Nərimanov rayonunda Vətən müharibəsinin iştirakçısı, qazi Amil Məmmədov ziyarət olunub

Bakı:

26 °C

56 %

3 m/s

Əlaqə

AZ RU EN

Ana səhifə / Sosial / Nərimanov rayonunda Vətən müharibəsinin iştirakçısı, qazi Amil Məmmədov ziyarət olunub

Nərimanov rayonunda Vətən müharibəsinin iştirakçısı, qazi Amil Məmmədov ziyarət olunub

10.02.2021 [09:18]

19 saylı Nərimanov seçki dairəsindən Milli Məclisin deputatı, “Yeni Azərbaycan” qəzetinin baş redaktoru Hikmət Babaoğlu və Yeni Azərbaycan Partiyası (YAP) Nərimanov rayon təşkilatının sədri Təmraz Tağıyev, həmçinin rayon təşkilatının bir qrup üzvü Nərimanov rayonunun sakini, Vətən müharibəsinin iştirakçısı, qazi Amil Habil oğlu Məmmədovu ziyarət ediblər.
Görüş zamanı Milli Məclisin deputatı, “Yeni Azərbaycan” qəzetinin baş redaktoru Hikmət Babaoğlu Müzəffər Ali Baş Komandan İlham Əliyevin rəhbərlik etdiyi rəşadətli Ordumuzun 44 gün müddətində əzəli və əbədi torpaqlarımızı düşmən işğalından azad etməsi, həmçinin “Dəmir yumruq” əməliyyatı ilə xalqımızın qəlbindəki 30 illik nisgilə birdəfəlik son qoyulması barədə söhbət açıb. Hikmət Babaoğlu qeyd edib ki, Vətən müharibəsində əsgər və zabitlərimiz əsl qəhrəmanlıq nümunəsi göstəriblər.
Millət vəkili bildirib ki, müharibə dövründə dövlətimizin başçısının “Biz birlikdə güclüyük!” şüarını rəhbər tutan xalqımızın igid övladlarının ön cəbhədə, bütün Azərbaycan xalqının isə arxa cəbhədə səfərbər olması qürurvericidir. Müharibə gənclərimizin yüksək vətənpərvərlik ruhunu aydın şəkildə nümayiş etdirdi. Hikmət Babaoğlu qəhrəman əsgərlərimizin döyüş meydanlarında göstərdiyi şücaətin tarixin yaddaşına həkk olunduğunu diqqətə çatdırıb, şəhidlərimizə Allahdan rəhmət, qazilərimizə şəfa diləyib.
YAP Nərimanov rayon təşkilatının sədri Təmraz Tağıyev də xalqımızın qəhrəman oğulları ilə qürur duyduğunu bildirib, onların torpaqlarımızı işğaldan azad etməklə tarix yazdıqlarını söyləyib. Bu müharibə həm də bütün dünyaya ölkəmizin gücünün və xalqımızın birliyinin nümayişi oldu.
Vətən müharibəsinin iştirakçısı, qazi Amil Məmmədov keçdiyi döyüş yolu barədə danışıb. O, Vətən müharibəsinin başlandığı ilk gündən döyüşlərdə olduğunu bildirib. Birinci dəfə Cəbrayılın azad edilməsi uğrunda gedən döyüşlərdə yaralanıb. O, 10 gün hərbi hospitalda müalicə olunduqdan sonra yenə ön cəbhəyə qayıdaraq döyüşlərə qatılıb.
Amil noyabrın 3-dək gedən döyüşlərdə də iştirak edərək bir çox ərazilərimizin düşməndən azad olunması uğrunda rəşadətlə vuruşub. Həmin gün isə Şuşa uğrunda gedən döyüşlərdə ikinci dəfə yaralanıb. Amil Məmmədov döyüşlər zamanı göstərdiyi qəhrəmanlığa görə Azərbaycan Prezidenti tərəfindən medallarla təltif olunub.
Görüş zamanı qazi və onun ailəsinin qayğıları dinlənilib, problemlərinin həlli istiqamətində müvafiq addımların atılacağı diqqətə çatdırılıb. Həmçinin ailəyə maddi yardım göstərilib.
Qazinin anası göstərilən diqqətə görə öz razılığını bildirib.

Paylaş:

Baxılıb: 683 dəfə