ARGTMŞ Azərbaycanı Malayziyada keçirilən beynəlxalq tədbirdə təmsil edib

Bakı:

19 °C

82 %

5 m/s

Əlaqə

AZ RU EN

Ana səhifə / Sosial / ARGTMŞ Azərbaycanı Malayziyada keçirilən beynəlxalq tədbirdə təmsil edib

ARGTMŞ Azərbaycanı Malayziyada keçirilən beynəlxalq tədbirdə təmsil edib

30.06.2015 [10:04]

Azərbaycan Respublikası Gənclər Təşkilatları Milli Şurası (ARGTMŞ) tamhüquqlu və İdarə Heyətinin üzvü olduğu Dünya Gənclər Assambleyası tərəfindən Malayziyanın Melaka şəhərində təşkil olunan “15-ci Melaka Beynəlxalq Gənclər Dialoqu” adlı tədbirdə təmsil olunub. Melaka Əyalət Hökuməti, Asiya Gənclər Şurası, Malayziya Gənclər Şurası, Malayziya Gənclər və İdman Nazirliyinin dəstəyi ilə həyata keçirilən tədbirdə ARGTMŞ-ı təşkilatın İctimaiyyətlə Əlaqələr Departamentinin rəhbəri Pərvin Piriyev təmsil edib.
ARGTMŞ-dan AZƏRTAC-a bildiriblər ki, tədbirdə Avropa, Asiya, Avstraliya və Afrika qitələrinin ölkələrindən Dünya Gənclər Assambleyası ilə əlaqəli olan, gənclərlə sıx işləyən qurumların lider və fəalları iştirak ediblər.
Tədbir gənclərin konfliktlərin cari vəziyyəti haqqında məlumatlandırılması, gənclər şuraları və digər maraqlı tərəflərin konfliktlərin həllində töhfələrinin və rolunun təsnifləşdirilməsi, münaqişələrə qarşı mübarizədə iştirakı və rolunun artırılması məqsədilə təşkil olunub.
İki gün davam edən tədbir plenar iclaslar və işçi qruplar üzrə aparılıb. İşçi qruplar zamanı idarəetmədə gənclərin iştirakının təmin olunması, gənclərlə bağlı proqramlar və təcrübələrdən danışılıb. ARGTMŞ-ın nümayəndəsinin iştirak etdiyi işçi qrupda Azərbaycanda gənclər sahəsində görülən işlər, Dövlət Gənclər Proqramı haqqında məlumat verilib. Azərbaycanda bu istiqamətdə görülən işlər uğurlu təcrübə kimi qəbul olunub və bütün iştirakçıların yer aldığı plenar iclas zamanı qeyd edilib.
P.Piriyev, həmçinin səfər çərçivəsində Dünya Gənclər Assambleyasının icra komitəsinin birinci iclasında iştirak edib. Melaka şəhərinin (ştatın) Baş naziri Mohd Ali Rustam və Dünya Gənclər Assambleyasının sədri İdris Haronun iştirakı ilə keçən iclasda Dünya Gənclər Assambleyasının hesabatı təqdim olunub və görüləcək işlərdən danışılıb. Tədbirin sonunda işçi qruplar və plenar iclaslar zamanı fikir mübadiləsi əsasında bəyannamə qəbul olunub. Tədbir təntənəli bağlanış mərasimi ilə başa çatıb.
Məlumat üçün qeyd edək ki, Dünya Gənclər Assambleyası 1949-cu ildən fəaliyyət göstərir və BMT-nin İqtisadi və Sosial Şurasının məşvərətçi statuslu üzvüdür. Təşkilat Avropa, Asiya, Avstraliya, Afrika və Amerika qitələrindən 120-dək gənclər platformasını birləşdirir. 2014-cü il dekabrın 10-da ARGTMŞ Dünya Gənclər Assambleyasının İdarə Heyətinin üzvü seçilib.

Paylaş:

Baxılıb: 1008 dəfə