Azərbaycan Əlifbası və Azərbaycan Dili – Kimliyimizin, Mənəviyyatımızın Təntənəsi

Bakı:

25 °C

47 %

1 m/s

Əlaqə

AZ RU EN

Ana səhifə / YAP xəbərləri / Azərbaycan Əlifbası və Azərbaycan Dili – Kimliyimizin, Mənəviyyatımızın Təntənəsi

Azərbaycan Əlifbası və Azərbaycan Dili – Kimliyimizin, Mənəviyyatımızın Təntənəsi

01.08.2025 [18:17]

Kənan Qədirli,

YAP Ağdam rayon təşkilatı, Ağdam Olimpiya İdman Kompleksi ərazi partiya təşkilatının sədr müavini

1 Avqust tarixinin hər bir azərbaycanlı üçün özəl mənəvi yükü var. Azərbaycan Əlifbası və Azərbaycan Dili Günü sadəcə bir tarixi dönüş nöqtəsi deyil, eyni zamanda dilimizə və milli kimliyimizə olan sevginin rəmzidir. Bu gün hər bir azərbaycanlının yaddaşına milli yaddaşımızın ən dəyərli sərvəti kimi yazılıb.

Azərbaycan dilinin inkişafı və qorunması məsələsi xalqımızın Ümummilli Lideri Heydər Əliyev üçün daim prioritet olub. O, dilə sadəcə bir ünsiyyət vasitəsi kimi yanaşmırdı – dili xalqın ruhu, tarixə yazılan hafizəsi, milli dövlətçilik ənənələrinin əsas sütunu hesab edirdi. Ümummilli Lider Heydər Əliyevin hələ Sovet dönəmində Azərbaycan SSR Konstitusiyasına Azərbaycan dilinin dövlət dili kimi daxil edilməsinə nail olması tarixi hadisə idi. Bu o dövr üçün həm siyasi, həm ideoloji baxımdan olduqca çətin və riskli bir addım idi. Lakin Ümummilli Lider Heydər Əliyevin xalqına, onun dilinə və gələcəyinə olan inamı bu addımı zəruri edirdi.

Ulu Öndər 2001-ci ildə Azərbaycan dilinə və latın qrafikalı əlifbamıza dövlət statusu verilməsi ilə bağlı imzaladığı fərmanla bu istiqamətdə tarixi bir addım atdı. Bu fərmanla Azərbaycan dili təkcə Konstitusiyada rəsmi dil kimi təsbit olunmadı, həm də real idarəçilik, təhsil və mədəniyyət məkanında başlıca daşıyıcıya çevrildi.

Ulu Öndərin başladığı bu strateji xətt bu gün Prezident İlham Əliyev tərəfindən uğurla davam etdirilir. Cənab Prezidentin “Azərbaycan dilinin saflığının qorunması və dövlət dili kimi mövqeyinin daha da gücləndirilməsi haqqında” imzaladığı sərəncamlar, Dövlət Dil Komissiyasının fəaliyyəti və dil normalarına ciddi nəzarət mexanizmləri, bu məsələnin həm də dövlətçilik səviyyəsində prioritet olduğunu sübut edir.

Azərbaycan dilinin dövlət səviyyəsində qorunması, onun tətbiq dairəsinin genişlənməsi vətəndaş məsuliyyəti ilə mümkün olur. Dil sadəcə səs və söz birliyi deyil – o, vətəndaş düşüncəsinin daşıyıcısı, milli ideologiyanın özəyidir. Bu baxımdan hər bir məmurun, müəllimin, jurnalistin və gənc nəslin borcu dili yaşatmaq, inkişaf etdirmək və gələcək nəsillərə layiqincə ötürməkdir.

Ölkəmizdə dil siyasəti təkcə normativ aktlarla yox, eyni zamanda milli ruhla aparılır. Azərbaycan dilində aparılan televiziya proqramları, çap və elektron mətbuatın dilə münasibəti, məktəblərdə və universitetlərdə ana dilinin tədrisi – bütün bunlar dilə olan hörmətin göstəricisidir. Və bu hörmət sadəcə rəsmi tədbirlərlə yekunlaşmır, gündəlik həyat tərzimizin ayrılmaz hissəsinə çevrilir.

Biz gənc nəslin ana dilində təmiz danışmasına, ədəbi dil normalarına uyğun yazmasına və sosial məkanda dili düzgün istifadə etməsinə xüsusi diqqət yetirməliyik. Dilimizin informativ və texnoloji sahələrdə də güclənməsi üçün həm pedaqoji yanaşma, həm maarifləndirmə, həm də müasir platformalarda ana dilində kontent istehsalı vacibdir. Məhz bu cür yanaşmalarla dilimiz yalnız günümüzdə deyil, gələcəyin innovativ dünyasında da öz layiqli yerini qoruyub saxlaya biləcək. Müstəqil dövlət olaraq öz dilimizi elm, təhsil, texnologiya və mədəniyyətin daşıyıcısına çevirmək bizim başlıca vəzifəmizdir. Eyni zamanda unutmamalıyıq ki, dilimizin inkişafı təkcə onun mühafizəsi ilə bitmir. Bu inkişaf daim yenilənmə, zənginləşmə prosesi ilə müşayiət olunmalıdır.

Azərbaycan hər zaman öz dilində düşünən, öz dilində yaradan və öz dilində yaşayan nəsillərin ölkəsi olmalıdır. Bu vəzifə isə hər birimizin çiyinləri üzərinə düşən mənəvi məsuliyyətdir.

Paylaş:

Baxılıb: 394 dəfə