Müstəqil, suveren Azərbaycanın qürur günü

Bakı:

22 °C

68 %

5 m/s

Əlaqə

AZ RU EN

Ana səhifə / YAP xəbərləri / Müstəqil, suveren Azərbaycanın qürur günü

Müstəqil, suveren Azərbaycanın qürur günü

24.10.2025 [15:37]

Azərbaycan Respublikası Prezidentinin 2023-cü il 31 iyul tarixli Sərəncamı ilə Vətən müharibəsində əldə olunmuş tarixi qələbəni əbədiləşdirmək üçün işğaldan azad edilmiş şəhərlərin günləri təsis edilmişdir. Artıq hər il bütün Azərbaycanda işğaldan azad edilmiş ərazilərdəki şəhərlərin günləri təntənəli şəkildə qeyd olunur.

Müzəffər Azərbaycan Ordusu 2020-ci il oktyabrın 25-də Qubadlı şəhərini işğalçılardan azad edərək üçrəngli bayrağımızı 30 ilə yaxın müddətdən sonra həmin ərazilərdə qürurla dalğalandırıb.

2020-ci il oktyabrın 25-də Azərbaycan Prezidenti, Müzəffər Ali Baş Komandan cənab İlham Əliyev Zəngilan, Cəbrayıl, Qubadlı rayonlarının bir neçə kəndini və Qubadlı şəhərinin işğaldan azad edildiyini açıqlayıb.

Ölkəmizin cənub-qərbində yerləşən, Zəngəzur mahalının ən qədim yaşayış məskənlərindən olan Qubadlının işğaldan azad edilməsindən artıq beş il ötür. Rayonunun işğaldan azad olunması tarixi Zəfərimizi qaçılmaz etdi. Vətən müharibəsinin ən əhəmiyyətli və strateji hərbi uğurlarından biri də məhz Qubadlının azad edilməsidir. Doğrudur, işğal altında olmuş hər qarış torpağımızın azad edilməsi bizim üçün vacib, əhəmiyyətli idi. 1992-1993-cü illərdə bir-birinin ardınca itirdiyimiz o ərazilərimizi azad etdik. O torpaqlar bizim şəhidlərin, yaralılarımızın qanları ilə yoğrulub. Ona görə də bütün kənd, qəsəbə, rayon və şəhərlərimizin azad edilməsi bizim üçün xüsusi əhəmiyyətə malikdir. Zəfərə nail olmaq üçün Qubadlı şəhərinin azad olunması əməliyyatı qaçılmaz idi və bu əməliyyat ordu rəhbərliyindən böyük peşəkarlıq, savad, döyüşçülərimizdən isə cəsarət, güc tələb edirdi.

2023-cü il dekabrın 23-də Azərbaycan Respublikasının Prezidenti cənab İlham Əliyev və birinci xanım Mehriban Əliyeva işğaldan azad edilmiş Qubadlıda olarkən Prezidentimiz çıxışında demişdir: “Bu gün səhərdən yağış yağırdı, biz Qubadlıya çatanda gün çıxdı. Təbiət də bizi salamlayır, bizi alqışlayır. Qubadlıya öz sahibləri qayıdıb. Qubadlının işğaldan azad edilməsi tarixi hadisə idi. Oktyabrın 25-də Qubadlı şəhərinin azad edilməsi bizim qələbəmizi yaxınlaşdırdı. Qubadlı uğrunda şiddətli döyüşlər gedirdi, şəhidlər vermişik. Onların arasında Qubadlı rayonundan olan Milli Qəhrəman Şükür Həmidov öz doğma diyarı uğrunda gedən döyüşlərdə qəhrəmancasına həlak olmuşdur. Şükür Həmidova mən Milli Qəhrəman adını Aprel döyüşlərindən sonra verdim, göstərdiyi qəhrəmanlığa görə. Allah ona rəhmət eləsin! Allah bütün şəhidlərimizə rəhmət eləsin! Azərbaycan hərbçiləri, o cümlədən Şükür Həmidov dövlət tərəfindən yüksək döyüş ordenləri ilə təltif edilmişdir”.

Qeyd edək ki, Qubadlı rayonu qərbdən 120 km məsafədə Ermənistan Respublikası ilə, Şimaldan Laçın rayonu, Xocavənd rayonu, şərqdən Cəbrayıl rayonu, cənubdan isə Zəngilan rayonu ilə həmsərhəddir. Kəndlərin əksər hissəsi Həkəri və Bərgüşad çayları ətrafında yerləşir. Ümumilikdə rayonda 79.812 hektar torpaq fondu vardır. Rayonda əsasən qəhvəyi dağ-meşə torpaqları yayılmışdır. “Yazı düzü”, “Gəyən” və “Məzrə” adlanan düzləri bol məhsullu torpaqlardır. İşğala qədər bundan 14956 hektarı əkin, 850 hektarı çoxillik bitki, 631 hektarı biçənək, 17192 hektarı örüş-otlaq, 543 hektarı həyətyanı, 13160 hektarı meşə, 582 hektarı bağ və üzümlüklər idi. Qubadlıda işğala qədər taxıl, üzüm, tütün, bostan məhsulları becərilir, heyvandarlıqla məşğul olunurdu. Əminik ki, Qubadlı yenidən Azərbaycanın iqtisadi baxımdan ən gəlirli, ən yaşamalı rayonlarından birinə çevriləcəkdir.

Bu gün Qubadlıda genişmiqyaslı bərpa və yenidənqurma işləri aparılır ki, bu da bölgənin əvvəlki əzəmətini və tarixi dəyərini qaytarmağı hədəfləyir. Azərbaycan hökuməti bölgədə yaşayış binaları, infrastruktur və sosial obyektlərin yenidən qurulmasına ciddi resurslar ayırıb. Həmçinin, yolların, məktəblərin, xəstəxanaların, su və elektrik sistemlərinin bərpası və modernləşdirilməsi üçün genişmiqyaslı layihələr həyata keçirilir. Bu işlər bölgənin iqtisadiyyatının canlanmasına, əhalinin geri qayıtmasına və Qubadlının öz əvvəlki əzəmətini bərpa etməsinə kömək edəcək.

Qubadlı şəhəri günü münasibətilə hər il respublikanın bütün bölgələrində müxtəlif tədbirlər keçirilir. Bu tədbirlər həm Qubadlının tarixini gənc nəslə tanıtmaq, həm də torpaqlarımızın azadlığı uğrunda canını fəda etmiş qəhrəmanların xatirəsini yaşatmaq məqsədi daşıyır. Qubadlı bu gün azad, müasir və yenidən dirçələn bir şəhər kimi Azərbaycanın gücünü, iradəsini və milli birliyini göstərir. Qubadlı şəhəri günü təkcə bir bölgənin bayramı deyil, müstəqil, suveren Azərbaycanın qürur günüdür.

Günəş Məmmədova

YAP Qazax rayon təşkilatı ərazi partiya təşkilatının sədri

Paylaş:

Baxılıb: 567 dəfə