YAP Qazax rayon təşkilatı Yeni Azərbaycan Partiyasının yaranmasının 21-ci ildönümünü qeyd edib

Bakı:

26 °C

50 %

4 m/s

AZ RU EN

Ana səhifə / YAP xəbərləri / YAP Qazax rayon təşkilatı Yeni Azərbaycan Partiyasının yaranmasının 21-ci ildönümünü qeyd edib

YAP Qazax rayon təşkilatı Yeni Azərbaycan Partiyasının yaranmasının 21-ci ildönümünü qeyd edib

21.11.2013 [09:26]

Yeni Azərbaycan Partiyası (YAP) Qazax rayon təşkilatı partiyanın yaranmasının 21-ci ildönümü ilə bağlı tədbir keçirib. Öncə tədbir iştirakçıları Ulu öndər Heydər Əliyevin abidəsi önünə gül-çiçək dəstələri qoyaraq, Onun əziz xatirəsini yad ediblər. Daha sonra tədbirdə geniş məruzə ilə çıxış edən YAP Qazax rayon təşkilatının sədri Həmid Pənahov bildirib ki, 1992-ci il noyabr ayının 21-i müasir Azərbaycan tarixində öz yeri, çəkisi və siyasi gücü ilə fərqlənən, ölkəmizin inkişafında müstəsna xidmətləri olan və əsası Ulu öndər Heydər Əliyev tərəfindən qoyulan Yeni Azərbaycan Partiyasının təsis olunduğu gündür: “Tarixi zərurətdən yaranan Yeni Azərbaycan Partiyası müstəqil Azərbaycan dövləti ilə demək olar ki, paralel addımlayıb. Bu gün Azərbaycanın əldə etdiyi bütün nailiyyətlərdə YAP-ın böyük rolu var. Bütün bu xidmətlər Azərbaycan tarixinə qızıl hərflərlə yazılacaq və gələcək nəsillərə çatdırılacaq. Çünki Yeni Azərbaycan Partiyası böyük bir şəxsiyyətin-bütün həyatını Azərbaycan xalqına həsr etmiş çağdaş dövlətimizin banisi Ulu öndərimiz Heydər Əliyevin ideyaları ilə yaranıb”.
H.Pənahov bildirib ki, bu gün Prezident İlham Əliyevin Sədri olduğu YAP Cənubi Qafqazın ən böyük siyasi qüvvəsinə çevrilib. YAP-ın cəmiyyətin inkişafını hədəfləyən çoxsaylı sosial layihələr reallaşdırması, gəncləri dövlətçilik, milli maraqlar ətrafında sıx birləşdirməsi partiyanın tərəfdarlarının sayının artmasına səbəb olub. Əsası Ümummilli lider Heydər Əliyev tərəfindən qoyulan inkişaf strategiyasının Prezident İlham Əliyev tərəfindən uğurla davam etdirilməsi nəticəsində Azərbaycan nəinki Cənubi Qafqazda, hətta Avropada lider dövlətlərdən birinə çevrilib.
Daha sonra çıxış edən YAP Qazax rayon təşkilatının sədr müavini Abdulla Abdullayev, Azərbaycan Müəllimlər İnstitutu Qazax filialının direktoru, ərazi ilk partiya təşkilatının sədri Afaq Qasımova, YAP Qazax rayon təşkilatı Gənclər Birliyinin sədri Vüsal İsmayılov Yeni Azərbaycan Partiyasının ötən 21 il ərzində keçdiyi şərəfli və tarixi yoldan bəhs ediblər.
Tədbirdə çıxış edən Qazax rayon İcra Hakimiyyətinin başçısı Ayaz Əsgərov bütün partiya üzvlərini YAP-ın yaradılmasının 21 illiyi münasibətilə təbrik edərək bildirib ki, Ümummilli lider Heydər Əliyevin yaratdığı Yeni Azərbaycan Partiyası Azərbaycanın müstəqil dövlət kimi inkişafında və tərəqqisində müstəsna xidmətlər göstərib. Azərbaycanın dövlət müstəqilliyinin qorunub saxlanmasında, ölkəmizin regionun liderinə çevrilməsində YAP-ın özünəməxsus rolu var. İctimai-siyasi proseslərin kifayət qədər mürəkkəb olduğu bir vaxtda dahi şəxsiyyət Heydər Əliyevin rəhbərliyi ilə 1992-ci il noyabrın 21-də təsis edilən Yeni Azərbaycan Partiyası qısa müddətdə ölkənin gələcək taleyini müəyyənləşdirən əsas siyasi qüvvəyə çevrildi. Dövrün tələbindən yaranan YAP ötən illər ərzində Vətənimizin inkişafı və qüdrətlənməsi üçün saysız-hesabsız işlər görüb: “Bu ilin oktyabrında keçirilən Prezident seçkilərində cənab İlham Əliyevin uğurlu qələbəsi həm də YAP-ın zəfəri və nailiyyəti idi. Bu gün qürur hissi ilə deməliyəm ki, artıq Yeni Azərbaycan Partiyasının sıralarında 600 mindən artıq vətəndaşımız birləşir. Bu təkcə statistika deyil, həm də vətəndaşlarımızın Azərbaycanın bugünkü reallığına verdiyi qiymət və Prezidentimiz, partiyamızın Sədri İlham Əliyev cənablarının həyata keçirdiyi uğurlu daxili və xarici siyasətə olan münasibətlərin ifadəsidir. Əminəm ki, Yeni Azərbaycan Partiyası möhtərəm Prezidentimiz, partiyamızın Sədri cənab İlham Əliyevin rəhbərliyi altında daha böyük uğurlara və qələbələrə imza atacaq”.
Pərviz SADAYOĞLU

Paylaş:

Baxılıb: 1298 dəfə