Naxçıvan: seçkilərə hazırlıq işləri yüksək səviyyədə görülüb

Bakı:

10 °C

81 %

7 m/s

Əlaqə

AZ RU EN

Ana səhifə / Sosial / Naxçıvan: seçkilərə hazırlıq işləri yüksək səviyyədə görülüb

Naxçıvan: seçkilərə hazırlıq işləri yüksək səviyyədə görülüb

28.10.2015 [10:01]

Azərbaycan Respublikasının Milli Məclisinə və Naxçıvan Muxtar Respublikasının Ali Məclisinə noyabrın 1-də keçiriləcək seçkilərə Naxçıvan Muxtar Respublikasında bütün hazırlıq işləri yüksək səviyyədə görülüb. 3 saylı Babək-Kəngərli-Naxçıvan seçki dairəsində də bunun bir daha şahidi olduq.
Dairədə 49 seçki məntəqəsində seçicilər öz namizədlərinə səs verəcəklər. Həmin məntəqələrin hamısı artıq fəaliyyətdədir. Məntəqələrin 21-i muxtar respublikanın Babək rayonunda, 18-i Kəngərli rayonunda, 7-si Naxçıvan şəhərindədir. Ümumilikdə, bu məntəqələrdə 43 min 677 nəfər səs verəcək.
Seçki prosesinin internet üzərindən izlənməsini təmin etmək məqsədilə dairənin 3-41, 3-42, 3-45, 3-12, 3-17 nömrəli seçki məntəqələrində veb-kameralar quraşdırılıb. Seçkilərin şəffaf, demokratik şəkildə başa çatdırılması üçün yaradılan şərait ürəkaçandır. Bütün məntəqələr lazım olan avadanlıqlarla təchiz edilib. Məntəqələr telefonlaşdırılıb. Hər bir məntəqədə iş planı və növbətçilik cədvəli tərtib olunub. Seçki gününü və yerini göstərən bildirişlər seçicilərə paylanılıb.
Babək qəsəbə tam orta məktəbinin binasında Azərbaycan Respublikasının Milli Məclisinə 3-41 və Naxçıvan Muxtar Respublikası Ali Məclisinə 19-1 nömrəli seçki məntəqələri yaradılıb. Burada hər iki məntəqə tərəfindən ayrı-ayrılıqda hazırlanmış “Seçicinin məlumat lövhəsi” vasitəsilə məntəqə seçki komissiyalarının tərkibi, iş planları, komissiya üzvlərinin vəzifə bölgüsü, deputatlığa qeydə alınmış namizədlərlə tanış olmaq mümkündür. Azərbaycan Respublikasının Milli Məclisinə seçkilər üzrə 3-41 saylı məntəqə seçki komissiyasının sədri Əli Hacıyev bildirib ki, məntəqədə görülən işlər Azərbaycan Respublikasının Seçki Məcəlləsinə uyğun olaraq mərhələlər üzrə həyata keçirilib. Seçici siyahıları dəqiqləşdirilib.
Seçkidə 1186 seçicinin səs verəcəyini diqqətə çatdıran komissiya sədri onu da bildirib ki, onlardan 1-i 1919-cu il təvəllüdlü, 31 nəfəri ilk dəfə səs verənlərdir. İlk dəfə səs verəcək seçicilərlə söhbətlər də aparılıb.
Rayon Mədəniyyət Evində yaradılmış 3-42 və 19-2 saylı məntəqələrdə 1164 nəfər seçici səs verəcək ki, onlardan 16 nəfəri ilk dəfə səs verənlər siyahısındadır.
Şıxmahmud kənd tam orta məktəbində təşkil edilmiş 3-34, 22-1, Şıxmahmud kəndindəki uşaq musiqi, Yuxarı Uzunoba, Şəkərabad kənd tam orta məktəblərinin binalarında təşkil edilmiş 3-35, 22-2, 3-31, 22-6, 3-32, 22-5, 3-43, 19-5 saylı məntəqələr də seçkilərə tam hazırdır.
7 saylı Ordubad-Culfa seçki dairəsində də seçkilərə hazırlıq yüksək səviyyədə aparılır. Dairə 48 məntəqəni əhatə edir. Dörd məntəqə seçkilərə 5 gün qalmış yaradılacaq. Məntəqələrin çoxu yeni tikilmiş binalarda yerləşdirilib, bəziləri isə təmir edilərək hər cür şərait yaradılıb, seçki materialları, daşınan və daşınmaz qutular, kabinələr verilib, generatorlarla təmin edilib.
Qeyd edək ki, 7 saylı Ordubad-Culfa seçki dairəsi üzrə 34 min 609 seçici səs verəcək. Onlardan 29 min 8 nəfəri Ordubad rayonundandır. Dairə üzrə 682 nəfər, o cümlədən Ordubad rayonu üzrə 555 nəfər ilk dəfə səs verəcək gənclərdir. Seçki günü səsvermə prosesinin onlayn izlənməsi üçün 5 məntəqədə veb-kamera quraşdırılıb.
Dairənin Ordubad rayonu ərazisində yerləşən 4 və 5 saylı məntəqələrində seçkiyə hazırlıq işləri ilə də yaxından tanış olduq. Məntəqələr seçkilərə tam hazırdır. 4 saylı məntəqə Ordubad şəhər 3 nömrəli tam orta məktəbin binasında yerləşir. Səliqəli, işıqlı, yüksək zövqlə tərtib olunmuş məntəqədir. Səs vermək üçün hər cür şərait yaradılıb. Burada 1149 seçici qeydə alınıb.
Məntəqə seçki komissiyasının sədri, katib və üzvləri, habelə seçkini izləyəcək beynəlxalq və yerli müşahidəçilər üçün yerlər müəyyənləşdirilib, stol və stullar qoyulub. Lövhədə seçicilərin yaşadıqları ünvanlar üzrə siyahısı vurulub. Hər bir seçici öz adının seçki siyahısında olub-olmadığını həmin siyahıda dəqiqləşdirə bilər.
5 saylı seçki məntəqəsi isə Ordubad şəhərindəki internat məktəbində yerləşir. Məntəqə seçki komissiyasının sədri İlkin Quliyev bildirib ki, məntəqənin əhatə etdiyi ərazidə 810 seçici yaşayır, onlardan 11 nəfəri ilk dəfə səs verəcək. Məntəqədə hər şey Azərbaycan Respublikası Seçki Məcəlləsinin tələblərinə uyğun təşkil edilib. Ümumiyyətlə, burada vətəndaşların öz iradələrini azad şəkildə, heç bir maneə olmadan ifadə etmələrinə tam şərait yaradılıb.
Bütün bunlar belə deməyə əsas verir ki, muxtar respublikada növbəti parlament seçkilərinin demokratik, ədalətli keçirilməsi üçün bütün zəruri tədbirlər görülüb. Bu günədək ölkəmizdə keçirilmiş bütün seçkilərin muxtar respublikada yüksək səviyyədə baş tutması da qədim diyarda böyük demokratik seçki təcrübəsinin olduğunu bir daha təsdiqləyir.
AZƏRTAC-ın Naxçıvan Muxtar Respublikasındakı bürosu

Paylaş:

Baxılıb: 674 dəfə