Diplomların tanınması ilə bağlı YENİ QAYDALAR

Bakı:

17 °C

82 %

2 m/s

Əlaqə

AZ RU EN

Ana səhifə / Sosial / Diplomların tanınması ilə bağlı YENİ QAYDALAR

Diplomların tanınması ilə bağlı YENİ QAYDALAR

08.02.2023 [10:38]

Xaricdə təhsil alanların sayı artacaq

Yeganə BAYRAMOVA

Xaricdə təhsil alanların diplomlarının tanınması ilə bağlı yeni qaydalar təsdiqlənib. Yeni meyarlar Nazirlər Kabinetinin müvafiq qərarı ilə “Xarici dövlətlərin ali təhsilə aid kvalifikasiyalarının tanınması Qaydaları”nda əks olunub.

Məlumdur ki, xaricdə təhsil alan şəxslərin diplomlarının tanınması ilə bağlı müxtəlif problemlər mövcud idi. Buna səbəb isə bəzi hallarda tələbələrin məlumatsızlığı olurdu. Hansı ki, tələbələr lazımi araşdırma etmədən və kifayət qədər məlumat almadan xaricdə təhsil almağa üstünlük verirdilər. Sonda isə zamanlarını boş yerə sərf edir və Azərbaycanda tanınmayan, keçərsiz olan diplom alırdılar. Diplomların tanınması ilə bağlı yeni qaydalar isə bu sahədəki anlaşılmazlıqların aradan qaldırılmasını təmin edir.

Notarial tərcümələrin təsdiqinə ehtiyac yoxdur

Mövzu barədə “Yeni Azərbaycan”a danışan təhsil üzrə ekspert Elçin Əfəndi yeni dəyişikliklərin müsbət hal olduğunu qeyd edib. Ekspert bildirib ki, dəyişikliyə görə, tədris dili üzrə bilik səviyyəsinin qiymətləndirilməsi məqsədilə təşkil olunan müsahibə mərhələsi ləğv olunub. Yəni tələbələr daha təhsil aldıqlar dildən imtahan verməyəcəklər: “Bundan başqa, xarici ali təhsil müəssisələrinin rus, ingilis və türk dillərində təqdim etdikləri təhsil sənədlərinin notarial qaydada tərcümə olunmuş təsdiqinə ehtiyac olmayacaq. Yeni qaydalarda Səhiyyə və tibb peşə sahələri üzrə ixtisasların qiymətləndirilməsi zamanı Səhiyyə Nazirliyinin rəyinin alınması da nəzərdə tutulub. Bu, doğru addımdır. Təhsilalanın hər bir tədris ili ərzində müvafiq ixtisas üzrə nəzərdə tutulmuş təhsilin normativ müddətinin yalnız yarısı qədər təhsil aldığı ölkənin ərazisində olması tanınma haqqında müsbət rəy üçün kifayət hesab ediləcək. Yəni əvvəllər qiyabi təhsil alan mütləq şəkildə semestr ərzində 15 gün, əyani təhsil alan 90 gün olmalı idisə, indi bu rəqəm yarıya qədər azaldılıb ki, bu da çox yaxşı dəyişiklikdir.

Müvafiq ali təhsil səviyyəsi üçün müəyyən edilmiş minimal kredit sayını toplamayan və dissertasiya işi yazmayan şəxslərin ali təhsil kvalifikasiyalarının şərti tanınması həyata keçiriləcək. Belə ki, həmin şəxslər yerli ali təhsil müəssisələrinin birində çatışmayan kreditləri toplamalı və magistr dissertasiyası hazırlayaraq müdafiə etməli olacaqlar. Şərtlər yerinə yetirildikdə həmin şəxslərin ali təhsil diplomlarının tam tanınması mümkün hesab ediləcək.

Narazılıqlar minimuma enəcək

E.Əfəndi vurğulayıb ki, Nazirlər Kabinetinin təsdiq etdiyi yeni qərar ilk növbədə xaricdə təhsilalma prosesini sadələşdirəcək. Ekspertin sözlərinə görə, yeni qaydalarda əmək və akademik məqamlar əsas götürülür: “Məsələn, hansısa tələbənin xaricdə təhsil aldığı ixtisasa ölkəmizin əmək bazarında yer yoxdur. Bu zaman həmin ixtisasa uyğunluqla bağlı tələbənin Azərbaycanda təcrübə keçməsi yaxud müəyyən biliklərin əldə edilməsinə imkan yaradılır. Tələbə qəbul edirsə, təhsil aldığı ixtisas üzrə imtahan keçirilir və daha sonra onun diplomunun tanınmasına imkan verilir. Məlumdur ki, xaricdə təhsil alan şəxslərin diplomlarının ölkəmizdə tanınması ilə bağlı zaman-zaman narazılıqlar olurdu, yüzlərlə tələbə öz etirazını bildirirdi. Ancaq yeni qərarlar sayəsində bundan sonra həmin etirazların sayı minimuma enəcək. Vətəndaşlar etiraz üçün məhkəməyə müraciət edirdilərsə, artıq Agentliyin tərkibindəki Appelyasiya Komissiyasına müraciət edib məsələyə yenidən baxılmasına nail ola bilərlər”.

Paylaş:

Baxılıb: 1582 dəfə