Zəngəzur dəhlizinin açılması “Konstitusiya və Suverenlik İli”nin ən böyük hadisəsi ola bilər

Bakı:

22 °C

68 %

3 m/s

AZ RU EN

Ana səhifə / YAP xəbərləri / Zəngəzur dəhlizinin açılması “Konstitusiya və Suverenlik İli”nin ən böyük hadisəsi ola bilər

Zəngəzur dəhlizinin açılması “Konstitusiya və Suverenlik İli”nin ən böyük hadisəsi ola bilər

09.01.2025 [16:25]

Anar Abbasov,
YAP Nərimanov rayon təşkilatının sədr müavini

Azərbaycan dövləti 2024-cü ili böyük uğurlarla başa vurdu. əldə olunan nailiyyətlər 2025-ci il üçün də mühüm perspektivləri şərtləndirir. Ölkəmiz son 21 ildə Prezident İlham Əliyevin rəhbərliyi ilə inamla, uğurla, ləyaqətlə inkişaf edib. Əsas uğurumuz isə ərazi bütövlüyümüzü və suverenliyimizi təmin etmək olub. Eyni zamanda, gələcəyə də böyük ümidlə baxırıq. Qarşımızda yeni ümummilli hədəflər dayanır. Şübhə yoxdur ki, Azərbaycan Prezident İlham Əliyevin müvafiq sərəncamı ilə “Konstitusiya və Suverenlik İli” elan olunan 2025-ci ildə də yeni reallıqlar və çağırışlar şəraitində öz məqsədlərinə doğru inamlı addımlar atacaq.

Hər bir ölkənin uğurlu inkişafı sabitlik faktorundan çox asılıdır. Bu gün dünyada baş verən hadisələr ciddi narahatlıq doğurur. Ayrı-ayrı regionlarda yeni müharibələr, qarşıdurmalar, münaqişələr alovlanır. Belə bir təlatümlü mənzərə fonunda respublikamız sabitlik və inkişaf adası kimi fərqlənir. Ölkəmizdə güclü həmrəylik mühiti bərqərar olub. Dövlətin öz siyasətini cəmiyyətin sosial sifarişlərini nəzərə almaqla həyata keçirməsi vətəndaş məmnunluğunun artmasını şərtləndirir, insanlar ölkə rəhbərliyinə, Prezidentə dərin inam bəsləyirlər.

Azərbaycan, həmçinin regionda da möhkəm sabitliyin, davamlı sülhün təmin olunmasını istəyir. Respublikamızın 44 günlük müharibənin və 23 saatlıq lokal xarakterli antiterror tədbirlərinin nəticələrinə uyğun olaraq yaratdığı yeni reallıqlar Cənubi Qafqaz coğrafiyasında inam və əməkdaşlıq mühitinin formalaşmasına münbit zəmin yaradıb və bundan istifadə olunmalıdır. Təəssüf doğuran haldır ki, Ermənistan üzləşdiyi məğlubiyyətlərdən nəticə çıxarmayaraq yenidən silahlanma yolu tutub. Bu, məğlub ölkəni faciəyə aparan bir yoldur. 2025-ci ildə ölkəmizin hərbi xərcləri 8,4 milyard manat olacaq. Bu isə o anlama gəlir ki, Ermənistanın Azərbaycanla rəqabət aparmaq imkanları yoxdur və gələcəkdə də olmayacaq.

“Konstitusiya və Suverenlik İli”inin ilk günlərində Prezident İlham Əliyev qarşıda dayanan hədəflərlə bağlı önəmli mesajlar verdi. Belə ki, dövlətimizin başçısı yanvarın 7-də yerli televiziya kanallarında müsahibəsi zamanı Zəngəzur dəhlizinin açılması mövzusuna da xüsusi toxunub. Cənab Prezident bir daha bəyan etdi ki, Zəngəzur dəhlizinin açılması Ermənistanın öhdəliyidir. Paşinyanın hakimiyyətinin məsələyə yanaşmada qeyri-konstruktivlik nümayiş etdirməsi yanlışdır.

Aydındır ki, Ermənistanın məqsədi Azərbaycanın əsas hissəsi ilə Naxçıvan Muxtar Respublikası arasında kommunikasiyanın bərpasına mümkün qədər əngəl olmaqdır. Lakin rəsmi İrəvan bu layihənin gerçəkləşməsinin qarşısını almaq iqtidarında deyil. Nəzərə almaq lazımdır ki, 10 noyabr 2020-ci il üçtərəfli Bəyanatının 9-cu bəndində bu məsələ öz əksini tapır. Həmin bənddə qeyd olunur: “Bölgədəki bütün iqtisadi və nəqliyyat əlaqələri bərpa edilir. Ermənistan Respublikası vətəndaşların, nəqliyyat vasitələrinin və yüklərin hər iki istiqamətdə maneəsiz hərəkətinin təşkili məqsədilə Azərbaycan Respublikasının qərb rayonları və Naxçıvan Muxtar Respublikası arasında nəqliyyat əlaqəsinin təhlükəsizliyinə zəmanət verir. Nəqliyyat əlaqəsi üzrə nəzarəti Rusiyanın Federal Təhlükəsizlik Xidmətinin sərhəd xidmətinin orqanları həyata keçirir. Tərəflərin razılığı əsasında Naxçıvan Muxtar Respublikası ilə Azərbaycanın qərb rayonlarını birləşdirən yeni nəqliyyat kommunikasiyalarının inşası təmin ediləcək”. Buradan göründüyü kimi, indiki Ermənistanın ərazisində yerləşən Zəngəzurdan hərəkət maneəsiz olmalıdır.

Ümumiyyətlə, regionda kommunikasiyaların bərpası təkcə Azərbaycan üçün deyil, bütün ətraf ölkələr üçün böyük önəm kəsb edir. İlk növbədə, Zəngəzur dəhlizi Naxçıvanla Azərbaycanın əsas hissəsini birləşdirəcək. Bununla da Naxçıvanın 30 ildən çox davam edən blokadasına son qoyulacaq. Bu layihə Avropa ilə Asiyanı, Şimalla Cənubi birləşdirəcək nəqliyyat habı olacaq. Zəngəzur dəhlizinin açılması Ermənistana da iqtisadi gəlirlər qazandıracaq. Amma Ermənistanın havadarları Zəngəzur dəhlizinin açılmasına imkan vermir, Paşinyan da onların sözü ilə oturub-durur. Əgər belə davranış davam edərsə, Ermənistan üçün heç yaxşı olmayacaq. Cənab Prezidentin dediyi kimi, regionda söz sahibi Azərbaycan dövlətidir, hərbi üstünlük və digər amillər də ölkəmizlə hesablaşmağı zəruri edir. Ermənistan bu dəhlizi xoşluqla açmasa, sonda nəticə etibarilə dəhlizi açmağa məcbur qalacaq. Daha doğrusu, Azərbaycan onu məcbur edəcək. Cənab Prezidentin bu mesajından qarşı tərəf nəticə çıxarmalıdır.

Nəzərə alaq ki, Naxçıvanla birbaşa coğrafi bağlantı suveren dövlət olaraq bizim haqqımızdır. Əgər bu proses cari ildə reallaşarsa, “Konstitusiya və Suverenlik İli”nin xalqımıza böyük töhfəsi olacaq. Xalqımız bu məqsəd uğrunda Prezidentimizin qətiyyətinə inanır!

Paylaş:

Baxılıb: 559 dəfə