AHİK-in sədri: Sanatoriya və istirahət mərkəzlərimizdə dincəlmək istəyən əcnəbilərin sayı xeyli artıb

Bakı:

20 °C

68 %

9 m/s

AZ RU EN

Ana səhifə / Sosial / AHİK-in sədri: Sanatoriya və istirahət mərkəzlərimizdə dincəlmək istəyən əcnəbilərin sayı xeyli artıb

AHİK-in sədri: Sanatoriya və istirahət mərkəzlərimizdə dincəlmək istəyən əcnəbilərin sayı xeyli artıb

10.08.2018 [08:51]

Prezident İlham Əliyevin tapşırığına əsasən kurortların inkişafına dair dövlət proqramı hazırlanıb. Bununla əlaqədar Azərbaycan Həmkarlar İttifaqları Konfederasiyası (AHİK) sanatoriyaların tikintisi və təmiri işlərini aparır. Hazırda sanatoriya və istirahət mərkəzlərinin 85 faizi konfederasiyanın balansındadır. Əksər obyektlərdə təmir-tikinti işləri aparılıb, bəziləri isə tamamilə yenilənib.
AZƏRTAC-ın bölgə müxbiri xəbər verir ki, bu barədə avqustun 9-da AHİK-in sədri, Milli Məclisin deputatı Səttar Möhbalıyev Nabranın istirahət mərkəzlərindəki şəraitlə tanışlıq zamanı məlumat verib.
Səttar Möhbalıyev Azərbaycan Təhsil İşçiləri Azad Həmkarlar İttifaqı Respublika Komitəsinin “Təhsil” istirahət mərkəzindəki yaşayış korpuslarını gəzib, yataq otaqları və infrastrukturla tanış olub.
Təbiət qoynunda salınmış istirahət mərkəzi eyni vaxtda 260 nəfərə xidmət edə bilir. 2013-cü ildə açılışı olan mərkəzdə təhsil işçilərinin dincəlmələri üçün müasir mehmanxana binası, kotteclər, mini stadionlar, üzgüçülük hovuzu, ilkin tibbi yardım otağı, internet-klub istifadəyə verilib. Ümumilikdə mövsüm ərzində burada 1500 nəfərə yaxın həmkarlar ittifaqı üzvü dincəlir.
AHİK-in sədri Nabranda belə bir istirahət mərkəzinin istifadəyə verilməsinin dövlətimizin təhsil işçilərinə diqqət və qayğısının göstəricisi olduğunu vurğulayıb. Bildirib ki, həmkarlar ittifaqı üzvlərinin, onların ailələrinin sağlamlığına qayğı göstərilməsi, sanatoriya-kurort müalicəsinin və istirahətlərinin təşkili istiqamətində tədbirlər bundan sonra da davam etdiriləcək.
S.Möhbalıyev mərkəzdə dincələn insanlarla söhbət edərək buradakı şəraitlə maraqlanıb, onların rəy və təkliflərini dinləyib.
“İstirahət mərkəzlərinə edilən bu səfərin məqsədi buradakı şəraitlə yerində tanış olmaq, obyektlərin necə saxlanılmasına, xidmət səviyyəsinə nəzarət etməkdən ibarətdir. Özünüz də görürsünüz ki, burada bütün otaqlar soyuducu və kondisionerlə təmin olunub. Fasiləsiz enerji təminatı üçün generatorlar var. Sanatoriyalar bütün zəruri avadanlıqlarla, o cümlədən tibb məntəqələri, istirahət guşələri, idman qurğuları ilə tam təchiz edilib. Bir sözlə, həmkarlar ittifaqı üzvlərinin rahatlığı üçün hər bir şərait yaradılıb”, - deyə AHİK-in sədri qeyd edib.
Nabranda təhsil işçiləri ilə yanaşı, dəmiryolu, rabitə və digər dövlət qurumlarının həmkarlar ittifaqlarının da müasir standartlara uyğun istirahət mərkəzləri fəaliyyət göstərir. Hazırda mədəniyyət işçiləri üçün istirahət mərkəzi tikilir.
“Artıq bizim sanatoriyalara Rusiyanın müxtəlif bölgələrindən, Qazaxıstandan, İsraildən qonaqlar gəlir. Həmin turistlər çox razılıq edirlər. Onlar üçün Bakının və ətraf rayonların görməli, tarixi yerlərinə ekskursiyalar təşkil olunur. İndi sanatoriya və istirahət mərkəzlərimizdə dincəlmək istəyən xarici vətəndaşların sayı xeyli artıb. Birbaşa və ya internet vasitəsilə çoxsaylı müraciətlər alırıq. Əvvəlcədən yer sifariş vermək istəyirlər. Amma biz isti yay aylarında daha çox öz vətəndaşlarımızın istirahətini təmin etmək barədə düşünürük. Yəqin ki, danışıqlar aparıb sentyabrdan AHİK xətti ilə xarici qonaqlarımızı da qəbul edəcəyik. İstirahət mərkəzlərinin inkişafı ölkəmizə gələn xarici turistlərin çoxalmasına və bununla da büdcənin artmasına imkan yaradır. Turizm sahəsində inkişaf bu templə davam etsə, yaxın gələcəkdə Azərbaycanın bu sektordan gəlirləri neft gəlirləri ilə müqayisə oluna biləcək qədər arta bilər”, - deyə Səttar Möhbalıyev bildirib.
Sədr diqqətə çatdırıb ki, bütün bunlar Ümummilli lider Heydər Əliyevin hakimiyyətə qayıdışından sonra ölkə iqtisadiyyatının dirçəlməsi nəticəsində mümkün olub. AHİK-in də maliyyə imkanları məhz bundan sonra yaxşılaşıb. AHİK tərəfindən 20 mindən çox şəhid ailəsinə, Qarabağ müharibəsi əlilinə və aztəminatlı insanlara yardım göstərilib, 5 min məktəblinin istirahəti təmin olunub, 15 min uşaq isə ailə üzvləri ilə birlikdə istirahətə göndərilib.
“Təhsil” istirahət mərkəzi ilə tanışlıqdan sonra AHİK sədri Nabranda yerləşən Azərbaycan Dövlət İdarələri və İctimai Xidmət İşçiləri Həmkarlar İttifaqının “Ülfət” və Dəmiryolçuların Müstəqil Həmkarlar İttifaqının “Lokomotiv” və “Xəzər”, eləcə də Səhiyyə İşçiləri Həmkarlar İttifaqı Respublika Komitəsinin Qusar rayonu ərazisindəki “Şəfa” istirahət mərkəzlərində də olub.
“Ülfət” istirahət mərkəzi səkkiz ildir ki, istifadəyə verilib. Dənizdən bir kilometr məsafədə yerləşən mərkəzdə kotteclər və üç ədəd ikimərtəbəli istirahət korpusu var. Burada eyni vaxtda 96 nəfər, mövsüm ərzində isə 1000 nəfərə yaxın insan istirahət edə bilir.
2008-ci ilin avqust ayında istifadəyə verilən “Lokomotiv” istirahət mərkəzində ilkin olaraq 80 nəfərlik üç istirahət korpusu, 200 nəfərlik yeməkxana tikilib. Təsdiq olunmuş tikinti-smeta layihə sənədlərinə əsasən, mərkəzdə əlavə kottectipli evlərin və böyük istirahət korpusunun tikintisi 2019-cu ildə başa çatdırılacaq. Hazırda “Lokomotiv” istirahət mərkəzində mövsüm ərzində 1000 nəfər həmkarlar ittifaqı üzvü dincəlir.

Paylaş:

Baxılıb: 650 dəfə