İğdır-Naxçıvan qaz kəməri Muxtar Respublikanın iqtisadi və siyasi təhlükəsizliyini möhkəmləndirəcək

Bakı:

24 °C

47 %

1 m/s

AZ RU EN

Ana səhifə / Sosial / İğdır-Naxçıvan qaz kəməri Muxtar Respublikanın iqtisadi və siyasi təhlükəsizliyini möhkəmləndirəcək

İğdır-Naxçıvan qaz kəməri Muxtar Respublikanın iqtisadi və siyasi təhlükəsizliyini möhkəmləndirəcək

12.08.2009 [11:55]

Yeni kəmər Azərbaycan və Türkiyənin bölgədə tranzit mövqeyinin daha da güclənməsini şərtləndirir
Məlum olduğu kimi, Türkiyənin enerji və təbii ehtiyatlar naziri Taner Yılmazın Naxçıvana səfəri zamanı Muxtar Respublikaya təbii qaz nəqli ilə bağlı geniş müzakirələr aparılıb. Taner Yılmazla Dövlət Neft Şirkətinin prezidenti Rövnəq Abdullayev arasında əldə olunmuş razılığa əsasən Azərbaycan qazının Türkiyənin İğdır ərazisindən Naxçıvana nəqli nəzərdə tutulur. Hər iki tərəf yaxın müddətdə yeni qaz kəmərinin çəkilməsi ilə bağlı layihənin texniki əsaslandırmasını hazırlayacaq. Bu məqsədlə gələn ay tərəflərin mütəxəssislərindən ibarət işçi qrupu yaradılacaq. İşçi qrupu Türkiyə üzərindən Naxçıvana qaz kəməri çəkilməsinin texniki əsaslandırmasını hazırladıqdan sonra kəmərin çəkilməsi üçün texniki işlərə start veriləcək.
Azərbaycan və Türkiyə hökumətləri arasında əldə olunmuş razılığa əsasən, yeni kəmərlə İğdıra ildə yarım milyard kubmetr qaz nəql olunacaq. Yanacaq həmin bölgədən Naxçıvana nəql ediləcək və bununla da Muxtar Respublikanın qaz problemi birdəfəlik həll olunacaq. Yəni, Naxçıvan daha təhlükəsiz və uzunömürlü qaz xətti vasitəsilə təmin ediləcək. Hazırda MR-ə Azərbaycanla İran arasında əldə olunmuş anlaşmaya əsasən barter yolu ilə qaz nəql olunsa da İğdır boru xətti bu kəmərlə müqayisədə daha böyük coğrafi və texniki üstünlüklərə malikdir. Ekspertlərin qiymətləndirmələrinə görə, Naxçıvanın relyefi mürəkkəb olduğundan bu əraziyə digər ölkələrdən qaz ötürülməsi üçün uyğun deyil, yalnız İğdır qaz kəməri relyef və coğrafi xüsusiyyətlərinə, texniki-iqtisadi parametrlərinə görə, məqsədəuyğundur. Naxçıvanın qaz təchizatını daha etibarlı, fasiləsiz və keyfiyyətli şəkildə təmin etmək üçün bu kəmərin alternativi yoxdur.
İğdır-Naxçıvan qaz kəmərinin çəkilməsi iqtisadi mahiyyəti ilə yanaşı, siyasi cəhətdən də böyük əhəmiyyət kəsb edir. Bu addım, Azərbaycan hökumətinin İqdır -Naxçıvan qaz kəmərinin işə düşməsi ilə Naxçıvanı blokadadan çıxartmaq istiqamətində siyasətinin təntənəsi kimi də qiymətləndirilə bilər. Məlum olduğu kimi, Ermənistanın işğalçılıq siyasəti Naxçıvanın iqtisadi blokadada qalmasına səbəb olub. Amma Muxtar Respublikanın zəngin iqtisadi resursları və əlverişli iqtisadiyyatı qonşu ölkələrin marağının artmasına səbəb olub və Naxçıvanla sıx əlaqələrin qurulması MR-in inkişafına yol açıb. Son illər həm qardaş Türkiyə, həm də qonşu İranla Naxçıvan arasında iqtisadi təmasların dərinləşməsi Muxtar Respublikanın sabit və dinamik inkişafı üçün əhəmiyyətli zəmin yaradıb. 92 kilometr uzunluğunda İğdır-Naxçıvan elektrik xəttinin çəkilməsi, Naxçıvana elektrik enerjisinin verilməsi, nəqliyyat magistrallarının birləşdirilməsi, sərnişin avtobusu və hava reyslərinin açılması, nəqliyyat xidmətlərinin genişləndirilməsi, eləcə də Türkiyə-Asiya-Avropa fiberoptik kabel magistralının Naxçıvanı əhatə etməsi Muxtar Respublikanın iqtisadi yüksəlişinə səbəb olub. Son beş ildə Naxçıvana 1 milyard dollardan çox investisiya yatırılıb. Naxçıvan iqtisadi artım tempinə görə, Azərbaycanın bölgələri arasında ilk yerdə dayanır.
İğdır-Naxçıvan qaz kəmərinin çəkilməsi Naxçıvanın inkişafı üçün impuls vermiş olacaq və bölgədə iqtisadi-strateji əhəmiyyət daşıyacaq. Bu kəmər Muxtar Respublikanın iqtisadi və siyasi təhlükəsizliyini möhkəmləndirəcək. İğdır-Naxçıvan qaz kəmərinin tikilməsi eyni zamanda qardaş Türkiyə ilə Muxtar Respublika arasında təmasların dərinləşməsinə əhəmiyyətli baza yaratmış olacaq. Bundan başqa, Naxçıvana qazın ötürülməsi Azərbaycan və Türkiyənin bölgədə tranzit mövqelərinin daha da möhkəmlənməsini şərtləndirmiş olur.

ELBRUS CƏFƏRLİ

Paylaş:

Baxılıb: 1578 dəfə