Azərbaycan-Misir əlaqələri möhkəmlənir

Bakı:

25 °C

73 %

6 m/s

Əlaqə

AZ RU EN

Ana səhifə / YAP xəbərləri / Azərbaycan-Misir əlaqələri möhkəmlənir

Azərbaycan-Misir əlaqələri möhkəmlənir

11.06.2024 [11:12]

Ölkə Prezidenti cənab İlham Əliyevin cari ilin 7 iyun tarixində Misir Ərəb Respublikasına rəsmi səfəri Misir-Azərbaycan əlaqələrinin inkişafına böyük töhfə verəcək. Bu gün sürətlə inkişaf edən Azərbaycan-Misir əlaqələrinin qədim tarixi kökləri var. Hələ sovet dönəmində Azərbaycanla Misir arasında mehriban dostluq əlaqələri mövcud olub. Ölkəmiz müstəqilliyini bərpa etdikdən sonra bu əlaqələr keyfiyyətcə yeni səviyyəyə yüksəlib. Misir Ərəb Respublikası 1991-ci il dekabrın 26-da Azərbaycanın müstəqilliyini tanıyıb. 1993-cü ildə qarşılıqlı diplomatik əlaqələrin yaradılması haqqında protokola əsasən Misirin Bakıda, 1994-cü ilin yanvarında isə Azərbaycanın Qahirədə səfirlikləri açılıb. Qeyd olunmalıdır ki, Ermənistan-Azərbaycan münaqişəsinin həlli məsələsində Misir Azərbaycanın ərazi bütövlüyünü həmişə dəstəkləyib və üzv olduğu beynəlxalq təşkilatlarda ədalətli mövqeyini daim müdafiə edib. Həmçinin Misir Azərbaycan ilə Ərəb Dövlətləri Liqası arasında əlaqələrin inkişafını da daim dəstəkləyir.

Misirə səfəri zamanı cənab Prezident İlham Əliyev iyunun 8-də Qahirədə mətbuata bəyanatla etdiyi çıxışında bildirdi ki, hazırda ölkələrimiz arasındakı siyasi dialoq müntəzəm xarakter daşıyır. Bütün beynəlxalq məsələlərdə də Misirin və Azərbaycanın mövqeləri üst-üstə düşür. Hər iki ölkə beynəlxalq təşkilatlar çərçivəsində fəal çalışır, o cümlədən BMT, Qoşulmama Hərəkatı, İslam Əməkdaşlıq Təşkilatı çərçivəsində fəal əməkdaşlıq edir, habelə İslam həmrəyliyinin gücləndirilməsi istiqamətində birgə səylər göstərirlər.

Öz çıxışında dövlətimizin başçısı bu məqamı da xüsusi vurğuladı ki, Misirin dəstəyi ilə Azərbaycan dörd il ərzində Qoşulmama Hərəkatına sədrlik etmişdir. Bu sədrliyin nəticəsində Hərəkat daha böyük imkanlara malik olmuşdur. Həmçinin diqqətə çatdırıldı ki, Fələstin-İsrail münasibətlərinin tənzimlənməsi və müstəqil Fələstin Dövlətinin yaradılması Azərbaycanın Qoşulmama Hərəkatına sədrliyi dövründə hər zaman diqqət mərkəzində olub. Bu məsələdə dövlət başçımız Azərbaycanın mövqeyini növbəti dəfə birmənalı olaraq ifadə etdi və bildirdi ki, müstəqil Fələstin Dövləti qurulmalıdır, Şərqi Qüds onun paytaxtı olmalıdır.

Həmçinin cənab Prezident Azərbaycan və Ermənistan münasibətləri barədə açıqlama verərək bildirdi ki, iki qonşu ölkə öz dövlət sərhədlərini müəyyənləşdirmək işində müəyyən uğurlara nail olublar. Danışıqlar prosesində irəliləyiş üçün yaxşı imkanlar var. Azərbaycanın Qazax rayonunun otuz ildən çox müddət ərzində işğal altında olmuş dörd kəndinin danışıqlar yolu ilə geri qaytarılması da bu prosesin sürətlənməsinə böyük töhfədir.

Azərbaycan Prezidentinin Misirə səfəri zamanı ölkələrimiz arasında imzalanmış sənədlər, əldə edilmiş razılaşmalar ticarət dövriyyəni artıracaqdır. İlk növbədə, energetika, bərpaolunan enerji növlərinin istehsalı, neft sənayesi, əczaçılıq, alüminium sənayesi sahələrində və digər sahələrdə yaxşı nəticələr əldə etmək mümkün olacaq. Qeyd olunmalıdır ki, bu gün Azərbaycanda ticarət, sənaye və xidmət sahələrində Misir investisiyalı 10-dan çox şirkət fəaliyyət göstərir. Bu da onu göstərir ki, iki ölkə arasında ticarət əlaqələrinin genişləndirilməsi üçün böyük potensial var.

Paylaş:

Baxılıb: 622 dəfə