Azərbaycanın neft-qaz strategiyası tarixinə daha bir uğurlu addım

Bakı:

21 °C

78 %

4 m/s

Əlaqə

AZ RU EN

Ana səhifə / YAP xəbərləri / Azərbaycanın neft-qaz strategiyası tarixinə daha bir uğurlu addım

Azərbaycanın neft-qaz strategiyası tarixinə daha bir uğurlu addım

04.06.2025 [16:27]

Bayram Aslanov,

YAP İdarə Heyətinin üzvü, YAP Gəncə şəhər təşkilatı

Müstəqil Azərbaycan zəngin təbii sərvətlərə, davamlı iqtisadiyyata malik olmaqla yanaşı dünyanın enerji təhlükəsizliyi məsələlərinin həllində aparıcı mövqe tutur. Ölkəmizin enerji diplomatiyası regional təhlükəsizliyə, beynəlxalq əməkdaşlığa və milli maraqlara xidmət edir. Azərbaycanın bu gün həyata keçirdiyi enerji layihələri, regional inteqrasiyaya xidmət edən əməkdaşlıq formatları Cənubi Qafqazda sabitliyin təmin edilməsində mühüm rol oynayır.

İyunun 2-də Bakı Ekspo Mərkəzində Bakı Enerji Həftəsi çərçivəsində keçirilən 30-cu Yubiley Beynəlxalq Xəzər Neft və Qaz Sərgisi “Caspian Oil and Gas”, 13-cü Xəzər Beynəlxalq Energetika və Yaşıl Enerji Sərgisi “Caspian Power” və 30-cu Yubiley “Baku Energy Forum”un rəsmi açılış mərasimi Azərbaycanın neft-qaz strategiyası tarixinə uğurlu bir addım kimi əlavə olundu.

31 il əvvəl Xəzər Beynəlxalq Neft və Qaz Sərgisi ilə təməli qoyulan mötəbər tədbirin paytaxt Bakıda həyata keçirilməsi bir daha təsdiq edir ki, Azərbaycan regionun milli maraqlara söykənən xarici siyasəti ilə regional təhlükəsizliyin təmin olunması istiqamətində ardıcıl və sistemli addımlar atan ölkədir.

1994-cü ildə imzalanan “Əsrin müqaviləsi” ilə Azərbaycanda yeni neft strategiyasının şanlı səhifəsi yazıldı. Müxtəlif çətinliklərə və maneələrə sinə gərərək, bu günkü mərhələsinə gəlib çatan “Əsrin müqaviləsi” Azərbaycanın gücünə və qüdrətinə əlavə güc qatdı, dünyadakı mövqeyinin möhkəmlənməsinə ölkə iqtisadiyyatının inkişafına öz töhfəsini verdi. Azərbaycanın yeni neft strategiyasının yaradıcısı dahi şəxsiyyət Heydər Əliyevin rəhbərliyi ilə “Əsrin müqaviləsi” müstəqil ölkəmizi dünyanın qabaqcıl ölkələr sırasına çıxmasına təkan verdi. Regionda bütün geosiyasi və geoiqtisadi vəziyyəti dəyişdirən saziş ölkəmizin müstəqil gələcəyini, dünya dövlətləri ilə strateji tərəfdaşlığını, iqtisadi inkişafının uğurlu nəticələrini, beynəlxalq və regional aləmdəki aparıcı rolunu təmin etdi.

İyunun 2-də regionun enerji sahəsində mühüm hadisə kimi tarixə öz imzasını atan 30-cu Yubiley “Baku Energy Forum”un rəsmi açılış mərasimində Prezident cənab İlham Əliyev çıxışı zamanı bu gün Azərbaycanın sabit siyasi sistemə və inkişaf etməkdə olan iqtisadiyyata malik ölkə olduğunu bildirərək, qeyd edib ki, Azərbaycan genişmiqyaslı islahatlar həyata keçirir. Bizim iqtisadiyyatımız özünü təmin edir. Bizim xarici borcumuzun səviyyəsi ÜDM-in 7 faizindən azdır və maliyyə ehtiyatlarımız borcumuzu 14 dəfə üstələyir. Biz milli sərvətlərin düzgün bölüşdürülməsi nəticəsində yoxsulluğun azaldılmasına müvəffəq olduq və bu gün yoxsulluq səviyyəsi 5 faizə bərabərdir.

Açıq dənizə çıxışı olmayan ölkə olmasına baxmayaraq Azərbaycan 12 ölkəyə təbii qaz ixrac edir, tərəfdaşları ilə birlikdə Xəzər dənizini Qara dəniz və Aralıq dənizi ilə birləşdirən strateji boru kəmərlərini inşa edib. “Biz Avrasiyanın vacib nəqliyyat qovşaqlarının birinə çevrilmişik. Çünki biz infrastruktur layihələrinə çox böyük sərmayə yatırdıq. Bununla yanaşı, bizim enerji layihələrimiz sayəsində Avrasiyanın enerji xəritəsi yenidən tərtib edilib. Əlbəttə, bunların tacı Azərbaycanın dəniz yataqlarından İtaliyanın sahilinə qədər uzanan 3500 kilometrlik Cənub Qaz Dəhlizidir. Əlbəttə, bir çox digər ölkələrin enerji təhlükəsizliyinə sərmayə yatırımı Azərbaycanın geosiyasi əhəmiyyətini artırır. Biz anlayırıq ki, bundan sonra da enerji, neft və qaz bir çox ölkənin enerji təhlükəsizliyinin təmin edilməsində əhəmiyyətli rol oynayacaqdır.” Ulu Öndər Heydər Əliyevin layiqli davamçısı, ölkə Prezidentimiz cənab İlham Əliyevin söylədiyi bu fikirlər də təsdiq edir ki, müstəqil Azərbaycan Cənubi Qafqazın əsas söz sahibidir.

Azərbaycanın keçdiyi inkişaf yolu, Prezidentimiz cənab İlham Əliyevin rəhbərliyi ilə dövlətimizin düzgün, uzaqgörən və praqmatik siyasəti nəticəsində nail olduğu uğurlar sübut edir ki, enerji ehtiyatları ilə kifayət qədər zəngin olan Azərbaycan qoca qitənin enerji layihələrinin reallaşdırılmasında mühüm rol oynayır.

Paylaş:

Baxılıb: 584 dəfə