Kondisionerdən uzun müddət istifadə edilməsi hansı fəsadlara səbəb olur?

Bakı:

21 °C

68 %

3 m/s

Əlaqə

AZ RU EN

Ana səhifə / Sosial / Kondisionerdən uzun müddət istifadə edilməsi hansı fəsadlara səbəb olur?

Kondisionerdən uzun müddət istifadə edilməsi hansı fəsadlara səbəb olur?

04.08.2021 [08:31]

Son günlər müzakirə olunan əsas məsələlərdən biri kondisionerdən uzun müddət istifadə olunmasının sağlamlığa necə təsir göstərməsidir. Mütəxəssislərin sözlərinə görə, kondisioner işləyən otaqda havanı mütəmadi olaraq dəyişmək və bu otaqda maksimum iki saat qalmaq lazımdır. Ümumiyyətlə, kondisionerli otaqla bayırdakı havanın temperaturu arasında fərq az olmalıdır.
Məsələ ilə bağlı həkim-terapevt Sevil Bağırova bildirib ki, isti havalarda kondisioner ağciyərlərdə bir sıra ağır fəsadlara, hətta tənəffüs orqanlarında iltihabi problemlərin yaranmasına səbəb ola bilər: “Otaqda kondisioner işləməsi ağciyərlərində pnevmoniya, bronxlarında iltihab olanlarda öskürəyin təkrar artmasına və yaxud allergik reaksiyanın baş qaldırmasına səbəb ola bilər. Hər hansı xroniki infeksiyası, öskürəyi, burun tənəffüsü problemi olanlar kondisionerdən nə qədər çox istifadə etsələr, o qədər də narahatlıq hiss edəcəklər. Burada söhbət yalnız soyuq havadan getmir, isti havanın da orqanizmə mənfi təsirləri var. Soyuq qış aylarında kondisionerin isti havası otaqda quruluq yaradır, rütubəti azaldır. Bu cür hava yuxarı tənəffüs yollarının qıcıqlanmasına, bronxospazmın yaranmasına səbəb olur. Eyni zamanda, qapalı şəraitdə hava-damcı yolu ilə yoluxan kəskin respirator xəstəliklərin yayılmasına da gətirib çıxarır”.
Onun sözlərinə görə, kondisionerdən istifadə ürək-damar sistemi xəstəlikləri olanlarda da bir sıra problemlər yaradır: “Həmin xəstələrin olduğu mühitdə temperatur 24 dərəcədən aşağı olmamalıdır. İsti havadan soyuğa keçəndə damarlarda kəskin spastik sindrom aşkarlanır. Bu zaman kardioloji xəstələrdə ürək-damar problemi riski artır, xroniki xəstəliklər kəskin mərhələyə keçir. Onlarda təzyiq oynamaları, infarkt və digər ürək xəstəliklərinin yaranma riski çoxalır. Çünki hava şəraitinin kəskin dəyişməsi zamanı su-duz mübadiləsinin pozulması yaranır”.
Mütəxəssisin sözlərinə görə, əsas məqamlardan biri də kondisionerin təmizliyidir, çünki filtrdə yığılan mikrob və bakteriyalar havaya qarışaraq infeksiya yaradır: “Astma kimi allergik reaksiyaların artması ilə nəticələnir. Həmin bakteriyalar da ağciyərlərdə xəstəliyə səbəb ola bilər. Cihazdan düzgün istifadə edilməməsi, dezinfeksiya olunmaması, havalandırma sisteminin vaxtında təmizlənməməsi də xəstələnməyə şərait yaradır. Bundan başqa, vaxtaşırı otağın havası dəyişdirilməlidir. Ondan uzunmüddətli istifadə müxtəlif bakterial xəstəliklərə, dəri problemlərinə, baş və əzələ ağrısına səbəb olur. Çalışmaq lazımdır ki, körpə olan otağa kondisioner yerləşdirilməsin”.
MÜŞFİQƏ

Paylaş:

Baxılıb: 748 dəfə