Hər kəsin içində bir peşmanlıq qəbiristanı var...

Bakı:

26 °C

44 %

7 m/s

Əlaqə

AZ RU EN

Ana səhifə / Sosial / Hər kəsin içində bir peşmanlıq qəbiristanı var...

Hər kəsin içində bir peşmanlıq qəbiristanı var...

23.02.2022 [10:24]

MÜŞFİQƏ

“Etdiyimiz əməllərimizə görə peşmanlıq hissi zamanla keçər, amma etmədiklərimizin peşmanlığı isə ömür boyu çəkər” deyiblər. Bəzən etmədiklərimizə görə, bəzən də etdiklərimizə görə peşman oluruq. Kimlərəsə görə peşmanlıq vicdanımızdakı hisslərdən biridir. Onun vəzifəsi keçmişə üz tutmaq və onu mühakimə etməkdən ibarətdir. Araşdırmalara görə, qadınlar kişilərə nisbətən bu hissi daha çox yaşayırlar.

Unutmayaq ki, cəhd etməmək artıq uğursuzluğu etiraf etmək deməkdir. Uğursuzluq yaşamaq qorxusu ilə arzu və istəklərimizi heçə sayırıq. Onları görməzlikdən gəlirik. Gələcəyə yox, keçmişə köklənirik. Ancaq keçmişdə qalırıq və keçmişdə etdiyimiz əməllərin sorğu-sualını aparırıq. Yeni bir səhifə açmaq barədə belə düşünmürük. Bununla gələcəyimizi də məhv etmiş oluruq. Mütəxəssislər deyir ki, bu barədə çox düşünmək insanı xroniki bədbinliyə aparır. Bəs peşmanlıq hissi niyə bizi rahat buraxmır? Bu hissi özümüzdən necə uzaqlaşdıraq?

Peşmanlıq hissi depressiyaya salır

Mövzu ilə bağlı psixoloq İlhamə Vəliqızı ilə söhbətləşdik. İ.Vəliqızı deyir ki, bütün problemlərin kökündə özünə güvənsizlik dayanır: “İnsanlar komfort zonalarından çıxmağa risk etmirlər. İndiki həyata öyrəşdikləri üçün ömrün hansı axarla gedəcəyini bilirlər. Amma yeni bir həyatda onları nə gözləyəcəyindən xəbərsizdilər. Ona görə də peşman olsa belə bu hisslə yaşamağa davam edirlər. Bu kimi hadisələri daha çox ailədaxili şiddətə məruz qalan qadınlar yaşayırlar. Yeni həyat tərzi seçməyin düşüncəsi belə onu qorxutmağa kifayət edir. “Mən getsəm, bugünkü vəziyyətimdən daha yaxşı olacaq, ya peşman olacağam?” deyə özlərini sorğu-sual edirlər. Bu kimi insanlar uşaqlıqdan ciddi uğursuzluğa düçar olublar. Onlar artıq həyatlarının digər mərhələlərində də bu uğursuzluğa düçar olacağından qorxurlar. Sosial həyatlarına da təsir edir və nəticədə tək qalırlar. Hətta qarşılarına çıxan fürsətləri də bilmədən qaçırmış olurlar”.

Kaş ki... bilsəydim ki... peşmanam ...

“Kaş ki, bilsəydim ki, peşmanam kimi fikirlərin sahibi öncə özü dərk etməlidir ki, bu hiss pisdir və onun illərini, gələcəyini məhv edir. Dəyişmək istəyən insanın qarşısını heç kim ala bilməz. Psixoloji dəstək almalı, diaqnostika edilməli və peşmanlıq hissinin əsaslı yaxud əsassız olması üzə çıxmalıdır. Nə qədər erkən üzə çıxarılsa, bir o qədər tez həmin insan o vəziyyətdən xilas olacaq. Müddətli olaraq bu kompleksdən azad olmaq mümkündür. Oxucularımıza məsləhətim odur ki, özünüzə bunu yaşatmayın. Hər bir çətinlikdən çıxış yolu var. Yetər ki, siz bunu özünüzdə görün və dəyişin”, - deyə psixoloq vurğulayıb.

Şairə Kəmalə Abıyevanın da dediyi kimi “Hər kəsin içində bir peşmanlıq qəbrstanı var, ölən ən gözəl duyğuların orada basdırar”.

Hər kəs həyatının müəyyən dövrlərində özünəməxsus şəkildə peşmanlıq yaşayır. Əhəmiyyətli olan isə bu peşmanlıq hissi ilə necə mübarizə aparmaqdır.

Paylaş:

Baxılıb: 1047 dəfə