra Hakimiyyətinin başçısı qeyd edib ki, Sovet ordusunun bu qanlı aksiyasına ancaq Ulu öndər Heydər Əliyev ikinci dəfə hakimiyyətə gəldikdən sonra hüquqi-siyasi qiymət verilib və bundan sonra istər Dağlıq Qarabağ müharibəsində, istərsə də 20 Yanvar faciəsində şəhid və yaxud əlil olan insanlara, onların ailələrinə dövlət səviyyəsində diqqət və qayğı göstərilməyə başlanıb: “Bu gün Prezident İlham Əliyev müharibə veteranlarının, şəhid ailələrinin və əlillərin problemlərinin həll edilməsini mühüm vəzifə kimi qarşıya qoyub. Dövlət başçısının Sərəncamı ilə 2006-cı ildə 20 Yanvar şəhidinin ailəsi üçün Azərbaycan Respublikası Prezidentinin təqaüdü təsis edilib. Gəncədə də bu təbəqədən olan bütün insanlar hərtərəfli qayğı ilə əhatə olunublar. “Şəhidlər” Memorial Kompleksinin ucaldılması, bütün məzarların tamamilə vahid formada qara mərmərdən düzəldilməsi, burada abadlıq işlərinin aparılması, onlar haqqında kitab nəşr edilməsi Vətən qurbanlarının xatirəsinə qayğının təzahürüdür”.
İcra Hakimiyyətinin başçısı Vətənimizin düşmən tərəfindən işğal olunmuş torpaqlarının tezliklə azad olunacağını, ərazi bütövlüyümüzün bərpa ediləcəyini bildirib və müstəqilliyimiz uğrunda həlak olanlara rəhmət diləyib.
20 Yanvar faciəsində əlil olmuş Hikmət Əmiraslanov, Qarabağ Müharibəsi Əlilləri, Veteranlar və Şəhid Ailələri İctimai Birliyinin Gəncə şöbəsinin sədri Almaz Aşirov, şəhid anası Zenfira Əliyeva, Qafqaz Müsəlmanları İdarəsinin Qərb bölgəsi üzrə səlahiyyətli nümayəndəsi Tahir Abbasov çıxış edərək şəhidlərə, onların ailələrinə göstərilən diqqət və qayğıya görə Azərbaycan Respublikasının Prezidenti İlham Əliyevə dərin minnətdarlıqlarını ifadə ediblər.
Şəhidlərin ruhuna dualar oxunduqdan sonra şəhər rəhbərliyi və mərasim iştirakçıları şəhid məzarlarını ziyarət edərək üstünə tər qərənfillər düzüblər.

Paylaş:

Baxılıb: 908 dəfə