İsveçrə Azərbaycanda hansı layihələri maliyyələşdirəcək?

Bakı:

23 °C

64 %

5 m/s

Əlaqə

AZ RU EN

Ana səhifə / Sosial / İsveçrə Azərbaycanda hansı layihələri maliyyələşdirəcək?

İsveçrə Azərbaycanda hansı layihələri maliyyələşdirəcək?

14.12.2021 [10:12]

Səfir Muriel Peneveyre və İsveçrə Əməkdaşlıq Ofisinin (SECO) Cənubi Qafqaz üzrə Regional direktorunun müavini Alberto Hernandes Cənubi Qafqaz üçün yeni əməkdaşlıq proqramına həsr olunan mətbuat konfransı keçirib

Nicat Dilqəmli

Dekabrın 13-də İsveçrənin Azərbaycandakı və Türkmənistandakı fövqəladə və səlahiyyətli səfiri Muriel Peneveyre Cənubi Qafqaz üçün yeni əməkdaşlıq proqramına həsr olunan mətbuat konfransı keçirib. İkitərəfli münasibətlərin tarixindən bəhs edilən tədbirdə gələn il Azərbaycan ilə İsveçrə arasında diplomatik münasibətlərin 30 illiyinin qeyd olunacağı diqqətə çatdırılıb. Səfir daha çox ticarət və sərmayə, həmçinin turizm sahələrində əlaqələrin inkişafı ilə bağlı danışıb. O deyib ki, Azərbaycanda həyata keçirdikləri layihələr qarşılıqlı fayda kəsb edərək ölkənin bütün bölgələrini əhatə etməkdədir.

Azərbaycanla çoxtərəfli əlaqələrin tarixindən danışan səfir bildirib ki, əgər daha öncə İsveçrə ölkəmizə qaçqın və məcburi köçkünlərlə bağlı yardımlar edirdisə, indi Azərbaycanın sürətli inkişafı nəticəsində artıq müxtəlif fəaliyyət sahələri üzrə layihələr reallaşdırılır, qarşılıqlı-faydalı əməkdaşlıq qurulub.

Bu günə qədər görülən işlərdən danışan M.Peneveyre qeyd edib ki, İsveçrə Naxçıvanda 130 kəhrizin qurulmasına 4 mln. ABŞ dolları məbləğində vəsait ayırıb. Diqqətə çatdırılıb ki, son 22 ildə 90 layihənin həyata keçirilməsinə 110 milyon ABŞ dolları dəyərində maliyyə vəsaiti ayrılıb.

Sonra konfransda 2022-2025-ci illərdə Cənubi Qafqaz regionu üçün İsveçrə Əməkdaşlıq Proqramı barədə geniş məlumat verilib. Xanım M.Peneveyre Əməkdaşlıq Proqramında 4 əsas sahəyə - regionda vətəndaş cəmiyyəti fəaliyyəti və əməkdaşlığı, demokratiyanın gücləndirilməsi və ictimai institutlar, iqtisadi inkişafın yaxşılaşdırılması və layiqli iş yerlərinin yaradılması, eləcə də iqlim dəyişikliklərinə hazırlıqların gücləndirilməsi və resurs idarəetməsinin dayanıqlılığı - diqqət yetiriləcəyini bildirib. Mümkün qədər gender bərabərliyi və yaxşı idarəetmə Cənubi Qafqazda İsveçrə tərəfindən maliyyələşdirilən bütün layihələrdə nəzərə alınacaq.

Bildirilib ki, İsveçrənin Azərbaycana dəstəyi ictimai maliyyə idarəçiliyinin gücləndirilməsi, biznes mühitinin, aqrar sektorda maliyyə əlçatanlığının yaxşılaşdırılması, eləcə də qadınların iqtisadi cəhətdən gücləndirilməsi sahələrinə fokuslanmaqda davam edəcək. Bu tematik mövzularla yanaşı, İsveçrə yerli QHT-lərin gender bərabərliyi, ətraf mühit və iqlim dəyişikliyi, inklüzivlik və rəqəmsallaşma kimi mövzularda təşəbbüslərini də maliyyələşdirməyi davam etdirəcək. Bundan başqa, İsveçrə böyük bir regional mədəniyyət və incəsənət proqramı çərçivəsində mədəniyyət layihələrinin maliyyələşdirilməsi ilə incəsənət sahəsini də dəstəkləyəcək.

Vurğulanıb ki, bütün bu təşəbbüslər İsveçrənin Azərbaycandakı 20 illik fəaliyyətinin üzərində qurulacaq. Bu fəaliyyətin son nailiyyətləri arasında biznes mühitinin və maliyyəyə çıxışın yaxşılaşdırılması üçün Özəl Kredit Bürosunun və Daşınan Əmlakın Qeydiyyatının yaradılması, hökumət maliyyə statistikası və makroiqtisadi proqnozlaşdırma üzrə qabiliyyətin artırılması, eləcə də Sabirabad, Qusar və Bakının Xəzər rayonundakı üç qadın resurs mərkəzi vasitəsilə qadınların iqtisadi cəhətdən gücləndirilməsinin dəstəkləndiyini qeyd etmək olar.

Konfransda çıxış edən İsveçrə Əməkdaşlıq Ofisinin (SECO) Cənubi Qafqaz üzrə Regional direktorunun müavini Alberto Hernandes bildirib ki, İsveçrə hökumətinin Cənubi Qafqaz regionunda 2022-2025-ci illər üçün əməkdaşlıq proqramında inklüziv iqtisadi inkişaf, iqtisadiyyatın idarəolunması və iqlim dəyişikliyi ön plandadır. Onun sözlərinə görə, proqramın 80 milyon İsveçrə frankı həcmindəki büdcəsinin 50 milyon frankı regional layihələrə, 10 milyon frankı isə Azərbaycan iqtisadiyyatında ikitərəfli layihələrin icrasına yönəldiləcək.

“Yeni Azərbaycan” qəzetinin əməkdaşının təhsildə qarşılıqlı əlaqələrlə bağlı verdiyi suala cavab olaraq diplomat təhsil sahəsində də əməkdaşlığın yüksək səviyyədə olduğunu, Azərbaycan üçün əlverişli təqaüd proqramları təqdim etdiklərini vurğulayıb.

Paylaş:

Baxılıb: 964 dəfə