Daşkəsən rayonunda “Ümumrespublika Yaşıllaşdırma Marafonu” çərçivəsində növbəti ağacəkmə aksiyası keçirilib

Bakı:

20 °C

88 %

5 m/s

AZ RU EN

Ana səhifə / Sosial / Daşkəsən rayonunda “Ümumrespublika Yaşıllaşdırma Marafonu” çərçivəsində növbəti ağacəkmə aksiyası keçirilib

Daşkəsən rayonunda “Ümumrespublika Yaşıllaşdırma Marafonu” çərçivəsində növbəti ağacəkmə aksiyası keçirilib

11.04.2015 [11:37]

Azərbaycan Prezidenti İlham Əliyevin ölkəmizdə ekoloji tarazlığın qorunması ilə bağlı verdiyi tapşırıqlara uyğun olaraq Heydər Əliyev Fondunun vitse-prezidenti, İDEA (Ətraf Mühitin Mühafizəsi naminə Beynəlxalq Dialoq) İctimai Birliyinin təsisçisi və rəhbəri Leyla Əliyevanın layihəsi əsasında I “Ümumrespublika Yaşıllaşdırma Marafonu” çərçivəsində Daşkəsən rayon İcra Hakimiyyətinin təşkilatçılığı ilə rayonun bütün ərazisini əhatə edən ağacəkmə kampaniyası davam etdirilir. Dünən Daşkəsən rayonunda növbəti kütləvi ağacəkmə aksiyası keçirilib. Daşkəsən rayon İcra Hakimiyyətinin başçısı Əhəd Abıyevin iştirakı ilə Daşkəsən rayonunun girişində, Bayraq meydanı ərazisində və Gəncə-Daşkəsən avtomobil yolunun kənarlarında müxtəlif növ min ədəd ağac əkilib. Aksiyaya rayon İcra Hakimiyyəti başçısı Aparatının əməkdaşları, ziyalılar, rayonun idarə, müəssisə və təşkilat kollektivləri, ictimaiyyət nümayəndləri, həmçinin, sakinlər qatılıblar.
Rayon ərazisində yeni ağacların əkilməsi istiqamətində görülən işlərin bundan sonra da diqqət mərkəzində saxlanılacağını qeyd edən Daşkəsən rayon İcra Hakimiyyətinin başçısı Əhəd Abıyev bildirib ki, bu ağacəkmə aksiyalarının keçirilməsində əsas məqsəd ərazidə yaşıllıq zolaqlarını bərpa etmək, ərazinin ekoloji tarazlığının bərpasına, ekoloji mühitinin sağlamlaşdırılmasının sürətlənməsinə, buradakı mövcud torpaq qatının münbitləşdirilməsinə töhfə vermək, insanlar arasında ekoloji mədəniyyəti, təbiətə qayğı hissini təbliğ etməkdən ibarətdir. Daşkəsən rayon İcra Hakimiyyətinin başçısı Əhəd Abıyev xüsusilə vurğulayıb ki, getdikcə daha geniş vüsət alan bu işlər sayəsində Daşkəsən ərazisi ən abad və yaşıllıqlarla zəngin rayona çevrilməkdədir. Ümumiyyətlə, Daşkəsən rayonuna yay aylarında istirahətə gələnlərin sayının çox olmasına görə də ərazidə yaşıllaşdırma işlərinin aparılması böyük əhəmiyyət kəsb edir.
Marafon çərçivəsində rayon ərazisində təmiz ekoloji mühitin yaradılması və yeni yaşıllıqların salınması üçün xüsusi təyin olunan sahələrdə ərazinin relyefi nəzərə alınaraq bu günə qədər ümumilikdə 4000-dək müxtəlif növ ağac əkilib və marafon çərçivəsində 6 mindən çox ağacın əkilməsi nəzərdə tutulur. Daşkəsən rayonunda yaşıllıqların sayının artırılması istiqamətində keçirilən ağacəkmə kampaniyası davam edir.

Paylaş:

Baxılıb: 1070 dəfə