“Vergilər” mövzusunda tələbə və magistrantlar arasında olimpiada keçirilib

Bakı:

12 °C

94 %

2 m/s

Əlaqə

AZ RU EN

Ana səhifə / Sosial / “Vergilər” mövzusunda tələbə və magistrantlar arasında olimpiada keçirilib

“Vergilər” mövzusunda tələbə və magistrantlar arasında olimpiada keçirilib

05.12.2015 [11:01]

Dekabrın 4-də Azərbaycan Dövlət İqtisad Universitetində (UNEC) bu ali məktəbin və Vergilər Nazirliyinin birgə təşkilatçılığı ilə Ümummilli lider Heydər Əliyevin xatirəsinə həsr olunan, tələbə və magistrantlar arasında “Vergilər” mövzusunda IX respublika olimpiadası keçirilib.
Əvvəlcə iştirakçılar Ümummilli lider Heydər Əliyevin UNEC-in foyesindəki büstü önünə gül dəstələri düzərək, Ulu öndərin əziz xatirəsini bir dəqiqəlik sükutla yad ediblər.
Bu münasibətlə təşkil olunan tədbirdə universitetin rektoru, professor Ədalət Muradov IX respublika olimpiadasının iştirakçılarına uğurlar arzulayıb. Rektor əmək bazarının tələblərinə cavab verən gənc kadrların hazırlanmasında Vergilər Nazirliyinin həyata keçirdiyi layihələrin mühüm rolunu qeyd edib. Ə.Muradov Vergilər Nazirliyi ilə universitet arasındakı sıx əlaqələrdən söz açıb, əməkdaşlıq çərçivəsində UNEC-in on ən yaxşı tələbəsinin nazirlikdə işlə təmin olunacağını xüsusi qeyd edib.
Vergilər nazirinin müşaviri Ələkbər Məmmədov Ulu öndər Heydər Əliyevin əsasını qoyduğu və Prezident İlham Əliyevin rəhbərliyi ilə uğurla həyata keçirilən mükəmməl iqtisadi islahatlar nəticəsində ölkəmizin regionda və dünyada aparıcı dövlətlər səviyyəsinə qalxdığını diqqətə çatdırıb. Bildirilib ki, artıq doqquzuncu ildir ali məktəb tələbələri və magistrantlar böyük həvəslə bu olimpiadada iştirak edirlər. Olimpiada iştirakçılarının çoxu sonradan vergi orqanlarına işə qəbul üzrə test imtahanlarında yüksək nəticələr göstərərək işlə təmin olunurlar.
Test üsulu ilə təşkil olunan olimpiada zamanı iştirakçılar iki saat ərzində Vergilər Nazirliyinin Tədris Mərkəzində müvafiq test bazası əsasında hazırlanan sualları kompüter vasitəsilə onlayn rejimdə cavablandırıblar. Hər bir tələbə üçün fərdi sual bazası tərtib olunub. Nəticələr iştirakçı ali məktəblərin təmsilçilərindən ibarət münsiflər heyətinin iştirakı ilə Tədris Mərkəzinin mütəxəssislərinin nəzarəti altında xüsusi kompüter proqramları vasitəsilə qiymətləndirilib.
Beləliklə, tələbələr arasında Məmmədzadə Murad Teymur oğlu (UNEC) I, Əlizadə Zümrüd Mürşüd qızı (UNEC) II, Hüseynli İsgəndər Həbib oğlu isə (UNEC) III yeri tutub. Eyni zamanda, UNEC-in tələbəsi I yer tutduğuna görə həmin tələbənin müəllimi də xüsusi mükafata layiq görülüb.
Magistrantlar arasında isə Həmidova Mədinə Bəhruz qızı (UNEC) I, İsmayılov Orxan Oqtay oğlu (UNEC) II və Əsədzadə Vüsal Həsən oğlu (UNEC) III yeri tutub. UNEC-in magistrantı I yer tutduğuna görə həmin magistrantın müəllimi də xüsusi mükafata layiq görülüb.

Paylaş:

Baxılıb: 844 dəfə