Ədliyyə Nazirliyinin tibb xidmətinə qulluğa qəbul olunan hərbi tibb fakültəsinin məzunları ilə görüş keçirilib

Bakı:

27 °C

62 %

17 m/s

AZ RU EN

Ana səhifə / Sosial / Ədliyyə Nazirliyinin tibb xidmətinə qulluğa qəbul olunan hərbi tibb fakültəsinin məzunları ilə görüş keçirilib

Ədliyyə Nazirliyinin tibb xidmətinə qulluğa qəbul olunan hərbi tibb fakültəsinin məzunları ilə görüş keçirilib

05.09.2019 [09:37]

Azərbaycan Prezidenti İlham Əliyevin ədliyyə orqanlarının inkişafı, o cümlədən penitensiar sistemin təkmilləşdirilməsi ilə bağlı tapşırıqlarına uyğun olaraq məhkumların və təqsirləndirilən şəxslərin sağlamlığının mühafizəsi, onlara göstərilən tibbi xidmətin səviyyəsinin yüksəldilməsi üzrə məqsədyönlü tədbirlər davam etdirilir. Bu sahədə beynəlxalq təşkilatlarla səmərəli əməkdaşlıqda müsbət nəticələrə nail olunub və artıq bir çox dövlətlər Azərbaycan təcrübəsindən faydalanırlar.
Ədliyyə Nazirliyinin mətbuat xidmətindən AZƏRTAC-a bildiriblər ki, penitensiar sahədə fəaliyyətin müasirləşdirilməsi, həmçinin ədliyyə işçilərinin tibbi təminatının gücləndirilməsi məqsədilə Ədliyyə Nazirliyində yüksək ixtisaslı həkimlərə ehtiyac nəzərə alınaraq Nazirlər Kabinetinin sərəncamına əsasən Azərbaycan Tibb Universitetinin (ATU) hərbi tibb fakültəsinə 2009-cu ildən etibarən nazirlik üçün tələbə qəbulu həyata keçirilir. Nazirlik tərəfindən həmin tələbələrlə təhsil müddətində mütəmadi əlaqə saxlanılıb, onlara penitensiar və tibb xidmətlərində qulluq keçmənin xüsusiyyətləri aşılanıb, bu sahədə təcrübə keçməklə peşə vərdişlərinə yiyələnmələrinə hər cür şərait yaradılıb.
Ədliyyə Nazirliyi üçün hazırlanan ATU-nun hərbi tibb fakültəsinin xüsusi təhsil almış builki 15 məzunu nazirliyin sərəncamına göndərilib.
Ədliyyə naziri Fikrət Məmmədov ədliyyə orqanlarına qulluğa qəbul edilən gənc həkimləri qəbul edib.
Tədbirdən öncə Fəxri xiyabanda müstəqil Azərbaycan dövlətinin qurucusu, xalqımızın Ümummilli Lideri Heydər Əliyevin məzarını ziyarət edən gənclər, dahi şəxsiyyətin abidəsi önünə gül dəstələri düzüb, əziz xatirəsini ehtiramla yad ediblər.
Nazirlikdə keçirilmiş tədbirdə çıxış edən nazir F.Məmmədov Ulu Öndərin siyasi kursunu layiqincə davam və inkişaf etdirən Prezidentimiz İlham Əliyevin rəhbərliyi ilə respublikamızın davamlı sosial-iqtisadi tərəqqisini, dünyada ən islahatçı dövlətlərdən olduğunu və bütün sahələrdə qazanılan yüksək nailiyyətləri vurğulayıb, Azərbaycan ədliyyəsinin inkişafı və müasirləşdirilməsi üzrə görülən işlər barədə məlumat verib, dövlətimizin gənclərin hərtərəfli inkişafına yüksək qayğısından bəhs edib.
Bildirib ki, ölkəmizdə uğurla həyata keçirilən dövlət gənclər siyasətinə uyğun olaraq ədliyyə orqanlarında gənclər geniş təmsil olunurlar. Onların işlə təminatı daim diqqətdə saxlanılaraq müasir İKT-lər tətbiq olunmaqla və vətəndaş cəmiyyəti institutlarının iştirakı ilə şəffaf seçimlər əsasında qulluğa qəbul edilirlər. Hazırda ədliyyə sistemində çalışan işçilərin təxminən yarısını gənclər təşkil edir və onlar ədliyyənin müxtəlif sahələrində uğurla fəaliyyət göstərirlər.
Eyni zamanda, ölkədə geniş vüsət alan könüllülük hərəkatının ədliyyə sahəsində təşviq olunaraq hazırda 600-dən çox ədliyyə könüllüsünün fəaliyyətə cəlb edildiyi bildirilib.
Penitensiar sistemdə və tibb xidmətində aparılan islahatlardan geniş söhbət açan nazir məzunlara dövlətçiliyə sədaqətlə xidmət etmələri, insanlara qayğılı münasibət göstərmələri, xidməti vəzifələrini layiqincə yerinə yetirmələri, etik davranış qaydalarına dönmədən əməl olunması barədə tapşırıqlarını verib, uğurlu fəaliyyət arzulayıb.
Çıxış edən məzunlar müstəqil Azərbaycanımızın gələcək tərəqqisi naminə əzmlə çalışacaqlarını, dövlət gənclər siyasətini uğurla davam etdirən ölkə başçısına layiqli yardımçı olacaqlarını vurğulayaraq, vəzifə borclarını məsuliyyətlə yerinə yetirəcəklərinə, ədliyyə işçisi adını şərəflə daşıyacaqlarına və daim uca tutacaqlarına söz veriblər.
Yeni təyinat alan həkim-zabitlər Azərbaycan Respublikasının dövlət bayrağı önündə təntənəli qaydada and içiblər.

Paylaş:

Baxılıb: 571 dəfə