Bakıdan Belqrada strateji körpü: Azərbaycan-Serbiya münasibətlərində yeni mərhələ

Bakı:

9 °C

93 %

5 m/s

Əlaqə

AZ RU EN

Ana səhifə / YAP xəbərləri / Bakıdan Belqrada strateji körpü: Azərbaycan-Serbiya münasibətlərində yeni mərhələ

Bakıdan Belqrada strateji körpü: Azərbaycan-Serbiya münasibətlərində yeni mərhələ

23.02.2026 [11:27]

Dünya nizamında dövlətlərarası münasibətlər artıq sadə diplomatik təmaslardan çıxaraq, daha dərin və strateji xarakter almağa başlayıb. Bu kontekstdə Azərbaycan Respublikasının Prezidenti cənab İlham Əliyevin 2026-cı ilin fevral ayında Serbiyaya reallaşdırdığı rəsmi səfər həm regionumuz, həm də Avropanın enerji və nəqliyyat xəritəsi üçün mühüm bir dönüş nöqtəsi hesab edilir. Bu səfər sadəcə iki dost ölkə rəhbərlərinin görüşü deyil, həm də gələcək onilliklərin iqtisadi arxitekturasının qurulmasıdır.

Səfərin ən yadda qalan hadisəsi, şübhəsiz ki, Azərbaycan-Serbiya Strateji Tərəfdaşlıq Şurasının birinci iclasının keçirilməsi oldu. Bu formatın təsis edilməsi o deməkdir ki, Bakı və Belqrad arasındakı əlaqələr artıq təsadüfi və ya periodik deyil, sistemli və planlı şəkildə idarə olunacaq. Bu şura enerji, nəqliyyat, kənd təsərrüfatı və təhlükəsizlik kimi sahələrdə qərarların birbaşa ən yüksək səviyyədə icrasını təmin edəcək.

Azərbaycan uzun illərdir ki, Avropanın enerji təhlükəsizliyində etibarlı tərəfdaş kimi tanınır. Serbiyaya edilən bu səfər çərçivəsində isə əməkdaşlıq yeni bir mərhələyə adladı. İmzalanan razılaşmalar arasında Serbiya ərazisində Azərbaycanın birbaşa iştirakı ilə elektrik stansiyasının inşası xüsusi çəkiyə malikdir. Bu, Azərbaycanın təkcə xammal ixracatçısı deyil, həm də digər ölkələrin daxili enerji bazarlarında aktiv investor və texnoloji tərəfdaş kimi çıxış etdiyini sübut edir.

Müasir dünyada ölkələri bir-birinə bağlayan ən önəmli faktorlardan biri də birbaşa nəqliyyat əlaqələridir. Səfər zamanı elan edilən bu ildən etibarən Bakı və Belqrad arasında başlayacaq birbaşa uçuşlar həm biznes mühiti, həm də turizm sektoru üçün yeni imkanlar yaradacaq. Bu hava körpüsü xalqlarımızın bir-birini daha yaxından tanımasına və iqtisadi dövriyyənin sürətlənməsinə xidmət edəcək.

Azərbaycan və Serbiya beynəlxalq hüququn ən fundamental prinsiplərindən biri olan ərazi bütövlüyü və suverenlik məsələsində hər zaman eyni mövqedən çıxış ediblər. Prezident İlham Əliyevin səfəri zamanı bu dəstək bir daha ən yüksək səviyyədə ifadə olundu. Hər iki ölkənin oxşar tarixi çağırışlarla üzləşməsi onların bir-birini daha yaxşı anlamasına və beynəlxalq arenalarda vahid cəbhədən çıxış etməsinə zəmin yaradır.

Prezident İlham Əliyevin Serbiyaya səfəri Azərbaycanın xarici siyasətinin nə qədər çoxşaxəli və məqsədyönlü olduğunu bir daha nümayiş etdirdi. Bu səfər göstərdi ki, Azərbaycan həm enerji resursları ilə, həm də investisiya potensialı ilə Avropanın mərkəzində mühüm strateji oyunçuya çevrilib. Bakı və Belqrad arasındakı bu dostluq və tərəfdaşlıq körpüsü hər iki xalqın rifahına və regionun sabitliyinə böyük töhfələr verəcəkdir.

Elvin Əliyev

YAP Babək rayon təşkilatının sədr müavini

Paylaş:

Baxılıb: 427 dəfə