Prezidentin Gürcüstana səfəri: strateji tərəfdaşlıq və gələcəyə baxış

Bakı:

23 °C

55 %

4 m/s

Əlaqə

AZ RU EN

Ana səhifə / YAP xəbərləri / Prezidentin Gürcüstana səfəri: strateji tərəfdaşlıq və gələcəyə baxış

Prezidentin Gürcüstana səfəri: strateji tərəfdaşlıq və gələcəyə baxış

07.04.2026 [23:07]

2026-cı il aprelin 6-da Azərbaycan Respublikasının Prezidenti İlham Əliyev Gürcüstana rəsmi səfər etmiş və səfər çərçivəsində mətbuata geniş bəyanatla çıxış etmişdir. Bu səfər Azərbaycan-Gürcüstan münasibətlərinin yüksək səviyyədə olduğunu bir daha nümayiş etdirməklə yanaşı, regionda əməkdaşlığın gələcək istiqamətlərinə də işıq salmışdır.

Prezident İlham Əliyev çıxışında iki ölkə arasında mövcud olan dostluq, qardaşlıq və strateji tərəfdaşlıq münasibətlərini xüsusi vurğulamışdır. O qeyd etmişdir ki, Azərbaycan və Gürcüstan uzun illərdir ki, bir-birinə etibarlı tərəfdaş kimi yanaşır və bu münasibətlər qarşılıqlı hörmət və dəstək prinsiplərinə əsaslanır. Dövlət başçısı bildirmişdir ki, beynəlxalq təşkilatlarda da hər iki ölkə daim bir-birinin mövqeyini dəstəkləyir.

Ölkə başçısı İqtisadi sahədə əldə olunan uğurlara xüsusi diqqət çəkərək vurğulamışdır: “Biz iqtisadi sahədə böyük uğurlar əldə etmişik.” Prezident İlham Əliyev qeyd etmişdir ki, son illərdə həyata keçirilən islahatlar nəticəsində Azərbaycanın iqtisadiyyatı şaxələndirilmiş, qeyri-neft sektoru sürətlə inkişaf etmiş və ölkənin maliyyə dayanıqlığı daha da güclənmişdir. Bu uğurlar Azərbaycanın beynəlxalq arenada etibarlı iqtisadi tərəfdaş kimi mövqeyini möhkəmləndirmişdir.

Dövlət başçısı həmçinin enerji təhlükəsizliyi məsələsinə toxunaraq Azərbaycanın Avropanın enerji təminatında mühüm rol oynadığını bildirmişdir. O qeyd etmişdir ki, həyata keçirilən iri enerji layihələri sayəsində Azərbaycan etibarlı enerji təchizatçısına çevrilmişdir. Gürcüstanın bu layihələrdə tranzit ölkə kimi rolu isə xüsusi vurğulanmışdır.

Nəqliyyat sahəsində əməkdaşlıq da çıxışın əsas mövzularından biri olmuşdur. Prezident İlham Əliyev qeyd etmişdir ki, Azərbaycan və Gürcüstanın birgə həyata keçirdiyi nəqliyyat dəhlizləri – xüsusilə Şərq-Qərb nəqliyyat marşrutları – regionun logistika imkanlarını genişləndirir və beynəlxalq ticarətə mühüm töhfə verir. Bu layihələr regionu mühüm tranzit mərkəzinə çevirir.

Bununla yanaşı, Prezident İlham Əliyev regional sabitlik və təhlükəsizlik məsələlərinə də toxunmuşdur. Dövlət başçısı bildirmişdir ki, Cənubi Qafqazda sülhün və sabitliyin qorunması bütün ölkələr üçün prioritetdir və Azərbaycan bu istiqamətdə konstruktiv siyasət yürüdür. Gürcüstanla əməkdaşlıq da məhz bu sabitliyin təmin olunmasına xidmət edir.

Prezident İlham Əliyev çıxışında humanitar və mədəni əlaqələrin də əhəmiyyətini vurğulamışdır. Ölkə başçısı qeyd etmişdir ki, xalqlar arasında dostluq münasibətləri dövlətlərarası əlaqələrin möhkəmlənməsində mühüm rol oynayır və bu istiqamətdə də əməkdaşlıq davam etdirilməlidir.

Sonda Prezident İlham Əliyev əminliklə bildirmişdir ki, Azərbaycan-Gürcüstan əlaqələri gələcəkdə daha da genişlənəcək, yeni iqtisadi və infrastruktur layihələri həyata keçiriləcək və bu əməkdaşlıq regionun inkişafına xidmət edəcəkdir.

Beləliklə, Prezidentin Gürcüstana səfəri və səsləndirdiyi fikirlər bir daha göstərdi ki, Azərbaycan regionda güclü iqtisadi potensiala, strateji baxışa və etibarlı tərəfdaşlıq siyasətinə malik ölkədir. Bu isə həm ölkənin daxili inkişafını, həm də beynəlxalq nüfuzunu daha da artırır.

Sahib Şükürov

YAP Göyçay rayon təşkilatının sədri

Paylaş:

Baxılıb: 359 dəfə