Prezident İlham Əliyev ölkəmizin regionda yaratdığı yeni reallıqlar barədə məlumatları “Əl-Ərəbiyyə” vasitəsilə beynəlxalq ictimaiyyətin diqqətinə çatdırdı

Bakı:

23 °C

68 %

10 m/s

AZ RU EN

Ana səhifə / YAP xəbərləri / Prezident İlham Əliyev ölkəmizin regionda yaratdığı yeni reallıqlar barədə məlumatları “Əl-Ərəbiyyə” vasitəsilə beynəlxalq ictimaiyyətin diqqətinə çatdırdı

Prezident İlham Əliyev ölkəmizin regionda yaratdığı yeni reallıqlar barədə məlumatları “Əl-Ərəbiyyə” vasitəsilə beynəlxalq ictimaiyyətin diqqətinə çatdırdı

29.08.2025 [19:27]

“Əl-Ərəbiyyə” telekanalına müsahibəsində Prezident İlham Əliyev Azərbaycan həqiətlərinə çox geniş diqqət çəkdi. Ölkə başçısı Azərbaycanın uzun illər Ermənistanın işğalçılıq siyasətindən əziyyət çəkdiyini qeyd etdi. Məhz Ermənistan 1990-cı illərin əvvəlindən Azərbaycan ərazilərini işğal etmişdi. O zaman Azərbaycan çox zəif idi, ordumuz yox idi. Ermənistanın isə Azərbaycan ərazilərini işğal etməkdə ona dəstək göstərən xarici tərəfdarları var idi. Beləliklə, ərazimizin təxminən 20 faizi işğal edilmişdi, nəticədə bir milyon qaçqın və məcburi köçkünümüz var idi. Həmin dövrdə bu, əhalinin sayına görə dünyada ən yüksək nisbətlərdən biri idi. Yəni, Azərbaycanın əhalisi o vaxt 8 milyon nəfər idi, onların bir milyonu yurd-yuvasından didərgin düşmüşdü. Ölkə başçısı Azərbaycan xalqının işğalla barışmadığını və 44 günlük Vətən müharibəsi nəticəsində ədaləti, beynəlxalq hüququ və öz ləyaqətini bərpa etdiyini, torpaqlarını geri qaytardığını vurğuladı.

Prezident İlham Əliyev “Əl-Ərəbiyyə” telekanalına müsahibəsində Azərbaycanla Ermənistan arasında sülh sazişinin imzalnma şərtini də qeyd etdi. Ermənistan konstitusiyasında Azərbaycanın ərazi bütövlüyünü hələ də şübhə altına alan müddəa mövcuddur. Ermənistan həmin müddəaya dəyişiklik etməlidir. Elə ki, bu dəyişiklik olundu, yəni, Azərbaycanın ərazi bütövlüyünə qarşı iddialar onların konstitusiyasından çıxarıldı, formal olaraq sülh sazişi də imzalanacaq. Lakin fakt budur ki, Azərbaycan və Ermənistanın Ağ Evdə Prezident Trampın iştirakı ilə bu sənədi paraflaması müharibənin başa çatdığını göstərir. Bu, mərhələlərlə 30 ildən artıq davam edən müharibənin sonudur və həm Cənubi Qafqaz regionu, həm də daha geniş mənada Mərkəzi Asiya və Yaxın Şərq üçün tamamilə yeni imkanlar açır. Vaşinqtonda imzalanan sənədin əhəmiyyəti ondan ibarətdir ki, hər iki tərəf bir-birinin ərazi bütövlüyünü tanıyır və gələcək təmaslarını beynəlxalq hüququn bu fundamental tezisi əsasında planlaşdıracaq. Prezident İlham Əliyev bəyan etdi ki, əgər Ermənistan ölkəmizin ərazi bütövlüyünü tanımaqdan imtina etsə, Azərbaycan da Ermənistanın ərazi bütövlüyünü tanımaqdan imtina edəcək.

Müsahibəsində ölkə başçısı Zəngəzur dəhlizi haqqında da fikirlərini bildirdi. Prezident qeyd etdi ki, Zəngəzur dəhlizi fəaliyyətə başlamalı və təhlükəsiz olmalıdır. Azərbaycan vətəndaşları bu 40 kilometrdən çox məsafəni təhlükəsiz keçə bilməlidirlər, güclü təhlükəsizlik zəmanətləri olmalıdır. Beynəlxalq təhlükəsizlik zəmanətləri təmin edilməlidir. Yalnız Ermənistanın verdiyi zəmanətlər kifayət deyil. Prezident İlham Əliyev diqqətə çatdırdı ki, azərbaycanlılar Naxçıvandan ölkənin əsas hissəsinə və geri səyahət edərkən narahatlıq hiss etməməlidirlər. Uzunmüddətli mübarizəni və düşmənçiliyi nəzərə alaraq, təhlükəsizlikdən narahat olmamalıdırlar. Ölkə başçısı qeyd etdi ki, layihənin həyata keçirilməsi çox yaxındır və indi iş Ermənistanın üzərinə düşür. Ölkəmizin iki hissəsini birləşdirən bütün infrastruktur Azərbaycan ərazisində artıq yaradılır. Amma bu, yalnız Azərbaycanın iki hissəsinin birləşdirilməsi demək deyil, bu, yeni nəqliyyat xəttini çəkmək deməkdir.

Əlişah Rəcəbov

YAP Ağdaş rayon təşkilatının sədri

Paylaş:

Baxılıb: 474 dəfə