Tacikistan ilə Azərbaycan arasında ikitərəfli münasibətlər ardıcıl inkişaf edir

Bakı:

17 °C

88 %

4 m/s

Əlaqə

AZ RU EN

Ana səhifə / YAP xəbərləri / Tacikistan ilə Azərbaycan arasında ikitərəfli münasibətlər ardıcıl inkişaf edir

Tacikistan ilə Azərbaycan arasında ikitərəfli münasibətlər ardıcıl inkişaf edir

14.10.2025 [23:35]

Toğrul Zeynalov

YAP Ağdam rayon təşkilatının əməkdaşı

Prezident İlham Əliyevin 2025-ci il oktyabrın 10-da Düşənbədə keçirilən MDB Dövlət Başçıları Şurasının məhdud tərkibdə iclasındakı çıxışı zamanı səsləndirdiyi “Tacikistan ilə Azərbaycan arasında ikitərəfli münasibətlər ardıcıl inkişaf edir” fikri, iki ölkə arasında mövcud olan yüksək səviyyəli siyasi dialoqun, qarşılıqlı hörmət və etimada əsaslanan əməkdaşlığın, eləcə də strateji baxışların uzlaşmasının aydın göstəricisidir. Bu ifadə yalnız rəsmi diplomatik münasibətlərin səviyyəsinə qiymət verməkdən ibarət deyil, həm də uzun illər ərzində formalaşmış dostluq, qarşılıqlı anlaşma və ümumi maraqlara əsaslanan münasibətlərin gələcəyə doğru davamlı inkişafını özündə əks etdirir. Azərbaycanın və Tacikistanın dövlət başçıları səviyyəsində həyata keçirdiyi qarşılıqlı səfərlər, yüksək səviyyəli görüşlər və çoxşaxəli əməkdaşlıq gündəliyi, bu münasibətlərin sistemli və planlı şəkildə inkişaf etdiyini göstərir. İki ölkə arasında münasibətlər təkcə ikitərəfli siyasi əlaqələrlə məhdudlaşmır, eyni zamanda iqtisadi, humanitar, nəqliyyat, enerji, kənd təsərrüfatı, turizm və mədəniyyət sahələrində də geniş potensiala malikdir və bu istiqamətlərdə konkret nəticələr əldə olunmaqdadır. Ticarət dövriyyəsinin artması, iş adamları arasında birbaşa əlaqələrin qurulması, birgə biznes forumların təşkili və investisiya təşəbbüsləri münasibətlərin iqtisadi əsasını möhkəmləndirir. Xüsusilə nəqliyyat və tranzit sahəsində əməkdaşlıq gələcəkdə həm ikitərəfli, həm də regional miqyasda strateji əhəmiyyət kəsb edə bilər. Azərbaycanın təşəbbüsü ilə reallaşan regional nəqliyyat layihələri – xüsusilə Zəngəzur dəhlizinin perspektivləri fonunda Tacikistan-Azərbaycan əməkdaşlığı, Mərkəzi Asiyanı Qafqaz və Avropa bazarları ilə birləşdirən əsas marşrutların formalaşmasında mühüm rol oynaya bilər. Bu isə təkcə iqtisadi dividendlər deyil, həm də siyasi etimadın güclənməsi və təhlükəsizlik müstəvisində əməkdaşlığın möhkəmlənməsi deməkdir. Humanitar sahədə isə mədəniyyət, təhsil və gənclər siyasəti üzrə əməkdaşlıq xalqlar arasında bağların möhkəmlənməsinə xidmət edir. Azərbaycan və Tacikistan arasında keçirilən mədəniyyət günləri, təhsil sahəsində imzalanmış sənədlər və tələbə mübadiləsi proqramları iki xalq arasında qarşılıqlı maraq və anlaşmanı dərinləşdirir. Eyni zamanda, beynəlxalq və regional təşkilatlar çərçivəsində Azərbaycan və Tacikistan daim bir-birinin mövqelərini dəstəkləyir, suverenlik, ərazi bütövlüyü və daxili işlərə qarışmamaq prinsiplərinə sadiqlik nümayiş etdirir. Bu baxımdan MDB, İƏT, BMT və digər platformalarda göstərilən qarşılıqlı dəstək ikitərəfli münasibətlərin etibarlı təməllər üzərində qurulduğunu bir daha təsdiqləyir. Prezident İlham Əliyevin sözügedən çıxışı, Azərbaycan diplomatiyasının əsas prioritetlərindən birinin regional əməkdaşlıq, dostluq münasibətlərinin inkişafı və etibarlı tərəfdaşlıq əlaqələrinin möhkəmləndirilməsi olduğunu ortaya qoyur. Tacikistanla münasibətlər bu kontekstdə mühüm yer tutur və gələcək üçün də hər iki ölkənin maraqlarına xidmət edəcək dərinləşmiş əməkdaşlıq modelinə çevrilməkdədir. Müxtəlif sahələr üzrə əməkdaşlığın ardıcıl şəkildə genişlənməsi və dərinləşməsi, Prezident İlham Əliyevin rəhbərliyi ilə Azərbaycanın xarici siyasətində praqmatik, balanslı və milli maraqlara əsaslanan yanaşmanın bariz nümunəsidir. Tacikistanla qurulan bu ardıcıl münasibətlər, Cənubi Qafqaz və Mərkəzi Asiya ölkələri arasında daha geniş inteqrasiyanın və regional sabitliyin də təşviqinə xidmət edir.

Paylaş:

Baxılıb: 337 dəfə