Pandemiya ilə mübarizə dövründə Azərbaycan polisinin üzərinə ağır məsuliyyət düşür

Bakı:

25 °C

65 %

9 m/s

Əlaqə

AZ RU EN

Ana səhifə / Sosial / Pandemiya ilə mübarizə dövründə Azərbaycan polisinin üzərinə ağır məsuliyyət düşür

Pandemiya ilə mübarizə dövründə Azərbaycan polisinin üzərinə ağır məsuliyyət düşür

13.06.2020 [09:52]

Ekspertlərin fikrincə, polis əməkdaşları sərtləşdirilmiş karantin rejiminə nəzarəti yüksək səviyyədə təmin edib və öz vəzifələrini peşəkarlıqla yerinə yetiriblər
Məlum olduğu kimi, yeni növ koronavirus (COVID-19) infeksiyasının ölkəmizdə geniş yayılmasının qarşısının alınması istiqamətində görülən işlər öz müsbət nəticəsini verib. Lakin karantin rejiminin yumşaldılması dövründə yoluxma hallarının artması məhdudlaşdırıcı tədbirlərin yenidən sərtləşdirilməsi zərurətini gündəmə gətirib. Nazirlər Kabinetinin xüsusi karantin rejiminin sərtləşdirilməsi ilə bağlı əlavə tədbirlər barədə qərarına əsasən, ötən həftənin şənbə və bazar günləri Bakı, Sumqayıt, Gəncə, Lənkəran şəhərləri və Abşeron rayonunda əhalinin yaşayış yerlərini və ya olduğu yerləri tərk etməsi qadağan edilib. Təbii ki, sözügedən qərarın icrasını təmin etmək üçün Azərbaycan polisi öz xidməti borcunu peşəkarlıqla yerinə yetirib və sərt karantin rejiminin tələblərini pozanlara qarşı müvafiq tədbirlər görülüb.
Təəssüf ki, bəzi radikal müxalifət təmsilçiləri karantin rejiminin sərtləşdirilməsini sabotaj etməyə uğursuz cəhdlər göstərir, sosial şəbəkələrdə təxribat xarakerli çağırışlar səsləndirirlər. Buna baxmayaraq, Azərbaycan cəmiyyətinin müxtəlif təbəqələrinin nümayəndələri indiki şəraitdə polis əməkdaşlarının öz peşə fəaliyyətini yerinə yetirmələrinə hərtərəfli dəstək verirlər.
Məsələyə münasibət bildirən Milli Məclisin deputatı Kamilə Əliyeva deyib ki, xüsusi karantin rejiminə əməl olunmasına nəzarət üzrə əsas məsuliyyət Azərbaycan polisinin üzərinə düşür: “İctimai asayişi və qanunçuluğu qoruyan polis əməkdaşları pandemiya dövründə də əsl fədakarlıq nümayiş etdirirlər. Hər zaman dövlətçiliyimizə sadiq olan polislər ötən şənbə və bazar günlərində gücləndirilmiş iş rejimində çalışıb, sərtləşdirilmiş karantin rejiminə nəzarəti yüksək səviyyədə təmin ediblər. Polis əməkdaşları öz üzərlərinə düşən vəzifəni peşəkarlıqla yerinə yetiriblər”.
K.Əliyevanın sözlərinə görə, Azərbaycan cəmiyyəti, həmçinin polislərin qayğıkeşliyinin şahidi olub: “Məlum olduğu kimi, əhalinin sağlamlığınln qorunması və koronavirusun yayılmasının qarşısının alınması üçün tədbirlərin həyata keçirilməsi zamanı Azərbaycan polisi mühüm funksiya yerinə yetirir. Eyni zamanda xüsusi karantin rejimində polislər vətəndaşların da qayğısına qalırlar. Bu baxımdan, sosial şəbəkələrdə yayılan videogörüntülər təqdirəlayiqdir. Polis əməkdaşları humanizm nümunəsi göstərərək bir qadını bacısının dəfn mərasiminə çatdırır, ərzağa ehtiyacı olan digər qadına yardım edirlər. Belə nümunələr çoxdur”.
Bütün dünyanı bürüyən COVID-19-la mübarizə çərçivəsində dövlət tərəfindən lazımi addımlar atıldığını qeyd edən Milli Məclisin deputatı Ramil Həsən isə deyib ki, görülən bütün tədbirlər, qoyulan qadağalar əhalinin sağlamlığı və təhlükəsizliyinin təmin olunmasına yönəlib: “Azərbaycan hüquqi dövlətdir. Heç kim və heç nə qanunlardan üstün deyil. Yaddan çıxarmaq olmaz ki, dövlət o zaman güclü olur ki, qanunlar ali olur, qanunlar işləyir. Hər bir vətəndaş dövlətin bütün qanunlarının aliliyinə riayət etməlidir”.
Sərt karantin rejimi günlərində həyata keçirilən tədbirlərin icrası zamanı polisin fəaliyyəti ilə bağlı xarici ölkələrdən dəstək alan bəzi antimilli ünsürlərin sabotaj cəhdlərinə münasibət bildirən R.Həsən vətəndaşları sosial şəbəkələrdəki təxribat hallarına qarşı ayıq-sayıq olmağa çağırıb: “Yasamalda baş verən xoşagəlməz hadisə - vətəndaşın onu qanuna riayət etməyə dəvət edən polisə müqavimət göstərməyə çalışması, polisə qarşı digər hərəkətlər, eyni zamanda bəzi üzdəniraqların “beşinci kolon”un tör-töküntüləri vasitəsilə xaricdə oturub bu hadisələrdən Azərbaycanın əleyhinə istifadəetmə cəhdləri qınanılmalıdır. Hər bir vətəndaşımız tətbiq edilən qaydalara riayət etməli, polisinin və dövlətinin yanında olmalıdır”.
Qaşqay ZİYƏDDİNOĞLU

Paylaş:

Baxılıb: 488 dəfə