Cocuq Mərcanlı sakini: Burada həm gözəl evlər tikilib, həm də yaşayış üçün lazımi şərait yaradılıb

Bakı:

23 °C

64 %

7 m/s

AZ RU EN

Ana səhifə / Sosial / Cocuq Mərcanlı sakini: Burada həm gözəl evlər tikilib, həm də yaşayış üçün lazımi şərait yaradılıb

Cocuq Mərcanlı sakini: Burada həm gözəl evlər tikilib, həm də yaşayış üçün lazımi şərait yaradılıb

03.10.2018 [08:37]

Kənddə yaradılan istixanalar əhalinin məşğulluğunun təmin olunmasına xidmət edir
Cəbrayıl rayonunun işğaldan azad edilmiş Cocuq Mərcanlı kəndinin inkişafı daim diqqət mərkəzində saxlanılır, kənd sakinlərinin məşğulluğunun təmin edilməsi və sosial rifahın yaxşılaşdırılması istiqamətində müxtəlif layihələr həyata keçirilir. Belə layihələrdən biri İqtisadiyyat Nazirliyinin və Türkiyənin Azərbaycandakı səfirliyinin təşəbbüsü ilə kənddə istixanalarının yaradılmasıdır.
AZƏRTAC-ın bölgə müxbiri xəbər verir ki, layihə çərçivəsində Cocuq Mərcanlıda 15 ailənin hər biri üçün 160 kvadratmetr sahəyə malik polietilen örtüklü tunel tipli istixanalar qurulub. İstixanalar damcı suvarma sistemi ilə təchiz olunub, istifadəçilərə toxum, gübrə və pestisidlər, bitkilərə qulluq üçün alət və avadanlıqlar verilib. Bunlarla yanaşı, layihə iştirakçılarına tərəvəzin becərilməsi ilə bağlı 3 ay müddətində təlim və məsləhət xidməti göstərilib. İstixanalarda əsasən xiyar bitkisi becərən kənd sakinləri məhsul satışından mənfəət də əldə ediblər. Bu günlərdə Dövlət Aqrar Ticarət Şirkətinin “Kənddən Şəhərə” layihəsi çərçivəsində Cocuq Mərcanlı fermerlərinə dəstək məqsədilə onların yetişdirdiyi məhsulların satışı da təşkil olunub. Kənddəki istixanalarda yetişdirilmiş 1100 kiloqram xiyar məhsulu satın alınaraq “Araz” supermarketlər şəbəkəsi vasitəsilə satışa çıxarılıb.
Layihənin əhəmiyyətini yüksək qiymətləndirən kənd sakini Ruhin Təbrizli AZƏRTAC-ın müxbiri ilə söhbətində deyib: “24 il idi ki, doğma yurdumuzdan didərgin düşmüşdük. Şükür Allaha ki, Prezidentimizin və ordumuzun sayəsində yenidən öz torpaqlarımıza qayıtdıq. Burada həm gözəl evlər tikilib, həm də yaşayış üçün lazımi şərait yaradılıb. Kəndə qayıdan əhalinin işlə təmin olunmasına da diqqətlə yanaşılır. Kənddə yaradılan 15 istixanadan biri də bizim ailəmizə verilib. İlkin olaraq xiyar bitkisi becərmişik və bu günədək 400 kiloqram məhsul satmışıq. Məhsul yığımı başa çatdıqdan sonra digər tərəvəz bitkiləri becərəcəyəm”.
Kəndin digər sakini Şahsuvar Şirinov da əhalinin məşğulluğunun təmin olunması məqsədilə həyata keçirilən layihələrdən razılığını ifadə edib: “15 ilə yaxın Sabirabad rayonunda, sonra isə Biləsuvar rayonunda məcburi köçkün həyatı yaşamışıq. Bu gün isə doğma kəndimizdəyik. Var olsun dövlətimiz, yaşayışımız üçün hər cür şərait yaradılıb. O cümlədən əhalinin işlə təmin olunması üçün tədbirlər görülür. Gördüyünüz kimi, bizə verilən istixanalarda xiyar becərmişik. Pomidor əkməyi də nəzərdə tutmuşam. Göstərilən yüksək diqqət və qayğıya görə dövlətimizin başçısına minnətdarlığımı bildirirəm”.
Qeyd edək ki, Azərbaycan Prezidentinin müvafiq sərəncamları əsasında Cəbrayıl rayonunun Cocuq Mərcanlı kəndində əkin sahələrinin suvarma suyu ilə təmin edilməsi sakinlərin kənd təsərrüfatı ilə məşğul olmalarına şərait yaradıb. Kənd Təsərrüfatı Nazirliyinin dəstəyi ilə kənddə qarğıdalı, şəkər çuğunduru və digər bitkilər becərilib. İqtisadiyyat Nazirliyinin və Türkiyənin Azərbaycandakı səfirliyinin birgə həyata keçirdiyi layihələr çərçivəsində Cocuq Mərcanlı kəndində istixanalarla yanaşı, arıçılıq təsərrüfatları da yaradılıb. Türkiyə ilə birgə həyata keçirilən layihələrin davamı olaraq burada suvenir istehsalı müəssisəsinin tikintisinə başlanılıb. Kənddə, həmçinin 150 başlıq cins heyvandarlıq kompleksinin yaradılması da nəzərdə tutulur.

Paylaş:

Baxılıb: 480 dəfə