Azərbaycan parlamentin tarixinə yazılan ən mühüm hadisə

Bakı:

25 °C

52 %

1 m/s

Əlaqə

AZ RU EN

Ana səhifə / YAP xəbərləri / Azərbaycan parlamentin tarixinə yazılan ən mühüm hadisə

Azərbaycan parlamentin tarixinə yazılan ən mühüm hadisə

26.09.2024 [09:48]

İlk dəfə olaraq suveren ölkəmizin bütün ərazisində keçirilən seçkilər yolu ilə yeni tərkibdə formalaşan yeddinci çağırış Azərbaycan Respublikası Milli Məclisi mastəqil ölkəmizdə aparılan genişmiqyaslı və çoxşaxəli islahatlara, onların dərinləşməsinə öz töhfəsini vermək əzmindədir.

Ulu Öndər Heydər Əliyevin yolunu layiqincə davam etdirərək Azərbaycanı zirvələrə yüksəldən, dünyanın sayılıb-seçilən dövlətlərindən birinə çevirən Ali Baş Komandan, Prezident cənab İlham Əliyevin Milli Məclisin ilk iclasında iştirakı, proqram xarakterli tövsiyələrini verməsi Azərbaycan parlamentin tarixinə yazılan ən mühüm hadisələrdən oldu.

"İkinci Qarabağ müharibəsi və antiterror əməliyyatı arxada qaldı, həm dünyada gedən proseslər, yeni münaqişə, müharibə ocaqlarının yaradılması və ətrafımızda gərginliyin artması, eyni zamanda, Ermənistanda revanşizm meyilləri bizi bu sahəyə daim diqqət göstərməyə vadar edir. Hərbi gücümüz olmasa, biz heç bir müstəvidə - nə iqtisadi, nə siyasi müstəvidə uğur qazana bilmərik"-deyə bildirən Ali Baş Komandan onu da vurğulayıb ki, bizim hərbi imkanımız, gücümüz olmasaydı, heç vaxt torpaqlarımızı işğalçılardan azad edə bilməzdik.

Prezident, Ali Baş Komandan İlham Əliyevin sərkərdəlik və diplomatik məharəti, Silahlı Qüvvələrimizin qəhrəmanlığı və fədakarlığı sayəsində əzəli torpaqlarımız 30 illik işğaldan azad olundu. Milli dəyərlərinə hörmətlə yanaşan Azərbaycan xalqı öz tarixi müstəqilliyini, suverenliyini bərpa etdi. Tarixi 44 günlük haqq savaşı xalqımızın Vətənə olan sonsuz məhəbbətini, bir yumruq ətrafında birlik olduğunu nümayiş etdirdi.

Prezident İlham Əliyev yeddinci çağırış Azərbaycan Respublikası Milli Məclisinin ilk iclasındakı nitqində ölkəmizdə həyata keçirilən sosialyönümlü siyasətin dövlətin ümumi siyasətinin ayrılmaz hissəsi olduğunu diqqətə çatdırıb: "Səkkiz ayda iqtisadiyyat dörd faizdən çox artıb, qeyri-neft sektorunda yeddi faiz olub. Biz son illər ərzində mənim tapşırığımla xarici borcumuzu ildən-ilə aşağı salırdıq və bu gün ümumi daxili məhsula nisbətdə bu, cəmi 7,5 faiz təşkil edir. Demək olar ki, biz bütün əsas kreditləri qaytarmışıq və yəni əgər borcumuzu mütləq rəqəmlərlə götürsək, təqribən 5,3 milyard dollardır, - biz bir gündə qaytara bilərik. Daha heç bir ölkə ilə özümüzü müqayisə etmək istəmirəm. Amma bir rəqəmi deyim ki, inkişaf etmiş ölkələrin bəzilərində, o cümlədən bizə mühazirə oxumaq istəyən bəzi ölkələrdə xarici borc ümumi daxili məhsulun 100 faizini, ondan da yüksək rəqəmi təşkil edir".

Əlbəttə ki, ölkə vətəndaşlarının sosial rifahını yaxşılaşdırmaq üçün yürüdülən düşünülmüş siyasət birbaşa iqtisadi sahədə inkişafla birbaşa bağlıdır. "Vətəndaşların sosial rifahını yaxşılaşdırmaq üçün iqtisadiyyat daim inkişaf etməlidir. Çünki biz 2018-ci ildən bu yana dörd sosial islahatlar paketi həyata keçirmişik. Bu sosial islahatlar paketinin məbləği 7 milyard manatdır və bu, 4 milyon insanı əhatə edir. Son beş il ərzində Azərbaycanda minimum əməkhaqqı 2,7 dəfə, minimum pensiya 2,5 dəfə artmışdır"-söyləyən hər bir vətəndaşının yanında olan Prezidentimiz cənab İlham Əliyev gələn ildən minimum əməkhaqqı və minimum pensiyanın artırılacağının xoş müjdəsini də verdi.

Dövlət Başçımızın qeyd etdiyi kimi, sosialyönümlü siyasət bir daha bizim ümumi siyasətimizi, niyyətimizi göstərir. Əlbəttə ki, gələcəkdə bu istiqamətdə siyasəti aparmaq üçün iqtisadiyyatın şaxələndirilməsi, qeyri-neft sektorunun inkişafı, yerli istehsalın genişləndirilməsi əsas şərtdir.

Ölkəmizdə həyata keçirilən uzaqgörən sosial siyasət bu gün, eyni zamanda gələcəkdə insanların layiqli həyat şəraitinin təmin edilməsini, bu təminatın səviyyəsinin yüksəlməsini həyata keçirən proqramlar vasitəsi ilə reallaşdırılacaq, vətəndaşların həyat şəraitinin daha yaxşı olmasını təmin edəcək.

Bayram Aslanov,

YAP İdarə Heyətinin üzvü, YAP Gəncə şəhər təşkilatının sədri

Paylaş:

Baxılıb: 493 dəfə