Təhlükə daşıyıcıları: Motosiklet və mopedlər

Bakı:

17 °C

77 %

2 m/s

Əlaqə

AZ RU EN

Ana səhifə / Sosial / Təhlükə daşıyıcıları: Motosiklet və mopedlər

Təhlükə daşıyıcıları: Motosiklet və mopedlər

27.04.2023 [11:18]

Ölüm saçan sürücülər...

Yeganə BAYRAMOVA

Paytaxt yolları həm sürücülər, həm də piyadalar üçün günü-gündən daha təhlükəli olur. Müşahidələr göstərir ki, yol qəzalarının müəyyən hissəsində tərəflərdən ən azı biri motosiklet sürücüsü olur. Heç gözlənilmədən haradansa çıxır, ya maşınla, ya avtobusla toqquşur, ya da piyadalar vurulur. Sürət isə motosikletlərin ən səciyyəvi xüsusiyyətidir. Çoxu elə bilir ki, motosiklet sürücüsünün bacarması lazım olan ilk və ən lazımlı məqam nəqliyyatı sürətli idarə edə bilməkdir. Qəzalar, bədbəxt hadisələr isə göz qabağındadır...

Piyadaların həssaslığını nəzərə almalıyıq, çünki onlar heç nə ilə qorunmur. Əvvəllər onlar üçün təhlükə əsasən avtomobillərdən gəlirdisə, son vaxtlar artan təhlükə qida çatdırılması şirkətlərinin və kuryer xidmətlərinin əməkdaşları tərəfindən istifadə edilən motosikletlər, mopedlər, skuterlər və hətta velosipedlərdən gəlir.

Bir çox kuryerlər yol hərəkəti qaydalarına məhəl qoymadan tam sürətlə tələsirlər. Məntiq sadədir: nə qədər çox sifariş yerinə yetirilsə, kuryer bir o qədər çox pul qazanacaq. Onlar maşınların arasında manevr edir, əks zolaqda, səkilərdə şütüyür, yolda vəziyyətə nəzarət etmir, yalnız sifarişi tez bir zamanda yerinə necə çatdırmağı düşünürlər.

Qəzalara səbəb qanuna tabe olmamaqdır

Nəqliyyat eksperti, “Avtosfer.az” saytının baş redaktoru Elməddin Muradlı mövzu barədə “Yeni Azərbaycan”a açıqlama verib. Onun fikrincə, qayda-qanuna əməl edilsə, vəziyyət düzələr: “Hər bir nəqliyyat vasitəsinin hərəkəti qanunla tənzimlənir. Sürücülər bunu bilməlidirlər. Motosiklet qəzalarının sayının artmasının əsas səbəbi qanuna tabe olmamaqdır. Onların xeyli hissəsi motosikletlərini dövlət yol nişansız, özü də sürücülük hüququna malik olmadan idarə edirlər. Odur ki, maariflənmə, təbliğat işi aparılmalıdır.

Mühərrikinin həcmi 50 kubmetrdən çox olmayan nəqliyyat vasitəsi moped hesab edilir. Bu nəqliyyat növünə dövlət qeydiyyat nişanı verilmir və bu qanunvericiliklə tənzimlənir. Azərbaycanda mopedlərdən ən çox kuryer işi ilə məşğul olan şəxslər istifadə edir və sürətli çatdırma edərkən yol hərəkət qaydalarını necə gəldi pozurlar. Nəticədə qəzalar baş verir”.

Motosiklet oyuncaq deyil

E.Muradlının sözlərinə görə, nəzarətin güclənməsi də lazımi effekti verəcək: “Dövlət Yol Polisi özlərini “Bağdaddakı kor xəlifə” hesab edənlərin qarşısını almalıdır. Sürücülər unudurlar ki, motosiklet oyuncaq deyil. Onunla zarafat etmək, oynamaq, qayda-qanun tanımamaq ölümlə nəticələnir. Nəzarət güclənsə və bəzi sürücülər cərimələnsə, bu, digərlərinə də dərs olar. Çünki sürücülərin 90 faizi cərimələrdən sonra nizam-intizamlı olmağa başlayırlar”.

Bütün bunlarla yanaşı, ekspert motosikletlərin əleyhinə deyil. Əksinə, E.Muradlı bu nəqliyyat vasitələrinin sayının artmasını yüksək qiymətləndirir: “Karantinlə əlaqədər olaraq çatdırılma xidmətlərinə tələbat artdı. Ümumiyyətlə, son illər ictimai nəqliyyatdakı motosikletlərin sayının çoxaldığını müşahidə edirik. Bu, yaxşıdır. Çünki həm az benzin sərf olunur, həm də tıxacda çox yer tutmur. Eyni zamanda, bu nəqliyyat vasitələrinin daha sürətli olması onların üstünlüyüdür. Amma gərək sadaladığım avantajlardan yararlana bilək. Elə edək ki, söylədiyim məqamlar ölümlə, xəsarətlə nəticələnməsin. Bunun üçün ən vacib olan məqam qayda-qanunu bilmək və əməl etməkdir”.

Təbliğat zəifdir

E.Muradlı hesab edir ki, bu istiqamətdə əhali arasında təbliğat zəif aparılır: “Rayonlarda geniş təbliğata ehtiyac var. Bizdə təbliğat deyəndə “qırmızı işıqda keçməyin, kəməri bağlayın, sərxoş vəziyyətdə maşın sürməyin” və.s kimi fikirlər təkrarlanır. Türkiyədə təbliğat işi ilə ayrıca bir idarə məşğul olur.

İnzibati Xətalar Məcəlləsinin 338.4-cü maddəsinə görə velosipedçilər və moped idarə edən şəxslər tərəfindən yol hərəkəti qaydalarının pozulmasına görə 40 manat cərimə nəzərdə tutulub”.

Göründüyü kimi, motosiklet və moped sürücüləri bundan sonra da diqqətli olmalı, kuryer xidmətini yerinə yetirərkən yol hərəkəti qaydalarına əməl etməli, təhlükəli gedişləri ilə digər nəqliyyat vasitələrini idarə edən insanların həyatı üçün ölüm saçan hərəkətlərə yol verməməlidirlər. Hər hansı kuryer xidmətini bir anın içində gerçəkləşdirmək üçün kimsə həyatını tükdən asılı vəziyyətə salmamalıdır.

Paylaş:

Baxılıb: 596 dəfə