İnsanlara şəfa bəxş edən alim

Bakı:

20 °C

73 %

6 m/s

Əlaqə

AZ RU EN

Ana səhifə / YAP xəbərləri / İnsanlara şəfa bəxş edən alim

İnsanlara şəfa bəxş edən alim

14.04.2025 [22:26]

Sahib Şükürov,

YAP Göyçay rayon təşkilatının sədri

Azərbaycan səhiyyəsinə böyük töhfələr bəxş etmiş Zərifə xanım Əliyeva 28 aprel 1923-cü ildə həkim Əziz Əliyevin ailəsində dünyaya göz açmışdır. Zərifə xanım Əliyevanın oftalmologiya elminin inkişafında misilsiz xidmətləri olmuşdur. Görkəmli akademik 1949-cu ildən Azərbaycan Elmi Tədqiqat Göz Xəstəlikləri İnstitutunda elmi işçi kimi fəaliyyətə başlamışdır. Zərifə xanım 1969-cu ildən isə Ə. Əliyev adına Azərbaycan Həkimləri Təkmilləşdirmə İnstitutunda göz xəstəlikləri kafedrasının dosenti, professor, 1982–1985-ci illərdə görmə orqanlarının peşə patologiyası laboratoriyasının müdiri, oftalmologiya kafedrasının müdiri vəzifələrində çalışmış, Azərbaycanda geniş yayılmış traxoma xəstəliyinə qarşı aparılan müalicəvi və profilaktik tədbirlərin təşkilində, eləcə də keçirilməsində fəal iştirak etmişdir.

Həyatının mənasını insanlara şəfa, sağlamlıq bəxş etməkdə görən Zərifə xanımın ömrü qısa olsa da, onun sayəsində günəşin işığını görənlərin, təbiətin gözəlliyindən zövq alan xəstələri sayı çox idi. Onların sevinci Zərifə xanıma əbədilik yaşam haqqı qazandırmışdır. Onun zəngin elmi irsi, oftalmologiyanın müxtəlif sahələri üzrə apardığı tədqiqatlar, qazandığı nailiyyətlər, yaratdığı fundamental əsərlər Azərbaycan tibb elminin parlaq səhifəsinə qızıl hərflərlə yazılmışdır.

Zərifə xanım Əliyeva "Terapevtik oftalmologiya", "İridodiaqnostikanın əsasları" kimi nadir elmi əsərlərin müəlliflərindən biri, 12 monoqrafiya, dərslik və dərs vəsaitinin, 150-yə yaxın elmi işin, 1 ixtira və 12 səmərələşdirici təklifin müəllifi olmuşdur.

Zərifə xanım Əliyeva müasir müstəqil Azərbaycan dövlətinin memarı və qurucusu, xalqımızın ümummilli lideri Heydər Əliyevin ömür-gün yoldaşı, sədaqətli dostu, sirdaşı və etibarlı silahdaşı olmuşdur.

“Zərifə xanım kimi həyat yoldaşım olduğuna və o, ailəmdə çox yüksək mənəvi mühit yaratdığına görə mən xoşbəxt olmuşam. Həyatımın bütün dövrlərində işlə məşğul olduğuma görə ailə məsələlərinə fikir verməyə vaxtım olmayıb. Bunların hamısı Zərifə xanımın üzərinə düşüb və o da bu vəzifəni şərəflə, sədaqətlə, çox böyük məharətlə yerinə yetirib. Azərbaycan xanımının mənəvi dəyərlərini özündə təcəssüm etdirən Zərifə xanım bir qadın, bir həyat yoldaşı, bir ana, bir həkim, bir alim, bir ictimai xadim olaraq elə sağlığında əfsanələşməyi bacarıb və daşıdığı bu titulları mərhəmət, şəfqət, hümanizm kimi ali hisslərlə bütövləşdirərək əsl insanlıq zirvəsinə yüksəlib.” Bu fikirləri Ulu Öndər Heydər Əliyev Zərifə xanım Əliyeva haqqında xatirələrində söyləyirdi .

Prezident İlham Əliyev Zərifə xanım haqqında belə deyir: "Mənim anam əsl alim idi. O, tibbin bütün incəliklərini öyrənməyə səy göstərirdi. Bununla bərabər mənimlə, Sevillə məşğul olmağa, bizi Azərbaycanın layiqli vətəndaşları kimi tərbiyə etməyə, böyütməyə vaxt tapırdı. O, həmişə mənim qəlbimdədir."

Zərifə xanım Əliyeva 1985-ci il aprel ayının 15-də Moskva şəhərində vəfat etmişdir. Görkəmli akademikin cənazəsi 1994-cü ildə Moskvanın Novo-Deviçye qəbiristanlığından Bakıya gətirilərək Fəxri xiyabanda dəfn olunmuşdur. Tibb elminin inkişafına mühüm töhfələr verərək oftalmologiyanın aktual problemlərinə dair olduqca mühüm tədqiqatları ilə böyük şöhrət qazanmış Zərifə xanım Əliyevannın əziz xatirəsi daim xalqımızın qəlbində yaşayacaqdır.

Paylaş:

Baxılıb: 561 dəfə