Vətən sevgisi ilə yaxınlaşdırdığımız Qələbə

Bakı:

10 °C

93 %

6 m/s

Əlaqə

AZ RU EN

Ana səhifə / YAP xəbərləri / Vətən sevgisi ilə yaxınlaşdırdığımız Qələbə

Vətən sevgisi ilə yaxınlaşdırdığımız Qələbə

04.11.2025 [12:06]

Mansur Quliyev

YAP Ağdam rayon təşkilatının sədri

“Mən işğal dövründə deyirdim, hər birimiz azadlıq gününü, bu müqəddəs günü öz işimizlə yaxınlaşdırmalıyıq, yaxınlaşdırırdıq və yaxınlaşdırdıq.”

Bu dərin mənalı sözlər Azərbaycan Respublikasının Prezidenti, Müzəffər Ali Baş Komandan cənab İlham Əliyevin xalqa, Vətənə və tarixi ədalətə sədaqətinin ifadəsidir. 8 Noyabr – Zəfər Günü həmin sədaqətin, milli birliyin, xalq iradəsinin və rəhbər müdrikliyinin təntənəsidir. Otuz ilə yaxın davam edən işğal dövründə Azərbaycan xalqı heç vaxt inamını itirmədi. Hər kəs öz sahəsində, öz əməyində bir amal uğrunda – torpaqlarımızın azadlığı uğrunda çalışdı. Əsgər səngərdə, alim tədqiqatında, müəllim dərs otağında, kəndli tarlasında, mühəndis zavodda – hər biri birgə məqsədə, Qələbəyə doğru addımlayırdı.

Prezident İlham Əliyevin uzaqgörən siyasəti, ordu quruculuğuna verdiyi xüsusi diqqət, xalqın dövlətə sonsuz etimadı bu mübarizənin təməlini təşkil etdi. 2020-ci ilin payızında başlayan 44 günlük Vətən müharibəsi təkcə torpaqlarımızın deyil, milli qürurumuzun da azad edilməsi idi. Ordumuzun hər bir qələbəsi – Cəbrayıl, Füzuli, Zəngilan, Qubadlı, Şuşa xalqımızın birliyindən, rəhbərliyə olan etimadından, Ali Baş Komandanın qətiyyətindən güc aldı.

Zəfər Günü bu mübarizənin zirvəsidir – Şuşanın azad edilməsi ilə başa çatan tarixi dönüş, yüz illərə yazılan qəhrəmanlıq dastanıdır.

Müzəffər Ali Baş Komandan İlham Əliyevin rəhbərliyi ilə Azərbaycan xalqı bir yumruq kimi birləşdi. Dövlət başçısının “Qarabağ Azərbaycandır!” çağırışı xalqın qəlbində sarsılmaz inama çevrildi. Bu inamla hər kəs öz payını verdi – kimin əməyilə, kimin duası ilə, kimin fədakarlığı ilə... Beləcə, xalqımız azadlıq gününü öz əməyi ilə yaxınlaşdırdı və bu gün həmin böyük Qələbəni qürurla qeyd edir. Bu gün Azərbaycan artıq qalib dövlət kimi bölgədə yeni reallıqlar formalaşdırır. Azad edilmiş torpaqlarda quruculuq və bərpa işləri geniş vüsət alıb. Qayıdış prosesləri – Ağdam, Zəngilan, Füzuli, Laçın, Qubadlıda yeni həyatın başlanğıcıdır.

Prezident İlham Əliyevin dediyi kimi, “biz azad edilmiş torpaqlarda həyat qururuq, bu, bizim Böyük Qayıdışımızdır.”

Deməli, Zəfər Günü təkcə qürur və iftixar deyil, həm də yenidənqurma və gələcəyə inam günüdür. 8 Noyabr – Zəfər Günü hər bir azərbaycanlının qəlbində əbədi yaşayacaq. Bu gün biz bir daha dərk edirik ki, xalqın birliyi, rəhbərin müdrikliyi və ədalətli mübarizə birləşəndə heç bir qüvvə qarşısında dayana bilməz.

Biz bu Qələbəni təkcə döyüş meydanında deyil, həm də illərin zəhməti, səbr və vətənpərvərliyi ilə qazanmışıq.

Bu gün başımız dik, bayrağımız ucadır. Çünki biz Zəfəri öz əlimizlə yaxınlaşdırdıq və onu tarixə yazdıq.

Yaşasın Azərbaycan!

Yaşasın Müzəffər Ali Baş Komandan İlham Əliyev!

Yaşasın qalib xalqımız!

Paylaş:

Baxılıb: 588 dəfə