Dərmanların qiymətinə yenidən baxılacaq

Bakı:

23 °C

49 %

6 m/s

Əlaqə

AZ RU EN

Ana səhifə / Sosial / Dərmanların qiymətinə yenidən baxılacaq

Dərmanların qiymətinə yenidən baxılacaq

30.04.2022 [10:47]

Xüsusi Komissiyanın işi yekunlaşmaq üzrədir

Günel ABBAS

Son vaxtlar kütləvi informasiya vasitələrində dərman vasitələrinin qiymətində də artımla bağlı xəbərlər yayılıb. Məlumata görə, dərman vasitələri bahalaşmaqdan əlavə, satış qiyməti də apteklər üzrə fərqlənir. Ancaq ölkədə bu məsələnin tənzimlənməsi istiqamətində mütəmadi işlər görülməkdədir. Hələ 2015-ci ildən Azərbaycanda dərman vasitələrinin qiymətinin tənzimlənməsinə başlanılıb. Ancaq dünyada gedən proseslər baş verəcək süni artımların qarşısını almaq üçün bəzi məsələlərə yenidən baxmağı, önləmlər almağı şərtləndirir. Artıq səhiyyə naziri Azərbaycanda dərmanların qiymətinə dəyişiklik ediləcəyi ilə bağlı açıqlama verib. Onun sözlərinə görə, Nazirlər Kabinetinin nəzdində dərmanlarla bağlı xüsusi Komissiya yaradılıb. Nazir bildirib ki, həmin sahənin Azərbaycanda sürətli inkişafı üçün müəyyən addımlar atılacaq: “Dərman vasitələrinin keyfiyyətinə, idxalına nəzarət və qiymət tənzimlənməsinə dair müəyyən dəyişikliklər olacaq”.

Milli Məclisin səhiyyə komitəsinin üzvü Müşfiq Məmmədli “Yeni Azərbaycan”a açıqlamasında bildirib ki, komissiyanın yaradılması ilə həmin sahənin tənzimlənməsi üçün müəyyən addımlar atılacaq: “Dərman vasitələrinin keyfiyyətinə, idxalına nəzarət və qiymət tənzimlənməsinə dair müəyyən dəyişikliklər olacaq. Dünya bazarındakı vəziyyətə görə müvafiq olaraq artımlar müşahidə oluna bilər. Ancaq dövlətin bu istiqamətdə müdaxiləsi süni artımın qarşısını almaq məqsədi daşıyır. Dərmanların keyfiyyəti isə Səhiyyə Nazirliyi tərəfindən diqqətdə saxlanılır”.

İqtisadi siyasət, sənaye və sahibkarlıq komitəsinin üzvü Vahid Əhmədovun sözlərinə görə, Ukrayna-Rusiya müharibəsindən irəli gələn səbəblərdən dolayı bütün sahələrdə qiymət artımı var: “Xaricdən kifayət qədər dərman idxal edirik. Bizdə dərmanlar ümumiyyətlə bahadır. İnsanlar dərmanların qiymətində ciddi fərq olduğu üçün xaricdən sifariş edirlər. Ona görə də belə bir komissiyanın yaradılması çox vacibdir. Mütəmadi olaraq Milli Məclisdə də bu məsələni qaldırırdıq. Dərmanların qiyməti çox yüksəkdir, özü də apteklər istədiyi qiymətə satırlar. Dərmanların qiyməti əhali üçün əlçatan olmalıdır ki, insanlar ondan istifadə edə bilsin”.

Deputat bildirib ki, dərmanların qiyməti ilə yanaşı, keyfiyyətində də problemlər var: “Düzdür, qiymətlərin tənzimlənməsi ilə bağlı məsələlərlə məşğul olan qruplar var. Xüsusilə də Antiinhisar xidməti bununla bağlı cərimələr tətbiq, protokollar tərtib edir. Ancaq bu, kifayət deyil”.

V.Əhmədov vurğulayıb ki, süni qiymət artımının qarşısını almaq üçün bir üsul da istehsal etməkdir: “Dövlət başçısının göstərişinə uyğun olaraq fabriklər tikilir, bir neçəsi də istifadəyə verildi. Onların keyfiyyətinə də nəzarət etmək lazımdır ki, dünya standartlarına cavab versin. Eləcə də iri şirkətlərin ölkəmizdə dərman istehsalı ilə məşğul olmasına şərait yaradılması önəmlidir. Hansı ki həmin dərmanlar dünyada tanınır və istifadə edilir. Əks halda, keyfiyyətsiz dərmanlar bizə lazım deyil”.

Paylaş:

Baxılıb: 803 dəfə