DİA və “ASAN xidmət”in dövlət idarəçiliyinə dair birgə seminarı keçirilib

Bakı:

33 °C

25 %

4 m/s

Əlaqə

AZ RU EN

Ana səhifə / Sosial / DİA və “ASAN xidmət”in dövlət idarəçiliyinə dair birgə seminarı keçirilib

DİA və “ASAN xidmət”in dövlət idarəçiliyinə dair birgə seminarı keçirilib

05.07.2017 [09:58]

Qəbələdə Azərbaycan Respublikasının Prezidenti yanında Dövlət İdarəçilik Akademiyasının (DİA), Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin (ASAN) və Qəbələ rayon İcra Hakimiyyətinin birgə təşkilatçılığı ilə “Azərbaycanın innovativ inkişaf modeli” mövzusunda növbəti seminar keçirilib.
DİA-dan AZƏRTAC-a bildiriblər ki, rayonun müxtəlif dövlət qurumlarının əməkdaşları, Qəbələ “ASAN xidmət” mərkəzində çalışan dövlət qulluqçuları və könüllülər üçün təşkil edilmiş seminarda akademiyanın rektoru, akademik Urxan Ələkbərov, ali təhsil ocağının “Siyasi araşdırmalar institutu”nun direktoru, Milli Məclisin deputatı, professor Elman Nəsirov, DİA-nın elmi-təşkilat şöbəsinin müdiri, siyasi elmlər üzrə fəlsəfə doktoru, dosent Rəcəb Rəhimli məruzə ilə çıxış ediblər.
Tədbirdə “Azərbaycan Respublikasının dövlət idarəçilik modeli: ölkənin nailiyyətləri beynəlxalq təşkilatların hesabatlarında” mövzusunda məruzə ilə çıxış edən U.Ələkbərov əvvəlcə Ulu öndər Heydər Əliyevin Azərbaycan dövləti və xalqı qarşısındakı müstəsna xidmətlərindən, Ümummilli liderin zəngin siyasi irsinin, idarəçilik təcrübəsinin əhəmiyyətindən bəhs edib və bunun sayəsində ölkədə qısa zaman kəsiyində iqtisadi və sosial sahədə yüksək nailiyyətlər qazanılması üçün şəraitin yarandığını vurğulayıb. Bildirilib ki, əldə edilmiş nailiyyətlərin kökündə Prezident İlham Əliyevin həyata keçirdiyi düşünülmüş innovativ inkişaf strategiyası dayanır. Akademik inkişaf strategiyasının reallaşdırılmasında ölkənin Birinci vitse-prezidenti xanım Mehriban Əliyevanın xüsusi rolunu qeyd edib və bu sahədə dövlət qurumları ilə yanaşı, vətəndaş cəmiyyətinin, Heydər Əliyev Fondunun önəmli fəaliyyətinə də diqqət çəkib.
U.Ələkbərov qeyd edib ki, 2017-ci ilin martında BMT-nin, həmin ilin mayında isə Dünya Bankının dərc etdirdiyi hesabatlarda əksini tapan innovativ insan potensialına əsaslanan davamlı inkişaf göstəricilərinə görə, Azərbaycan hazırda dünya liderləri sırasındadır. Bu, keçmiş SSRİ, “Böyük yeddilik” (G 7) və “Böyük iyirmilik” (G 20) ölkələri ilə Azərbaycanın göstəricilərinin müqayisəli təhlili əsasında auditoriyanın nəzərinə çatdırılıb. Eyni zamanda, sosial göstəricilərdən də bəhs edən akademik beynəlxalq təşkilatların hesabatlarına əsaslanaraq ölkənin bu baxımdan da qısa müddətdə sürətlə inkişaf etdiyini, bir sıra inkişaf etmiş dövlətləri geridə qoyduğunu bildirib.
Seminarda çıxış edən E.Nəsirov və R.Rəhimli vurğulayıblar ki, ölkəmiz Ulu öndər Heydər Əliyevin rəhbərliyi ilə dirçəlməyə və taleyüklü problemlərin həlli istiqamətində inamlı addımlar atmağa başlayıb. Dövlət müstəqilliyimiz möhkəmlənib, ölkə daxilində siyasi sabitliyə nail olunub, Ümummilli liderin formalaşdırdığı siyasət bu gün Onun layiqli davamçısı Prezident İlham Əliyev tərəfindən uğurla davam etdirilir. Natiqlər çıxışlarında ölkə rəhbərliyi tərəfindən dövlət qulluğunda kadr ehtiyatının normativ-hüquqi tənzimlənməsi, dövlət qulluğunun innovativ qiymətləndirmə metodları, müasir çağırışlara cavab verən kreativ kadr potensialının formalaşdırılması və idarəedilməsi məsələlərinə diqqət çəkiblər.
Sonda tədbir iştirakçılarının sualları cavablandırılıb.

Paylaş:

Baxılıb: 595 dəfə