“Bələdiyyə və media: mövcud durum və inkişaf istiqamətləri” mövzusunda müzakirələr aparılıb

Bakı:

16 °C

77 %

2 m/s

Əlaqə

AZ RU EN

Ana səhifə / Sosial / “Bələdiyyə və media: mövcud durum və inkişaf istiqamətləri” mövzusunda müzakirələr aparılıb

“Bələdiyyə və media: mövcud durum və inkişaf istiqamətləri” mövzusunda müzakirələr aparılıb

11.07.2015 [10:55]

İyulun 10-da Bakıda “Bələdiyyə həyatı” qəzetinin təşkilatçılığı ilə Azərbaycan mətbuatının 140 illik yubileyinə həsr olunan “Bələdiyyə və media: mövcud durum və inkişaf istiqamətləri” mövzusunda “dəyirmi masa” keçirilib.
AZƏRTAC xəbər verir ki, tədbirdə Milli Məclisin üzvləri, Ədliyyə Nazirliyinin Bələdiyyələrlə İş Mərkəzinin nümayəndələri, Bakı bələdiyyələrinin sədrləri, vətəndaş cəmiyyəti və media təmsilçiləri iştirak ediblər.
“Bələdiyyə həyatı” qəzetinin baş redaktoru Vüqar Tofiqli son illərdə ölkəmizdə medianın inkişafı istiqamətində görülən işlərdən danışıb. Qeyd edib ki, Azərbaycanda kütləvi informasiya vasitələrinin sərbəst fəaliyyəti üçün əlverişli şərait yaradılıb, plüralizm, söz və mətbuat azadlığına mane olan senzura ləğv edilib, mətbuatın fəaliyyətini tənzimləyən qanunvericilik bazası formalaşdırılıb. Bildirilib ki, “Bələdiyyə həyatı” qəzetində bələdiyyə sahəsi ilə bağlı çoxsaylı materiallar dərc olunur. Qəzet bələdiyyələrin fəaliyyətini stimullaşdımaq üçün bir vasitədir.
Milli Məclisin Regional məsələlər komitəsinin sədri Arif Rəhimzadə çıxış edərək Azərbaycan milli mətbuatının inkişafından, bələdiyyələrlə bağlı qanunvericilikdən, bələdiyyələrin fəaliyyətinin əlaqələndirilməsindən, yerli özünüidarəetmənin inkişafından danışıb. O deyib ki, əsas məqsədi Azərbaycan cəmiyyətini maarifləndirmək, xalqın milli özünüdərk prosesinə təkan vermək olan “Əkinçi” qəzeti öz fəaliyyəti dövründə milli şüurun formalaşmasında mühüm rol oynayıb.
Qeyd edilib ki, kəşməkəşli inkişaf yolu keçən Azərbaycan mətbuatı ötən əsrin 70-ci illərindən başlayaraq öz üzərində daim Ümummilli liderimiz Heydər Əliyevin qayğısını hiss edib. Çünki Ulu öndər hətta sovet dövrünün ciddi senzura şəraitində belə fikir və söz azadlığının himayədarı olub, mətbuatın ictimai mövqeyinin möhkəmlənməsinə, nüfuzunun artmasına təkan verib. Bu gün Prezident İlham Əliyevin rəhbərliyi ilə Azərbaycan mətbuatı özünün yeni mühüm inkişaf dövrünü yaşayır. Qəzetlərin Azərbaycan nəşriyyatına borclarının büdcədən ödənilməsi, müstəqil qəzetlərə birdəfəlik maliyyə yardımının edilməsi və mətbuat işçilərinin mənzillə təmin olunması bu sahəyə göstərilən diqqət və qayğının bariz nümunələridir. A.Rəhimzadə bələdiyyə institutunun Azərbaycanda ən vacib dövlət orqanlarından biri olduğunu söyləyib, bələdiyyələrin yaxşı fəaliyyət göstərməsi üçün insanların fəal olmalarının zəruriliyini vurğulayıb.
Ədliyyə Nazirliyinin Bələdiyyələrlə İş Mərkəzinin rəisi Mehdi Səlimzadə çıxışında Azərbaycan milli mətbuatının inkişaf tarixindən danışıb. O, Azərbaycan milli mətbuatının özünəməxsus ənənələr yaratdığını və şanlı jurnalistlər nəsli yetişdirdiyini söyləyib. Bildirib ki, mətbuatımızın yaradıcısı Həsən bəy Zərdabidən başlayaraq günümüzə qədər böyük söz ustadları milli təfəkkürün inkişafı üçün misilsiz xidmətlər göstərib.
Qeyd edilib ki, Azərbaycanda demokratik mətbuatın formalaşmasında, azad fikrin ifadəsi yolunda Ulu öndər Heydər Əliyevin həyata keçirdiyi islahatlar əvəzsiz olub. Ümummilli lider Heydər Əliyev demokratik dövlət quruculuğu prosesində kütləvi informasiya vasitələrinin rolunu daim yüksək qiymətləndirib, Azərbaycanda senzuranın ləğvi və bir sıra digər tədbirlərlə mətbuatın inkişafına böyük dəstək verib. Mətbuatımızın inkişafına, jurnalistlərin sosial müdafiəsinin gücləndirilməsinə yönəlmiş siyasət bu gün Prezident İlham Əliyev tərəfindən ardıcıl surətdə və daha geniş miqyasda davam etdirilir.
M.Səlimzadə bələdiyyə qanunvericiliyinin təkmilləşdirilməsinin, bu sahədə institusional tədbirlərin həyata keçirilməsinin önəmini diqqətə çatdırıb.
Azərbaycan Qəsəbə Bələdiyyələrinin Milli Assosiasiyasının sədri Hümbət Hüseynov Azərbaycan mətbuatının 140 illiyi münasibətilə jurnalistləri təbrik edib, bələdiyyələrin qarşısında duran vəzifələrdən söz açıb.
“Dəyirmi masa”da bir sıra bələdiyyə sədrləri yerli əhəmiyyətli məsələlərin həllində əhalinin iştirakı, bələdiyyələrin maliyyə imkanlarının artırılması, onların fəaliyyətində aşkarlığın və şəffaflığın təmin olunması ilə bağlı çıxışlar ediblər.

Paylaş:

Baxılıb: 1050 dəfə