Sumqayıtda bal və bal məhsullarının qablaşdırılması və arı yemi istehsalı müəssisəsinin açılış mərasimi keçirilib

Bakı:

30 °C

39 %

0 m/s

AZ RU EN

Ana səhifə / Sosial / Sumqayıtda bal və bal məhsullarının qablaşdırılması və arı yemi istehsalı müəssisəsinin açılış mərasimi keçirilib

Sumqayıtda bal və bal məhsullarının qablaşdırılması və arı yemi istehsalı müəssisəsinin açılış mərasimi keçirilib

30.11.2018 [10:21]

TİKA-nın dəstəyi, Qubadlı rayon İcra Hakimiyyətinin təşəbbüsü ilə tikilmiş müəssisədə arıçılar tərəfindən istehsal edilən ballar “Dağ arıçıları” İctimai Birliyi tərəfindən qablaşdırılır və “Qarabağlı” markası altında satışa çıxarılır
Türkiyə Respublikasının Azərbaycandakı səfirliyinin, Türk Əməkdaşlıq və Koordinasiya Agentliyinin (TİKA) və “Dağ arıçıları” İctimai Birliyinin dəstəyi, həmçinin Qubadlı rayon İcra Hakimiyyətinin təşəbbüsü ilə Sumqayıtda bal və bal məhsullarının qablaşdırılması və arı yemi istehsalı müəssisəsi yaradılıb. Dünən Sumqayıt şəhərinin Yaşıldərə yaşayış massivində tikilmiş müəssisənin açılış mərasimi keçirilib. Tədbirdə Türkiyənin Azərbaycandakı fövqəladə və səlahiyyətli səfiri Erkan Özoral, Qubadlı rayon İcra Hakimiyyətinin başçısı Malik İsaqov, TİKA-nın nümayəndəsi Teoman Tiryaki, ASAN ABAD-ın direktoru Rüfət Elçiyev, Kənd Təsərrüfatı Nazirliyinin heyvandarlıq şöbəsinin mütəxəssisi Fəxrəddin Səmədov, rayonun idarə, müəssisə rəhbərləri və arıçılıqla məşğul olan şəxslər iştirak ediblər.
Tədbirdə çıxış edən Qubadlı rayon İcra Hakimiyyətinin başçısı Malik İsaqov ölkəmizdə arıçılığın inkişaf etdirilməsi məqsədi ilə son illərdə bir sıra tədbirlərin həyata keçirildiyini diqqətə çatdırıb. Vurğulanıb ki, Azərbaycan Respublikası Kənd Təsərrüfatı Nazirliyinin Heyvandarlıq Elmi Tədqiqat İnstitutunun nəzdində Arıçılıq Mərkəzi yaradılıb, habelə Azərbaycan Arıçılar Assosiasiyası təsis edilib. Qubadlı rayon sakinlərinin məskunlaşdığı ərazilərdə də arıçılığı inkişaf etdirmək məqsədi ilə son illərdə bir sıra tədbirlər həyata keçirilib. Bunun nəticəsi olaraq arı ailələrinin sayı 5 min 200-ə yaxınlaşıb. Arı ailələrinin sayının artırılması ilə yanaşı, məhsuldarlığın yüksəldilməsi, damazlıq-seleksiya işlərinin yaxşılaşdırılması, istehsal olunan arı məhsullarının mərkəzləşdirilmiş qaydada qablaşdırılması və etiketləmə məsələlərinin də həyata keçirilməsi işinə artıq başlanılıb. Bu məqsədlə güzəştli kreditlər alınaraq Qubadlı sakinlərinin məskunlaşdığı yerlərdə yeni istehsal müəssisəsi yaradılır ki, bu da sakinlərin işlə təmin olunması və arıçılığın potensial imkanlarının daha da genişləndirilməsinə xidmət göstərir.
Qeyd olunub ki, arıçılığı inkişaf etdirmək məqsədi ilə Azərbaycan Respublikasının Prezidentinin müvafiq Sərəncamı ilə arıçılıqla məşğul olan fiziki və hüquqi şəxslərə saxladıqları hər arı ailəsinə (pətəyə) görə 2018-ci il də daxil olmaqla 5 (beş) il müddətində ildə 10 manat məbləğində subsidiya müəyyən edilib. Artıq subsidiyaların verilməsi işinə start verilib.
Tədbirdə Türkiyənin Azərbaycandakı fövqəladə və səlahiyyətli səfiri Erkan Özoral, TİKA-nın nümayəndəsi Teoman Tiryaki çıxış ediblər, müəssisənin açılışı ilə əlaqədar rayon arıçılarını təbrik ediblər. Daha sonra çıxış edən “Dağ Arıçıları” İB-nin sədri, arıçılıq üzrə mütəxəssis Yusif Quliyev müəssisənin fəaliyyəti barədə geniş məlumat verib.
Açılış mərasimindən sonra müəssisə ilə tanışlıq olub. Qeyd edilib ki, arıçılar tərəfindən istehsal edilən ballar müəssisədə “Dağ arıçıları” İctimai Birliyi tərəfindən qablaşdırılır və “Qarabağlı” markası altında satışa çıxarılır. İstehsal həcmi ildə 20 ton olan müəssisədə birinci mərhələdə məcburi köçkün arıçıların məhsulları bir marka ilə buraxılacaq. Həmçinin müəssisədə hər il 10 ton arı tortunun istehsalı da planlaşdırılır və arıçılara münasib qiymətə satılacaq.
Sonda tədbir iştirakçıları müəssisənin istehsal etdiyi arı məhsullarının sərgisi ilə tanış olublar.
Pərviz SADAYOĞLU

Paylaş:

Baxılıb: 556 dəfə